1 Timóteo 3 - Kaxinawá Bíblia (BR)

¹ Na hãtxarã, txanima habiaskaki. Haratubũra Jesus Cristo ikũwaĩbu hatũ mekenikakatsis ikirã, daya pepa akatsi ikaiburã, haskarã, peki.

Hatũ mekenikai uĩnikabuirã, eska itikiaki, na hãtxarã

² Na eska yunua daya birã, hau eska tibi ikubainũbũwẽ. Duapa hakiri txakabu yuisbuma inũ, aĩyãkatsi ikĩ aĩbu bitã heneisma betsawẽ kemuisma inũ, hawẽ hãtxa kayabi binumakĩ kaneama pe xinãkĩ akubaĩmisbu inũ, haki kasheisbuma inũ, bai mapuabu hatu itã hatu ushãmisbu inũ, yusĩnanaĩ pekũkaĩmisbu itirubuki.

³ Ha dikabi eska tibi meama xinãmisburã, paẽakiri xinaĩsbuma inũ, detenamekatsi ikĩ xinaĩsbuma inũ, mabu inũ peiwẽ kemuisbuma inũ, duapakatsis iki pepamisbu itirubuki.

⁴ Ha inũ, hawẽ hiwe anu hatube hiweabu hatu meke pewashũ hatu pimakĩ pewamisbu inũ hawẽ bakebu hau haska hiwenũbũ hatu yunua txibaĩ hawa txakabu mekĩ tsua bikawaisbuma itirubuki.

⁵ Tsuãra habe hiweabu hatu meke pewaismatunã, ikũwaĩbu Deusũ enabu haska washũ hatu pe meketirubumariki.

⁶ Ha inũ, mekenika katukĩ dama ikũwãkĩ taewabainai hawaira uĩtã katuyamakubaĩwẽ. Hamẽ dama ikũwaĩ mã haska katua: “Ea besti ẽ pehairaki”, iki keãyã Deusũ Satanás putani keska wakĩ haskari wakĩ hatu putariatiruki.

⁷ Ha inũ, ikũwãbumã ha huni pepa hawẽ xinã unãtã hakiri pe xinãmisbu besti uĩkubaĩkĩ mekenika katutiki, Satanásã parãkĩ hatu atxia hawaira kanekĩ hau hatu uĩmatxakayamashanunã.

Merabewanikabu katukinã eskabu atikiaki, na hãtxarã

⁸ Habiaskari wakĩ merabewanikabu katukinã, eskari akubaĩkãwẽ. Hunibũ hakiri pe xinaĩ haki kasheisbuma inũ, hawara yubaka bestitã kaneisbuma inũ, paeĩsbuma inũ, hatu beparãtã pei inũ hatũ mabu ibubis binumatã itxawaisbuma hau ikubainũbũwẽ.

⁹ Ha inũ, Deusũ yununi hawẽ bakẽ kakape txanima unãhairai haskawẽ hiwekaĩkĩ ikũwaĩ hatũ xinã pepaya hau ikubainũbũwẽ.

¹⁰ Ha dukũ hatũ hiwea pemẽkaĩ ishũ uĩkubaĩkĩ hakiri hawa txakabu kaĩmabumakẽ unãtã merabewanika dayanika katutirubuki.

¹¹ Habiaskari wakĩ aĩbuaiburi merabewanika katukatsis ikinã, hakiri pe xinaĩ haki kasheisbuma inũ, hatũ txani tuekĩ hatu nĩkamaisma inũ, patapai kasheisbuma inũ, dasibi hawẽ pepa hatu uĩmakubaĩmisrã, haska keskabu besti akubaĩkãwẽ, katukinã.

¹² Merabewanika hunirã, aĩbu bitã bake watã habetã yumewai habe putanameisbuma inũ, hawẽ hiwe anu hawẽ bakebu inũ hatube hiweabu hatu meke pewashũ hatu pimakĩ pewamisbu hau haska ikubainũbũwẽ.

¹³ Hanua merabewanikabu pepakĩ Jesus Cristo dayashũkinã, betsabu uĩmai hawa txakabuamakẽ habũ kẽwãtirubuki. Hanua Jesus Cristo ikũwaĩwẽ taea benimai unãnuma hiwekubaĩtirubuki.

Txanima hãtxa shabakabi ha ikũwaĩ eskatikiaki, na hãtxarã

¹⁴ Ẽ hawaira samama mia uĩ kakatsis ibiai haskabia ẽ mia keneshũyuaii.

¹⁵ Ẽ yane katiruma xinãkinã, haskai Deus hiweatũ enabũ txanima hãtxa Jesus Cristokiri hatũ matu tsuma unãkĩ txanima hãtxa besti xinaĩ hawẽ nemakanaĩ haskai hiwei hau mekei penũbũ haskakiri mĩ hatu yusĩnũ bebũkiri ẽ mia kene bumaii.

¹⁶ Dasibi Jesus Cristo nũ ikũwaĩwẽ Deusũ nuku duawai nũ unã keyutirumabia txanima shabakabi haska wani haska xinaĩ tsuabura haskakiri yui nũ hawẽ ha itirubumaki. Hakia hawẽ bake ikũwãkĩ Deus nũ benimawatiruki. Eskaki, mia yuinũ nĩkawe: Cristo huirã, hunĩ yura bitã tashniniki. Cristorã, hawa txakabu hayama pepa bestiki, iwanã, Deusũ Yushĩ Pepatũ hawẽ hiweakiri yuiniki. Bestẽkaina Deusũ nai tsumabũri uĩriakubainibuki. Ha inũ, nawa betsa betsapa anushũ Jesusũ tsumabũ kakape hakiri yusĩkubaunaibũ itxapabũ ikũwaĩbũ Deusũ nai anu ana hawẽri ainitã shanẽ ibu wani nũ unaiĩ.