1 Tesalonicenses 2 - Kaxinawá Bíblia (BR)

Tessalônica anua eskai Paulo hatube dayanikiaki, na hãtxarã

¹ Ẽ betsabu inũ ẽ puibuũ, matu anu yusĩ kai hamẽ nũ kama ikima mã unaiĩ.

² Ha inũ, matu anu nũ hikiriamakẽ Filipos anushũ nuku itxakawakĩ nuku nuitapawaimabu mã unãriaii. Nuku bika tenemabiaibũ Deusũ nuku kuxipa wakubaina hawẽ kakape nũ matu yusĩkubainimaki.

³ Hanushũ matu yunukĩ yusĩkĩ nũ kaneama ikimaki. Ha inũ, txakabuwakĩ nũ matu hawa parãma iriaimaki.

⁴ Hakia Deusũ nuku unãti watã yuikĩ: “Huni pepabuki”, itã xinãkĩ hau hawẽ kakape nũ yuikubaĩshanũ nuku yununi nũ matu yui hãtxakũkainaii. Deusũ besti nukũ huĩti unãmiswẽ taeshũ Deus besti nũ benimawakatsis ikaii, yurabu benimawatiwẽ nuiamarã.

⁵ Haska wakĩ hãtxa hawẽrua bestiwẽ hau hawẽ mã nuku kẽwãnũbũ nũ matu parãma ikima mã unaiĩ. Ha inũ, matu parãtã pei binũ, iwanã, nũ matu yusĩama ikima Deusũ unãriaikiki.

⁶ Ha inũ, Jesusũ kuxipayakĩ nũ matu yunutirubia matu inũ yura betsabu hau nuku shanẽ ibu wakĩ kẽwãnũbũ nũ hari yunukĩ matu hãtxa wama ikimaki.

⁷ Hakia ewabũ hawẽ bakebu pe mekekĩ pimamis keska wakĩ matube hiweshũ matuwẽ nuikĩ unãshubira yusĩkĩ nũ matu meshtãmakubainimaki.

⁸ Haska wakĩ matu abukĩ Deusũ kakape yusĩ benimai matuwẽ nuihairai kashakatsis iki haska xinaĩ ẽ matu mawashũkeanimaki. Haskawẽ taea ana habias matukiri xinãkĩ matu merabewanũ, iwanã, hamapai betsa nũ matu ashũkatsis ikaii.

⁹ Ẽ betsabu inũ ẽ puibuũ, Deusũ kakape matu yusĩ kashũ matũ piti pikĩ matu bika wakĩ nũ matu txikix wakatsi ikama bariri inũ mexu merã dayahairai yumãkĩ nukũ dayawẽ taeshũ nukũ piti nũ bikubainima mã unaiĩ.

¹⁰ Haska mã ikũwaĩbube hiwea pepakũkaĩkĩ hawa kaneama nũ matu hawa txakabuwama ikũkainima Epa Deusbetã mã unaiĩ.

^11-12 Nũ matu eska wani mã unãriaii. Bestibu tibi matu benimawakĩ nũ matu pewakubainirã, haska epabũ hatũ bakebũ txakabuwai nemamis keska wakĩ mã Deus hiweshũkĩ haska abuai keska maturi mã inũbũ nũ matu yunua matũ txakabu unãtã mã henekubainimaki. Haska Deusũ hawẽ mae kayabi pepa anu matu hiwemakatsi ikai ma bebũkiri matu kenani haskakiri nũ matu merabewakubainimaki.

¹³ Haska wakĩ Deusũ kakape nũ matu yusĩma nĩkakĩ hunibũ yusĩa keska mã xinãma hakia Deusũ hãtxa besti txibãkĩ xinãkĩ mã ikũwãyã hawẽ hãtxawẽ taeshũ Deusũ matu xinã betsa wamakubainimaki. Deusũ matu haska waimawẽ taeshũ nũ matu Deus kẽwãshũkubainaii.

¹⁴ Hamẽ betsarã, Jesuswẽ taea ẽ betsabu inũ ẽ puibuũ, Judéia anushũ judeubũ hawenabũ Jesus ikũwaĩbu hatu itxakawabu Deusũ bake Jesus Cristo ikũwaĩ yumanibu keskai habiaskari wakĩ matunabũri matu itxakawabu maturi mã nuitapaimabuki.

^15-16 Ha judeuburã, ha dukũ hatũ shenipabu betsabũ Deusũ hãtxa yuishunikabu betsabu ũ unuatiã hatu tenãkubiranishũ hanushũ habiabũ bababũri nukũ Shanẽ Ibu Jesus tenãrianishũ nukuri itxakawakatsis ikĩ nuku kaĩmakĩ haska Deusũ abuai ashũama nuku putakubainimabuki. Hanushũ Deusũ judeubumari hatu xinãkĩ haburi mekekatsi hanu hatu anu nuku yunuima nũ matube hãtxaya judeubũ nuku nemapaikĩ judeubu inũ judeubuma hatube dasitã hatu nukuki sinatamakubaĩkanikiki. Haska wakĩ hatũ txakabu betsa betsapa ana matsãkĩ itxawakubainaibuwẽ taeshũ samama hatu kupitxakayamakatsi Deusũ hatu manakaki.

Tessalônica anu Paulo ana bai kakatsi inikiaki, na hãtxarã

¹⁷ Ẽ betsabu inũ ẽ puibuũ, matu anushũ nuku bika tenemabu nũ huima ushe itxapama matu xinãkĩ manui matu ana uĩ kanũ, iwanã, Deus matu yukashũkĩ nũ matu xinãkubainaii.

¹⁸ Haskakũkaini nũ matuki ana bai kakatsi ikaya ẽ Paulo ẽ yubakabiakũkainaya Satanásã ea beshtenũ ishũ nuku nemaimaki.

¹⁹ Nũ haskakũkaĩkĩ nũ matu yusĩtanima xinã betsama ikũwã bestikĩ betsabu ikai keskama hatu binui mã hawa txĩtuãmawẽ taea hanu kupiaitiã nukũ Shanẽ Ibu Jesus ha nũ manaka huaya nukũ benima pae matuwẽ taeshũ tsuã nuku mebĩtiruma nũ unaiĩ. Haskai nũ benimaya matuwẽ taeshũ Deusũ nuku kẽwãshanikiki.

²⁰ Matuwẽ taeshũ Deusũ hawẽ kuxipawẽ nuku duawakĩ nuku benimawaikiki.