1 Timóteo 1 - Kaxinawá Bíblia (BR)

Paulõ Timóteokiri xinãnikiaki, na hãtxarã

¹ Ea ẽ Paulorã, Deus nukũ mekenika inũ Jesus Cristo hawẽ yubakaniwẽ nũ hiweshanai nũ manaitũ Jesus Cristõ kuxipaya ea washũ ea yununibuki.

² Timóteoõ, ẽ mia kene bumai uĩrawe, ẽ mia Jesus Cristo ikũwãmaniwẽ taea mĩ ẽ bake kayabi keskakirã. Nukũ Epa Deus inũ nukũ Shanẽ Ibu Jesus Cristo miwẽ nuikĩ hau mia unãnuma hiwemakĩ pewakĩ duawapakekubainũbũwẽ.

Yusĩa peparã, txakabube husitimakiaki, na hãtxarã

³ Macedônia mai pakea anu kakĩ Éfeso anushũ mĩ hatu pewakĩ mĩ hatu merabewayunũ ẽ mia baxibiranima keska habias ẽ mia ana yunuaii. Tsuabũra ha hatũ yusĩnãbũ hatũ xinã meribis hau hatu yusĩtxakayamanũbũ hatu nemakĩ pewawe.

⁴ Tsuabũra hatũ shenipabu hiwenibu tanakubainaibu inũ hatũ shenipabũ beya hawẽrua keska hatu yusĩ txakaibu hau nĩkayamanũbũwẽ, ha miyuirã, hamẽkirã. Haska yuimisbube hãtxanamei hau hamẽyamanũbũwẽ. Haska Deusũ abuai hawa hatu amakĩ merabewatirubumaki. Hakia Jesus Cristo ikũwãkĩ besti haska Deus yubakani abukĩ ikũwaĩ besti mã hiwetirubuki.

⁵ Na haskakiri xinãkĩ ẽ mia yunuairã, tsuabura hatũ huĩti detsisma pepawẽ xinãkĩ dakeama Jesus Cristo ikũ kayabi waibu hau hatuwẽ nui nũ habube abunamekubainũbũ haskabu besti ikũwaĩbu txanima hatu yusĩkubaĩwẽ.

⁶ Haska tibi besti yui ha iki inũ hamẽ hãtxa txakabu txibaĩ yusĩa pepa txibãma kanekanikiki, hatũ xinã husitã benuirã.

⁷ Haburã, yusĩa kayabi unãmabia Moisés keneniwẽ yusĩnanãpaikĩ hatũmebi yuibiai habũ ibubis nĩka pewama inũ yusĩ pewai keska xinaĩ: “Ẽ pe hatu yusĩaiĩ”, ikĩ yuimisbuki.

⁸ Haska Deusũ xinãkĩ Moisés kenemanirã, tsuabũra haska hawẽ xinã txibãkĩ nũ akairã, haska pe nũ unãkanaii.

⁹ Hirabibũ xinãnãkãwẽ, haska nemati tibi yununi inũ yunumisbu hayarã. Haska tibi kenekinã, pepabukiri tanakĩ akabumaki. Hakia eskawẽ taeshũ anibu keyuismaki, hatũ shanẽ ibu nĩkabiakĩ hawẽ hãtxa txibaĩsbuma inũ, txakabu tibi akĩ Deus sinatamamisbu inũ, Deuski kashekĩ hawẽ kẽwãtiki meseisbuma inũ, hawẽ epa kasmai hawẽ ewa haki pubẽkĩ tenaĩbu inũ, yura betsaki sinatakĩ tenãmisbu inũ,

¹⁰ txutabaũmisbu inũ, huni dabe txutanamemisbu inũ, aĩbu dabe txutanameaibu inũ, yura betsabu yumetsushũ hawẽ pei bikatsi dayaru wakĩ inãmisbu inũ, txani txakamisbu inũ, hamẽ uĩyamabia yura betsaki yubakatã paranamisburã, haskabunaki, haska habũ yusĩa kayabi txibaĩsbumarã.

