1 Tesalonicenses 3 - Kaxinawá Bíblia (BR)

Timóteõ hau hatu uĩtanũ Paulõ yununikiaki, na hãtxarã

¹ Matuwẽ nuihairakĩ matukiri unãkatsis ikĩ ana nũ tenetirumawẽ taea Atenas mae ewapa anushũ ea inũ Silvano manakai hiweyushũ

² nukũ betsa Timóteo nukubetã Cristokiri kakape yusĩmis matu anu nũ nitxĩmaki, hau matu xinã txãkãwãkĩ hau matu ana kuxipa wai kanunã.

³ Ha inũ, habũ nuku itxakawabiaibũ Deusũ nuku hatube hiwemai mã unaĩwẽ taea hamapai bika xarabu mei yumãbiai hawa dateyamakãwẽ.

⁴ Haskakẽ Jesus ikũwãriabumã nuku itxakawaibu nũ yumãshanaikiri matu yusĩ kaimashũ bebũkiri nũ matu yuikubainimaki. Na eskatiã haska nũ matu yuima keska uĩkĩ mã ma tenekĩ meaii.

⁵ Matukiria kaka nĩkakatsis ibiai tsua yukatima matu xinaĩ: “Satanásã hatu parã ma txĩtũxinabumẽkaĩ ika datei hamẽ nũ hatu yusĩmamẽkaĩ”, ikĩ eã ẽ ana manatiruma matu anu Timóteo ẽ nitxĩmaki, haskamẽ mã ikũwãkubainai hau nukuki txanikĩ nuku banabimayushanunã.

⁶ Hakia mã ikũwaĩ txĩtuãbuma inũ mã abunamei heneama Tessalônica anua haska kaka Timóteõ nĩkatãxĩshũ nuku yuia nĩkai haska nũ matuwẽ nuiai keskariai matũri nuku ana beisnũ ika mã nukukiri xinaĩ matu uĩtani huxĩshũ nuku yuikĩ benimawaxinaki.

⁷ Haskakẽ ẽ betsabu inũ ẽ puibuũ, nuku bika tenemakĩ yumãwãbiaibũ ha xinãma mã Jesus ikũwaĩ txĩtuãbumakẽ haska matu nĩkatã hawa ana matuwẽ dateama nũ xinã txãkaiĩ.

⁸ Hakia nukũ Shanẽ Ibu ikũwaĩ mã txĩtuãmawẽ taea nũ ana hawa punu nukama matuwẽ benimai nũ hiweaii.

^9-10 Hanua nukubu matuki ana bai kashũ ana matu yusĩkĩ kuxipa wakĩ haska nũ matu yusĩ keyuriama matu yusĩ kakatsis ikĩ mexu merã inũ bariri nũ matu Deus yukashũkubainaii. Mã haskakĩ ikũwaĩ txĩtuãbumawẽ taeshũ mã nuku benimawaya haska washũ matuwẽ taeshũ Deus nũ kẽwãkĩ keyutirumaki.

Paulo Deusbe hãtxakĩ dayuikubainikiaki, na hãtxarã

¹¹ Haskakẽ nukũ Epa Deus inũ nukũ Shanẽ Ibu Jesusũ nuku merabewakĩ hau matu anu nuku nitxĩkĩ nuku yunushanũbũwẽ, nũ matu uĩ kanunã.

¹² Ha inũ, nukũ Shanẽ Ibũ hau matu ana ewawakĩ abunamemakĩ nui itxapa matu inãkubainũwẽ. Matu haska wa hayatã ikũwaĩ betsabuwẽ nuikĩ yurabu dasibiwẽ nuitixara ikubaĩkãwẽ, haska nũ matuwẽ nuikũkainai keskairã.

¹³ Haskawẽ taea nukũ Shanẽ Ibu Jesusũ matu xinã mestẽwãkĩ matũ hamapai txakabu beshtenishũ mã hawenabu hawa txakabu matukiri metutirubuma mã hiwekẽ hatiãra nukũ Shanẽ Ibu hawẽ tsumabube ana huaitiã nukũ Epa Deus bebũ mã nia hau matu uĩshanũ haska matukiri ẽ xinaiĩ. Haskakirã.