¹¹ Na nemati tibi hayawẽ Deusũ kaka pepa hawẽ bakekiri Deus duapahairatũ ea yusĩtã haska ẽ txanikũkaunũ ea yununiki.

Paulowẽ nuikĩ Deusũ katunikiaki, na hãtxarã

¹² Nukũ Shanẽ Ibu Jesus Cristõ ekiri pe xinãkĩ ẽ txĩtũtiruma xinãkĩ ea duawakĩ hawẽ daya ea yununiwẽ taeshũ txanima hatũ ea kuxipa wa ẽ kẽwãkubainaii.

¹³ Ha dukunã, Jesus Cristokiri txakabu yui haki shetxakakĩ ha ikũwaĩbu danãkĩ ẽ hatu itxakawayuniki. Haskati dabanẽ Jesus Cristo ẽ ikũwãriama haska ẽ xinaĩ inũ haska ẽ akubainai Deus ẽ benimawai dabanẽ ẽ ibiaya ha ẽ kaneaiwẽ taea Deus ewẽ nuitxakayamaniki.

¹⁴ Nukũ Yavé Deus ha besti nuikipahairakĩ ea duawatxakayamakĩ hawẽ xinãwẽ ẽ xinã ea betsa wamatã Jesus Cristo ẽ itxakawabiaya ha ikũwaĩbuwẽ ea hatuwẽ nuitiwaniki, Jesus Cristowẽ taeshunã.

¹⁵ Na haskarã, txanima kayabiki, tsuabũra ikũwãtiruburã. Ikũki Jesus Cristo mai anu tashnirã, txakabu wamisbu hau Deusũ hatu kupiyamashanũ hatũ txakabu buatã hatu mekẽnũ ika huniki. Hamẽ eãnã, txakabu wakĩ yura dasibibu ẽ binuhairaniki.

¹⁶ Ea ẽ haskabiakẽ Deus ewẽ dabanã ikĩ ea kupikatsi ikama hau Jesus Cristo ewẽ nuikĩ ea merabewakĩ hĩ hĩ ikĩ hawaira xinãbaũs aismarã, ea uĩmani haska tsuabũra ea xinãkĩ ewẽ taeshũ habũri ea uĩkĩ Jesus Cristo ikũwãkĩ hiwea kayabi bishãkanikiki.

¹⁷ Hanua Deus nũ uĩtirumabia ha bestitũ nuku mekei shanẽ ibuhairakũkaini niti ikama hiwemistũ dasibi damiwani heneama hau dasibibũ kẽwãkubainũbũwẽ. Haskakirã.

^18-19 Timóteoõ, ebetã Jesus Cristo dayashuni mĩ ẽ bake keskaki. Ea nĩkawe. Jesus Cristo ikũwaĩ haki dakeama txakabu nemakĩ txanima hãtxa mĩ hatu yusĩpakẽnũ Deusũ hatu yunua Jesus Cristo ikũwaĩbu yusĩnã mekenikabũ mia katunibuki. Habiaskari xinãkĩ eãri ẽ mia yunuaii, mĩ kaneama ishanai unaĩnã. Hakia yura betsabu hatiritũ Jesus Cristo ikũwãkĩ taewabianishũ txakabu metã ma txĩtuãbuki, hanushũ kupishanai anu buirã.

²⁰ Ha inũ, Himeneu inũ Alexandrẽ habiaskari hatũ hiweawẽ hatũ yusĩa kanekĩ yusĩtxakaibu hau ha dabe ikũwaĩbube ana itxayamanũbũ ẽ hatu nemaimaki. Habũ xinaĩ keska Satanásã hau hatu amanũ ẽ hatu haska nemaimaki, ha Deuskiri txakabu yuiaibu ha ibubis keneaibũ Deusũ hatũ xinã betsa watiru hau unãshanũbunã.