1 Tesalonicenses 1 - Kaxinawá Bíblia (BR)

Paulõ hatukiri xinãnikiaki, na hãtxarã

¹ Ẽ Paulõ, ẽ merabewanika Silvano inũ Timóteobetã ẽ matu kene bumai uĩrakãwẽ. Tessalônica mae anushũ mã ikũwaĩ nukũ Epa Deus inũ nukũ Shanẽ Ibu Jesus Cristobe mã ma dasia hatubekẽ Deusũ hau matu duawakĩ unãnuma matu hiwemakubainũwẽ.

Tessalônica anuabũ ikũwaĩ pe hiweabuwẽ taeshũ Paulõ hatukiri Deus kẽwãnikiaki, na hãtxarã

² Matu dasibiwẽ taeshũ Deus kẽwãkĩ matu hakimama xinãkĩ Deus nũ matu yukashũkubainaii.

³ Mã eskai hiwea ikũwaĩ Jesuski txiti itã, ikũwaĩ betsabube merabenaĩ bika tenebiai hawa txĩtuãma nukũ Shanẽ Ibu Jesus Cristo mã manaya nukũ Epa Deusbe hãtxakĩ matu dayuishũkĩ matukiri xinãkĩ nũ heneama ikũkainaii.

^4-5 Ẽ betsabu inũ ẽ puibuũ, matu anu kashũ Jesusũ kakape matu yusĩkĩ nukũ hãtxa bestiwẽma Jesus Cristo datã akĩ nũ matu amaimaki. Hakia Deusũ kuxipa matu uĩmakĩ hawẽ Yushĩ Pepawẽ dami atimaska matu uĩmakĩ ikũhairawamakĩ hawẽ hãtxa pepa txanima kayabi keyutima unãkĩ nũ matu yusĩmaki. Nuku nĩkatã mã ikũwaĩwẽ taeshũ hanu Deus matuwẽ nuikĩ hawenabu matu wakatsis ikĩ matu katuni nũ unaiĩ. Haska matu anu nũ pe hiweima inũ haska matu merabewa bestikĩ nũ matu bikawama ikima matũri mã unãhairaii.

⁶ Txanima nuku nũ ikai keskai inũ nukũ Shanẽ Ibu Jesus hiweni keskai matũri mã nuku txibãyã matu itxakawakĩ matu nuitapawabiaibũ Deusũ Yushĩ Pepatũ matu benimawakubainaya Deusũ kakape mã ikũwãkubainimabuki.

⁷ Mã haskaya ha mai pakea dabe Macedônia inũ Acaia anushũ Jesus ikũwãbaunaibũ mã ikai kaka nĩkakĩ haska Deusũ nuku hiwemakatsis ikai tapĩkubaunimabuki.

⁸ Matũ dukũ ikũwãkĩ nukũ Shanẽ Ibũ kaka pepa mã txibãkĩ hatu uĩmaya Macedônia inũ Acaia besti anuama hakia matũmebiri Deusũ hãtxa ma tapĩtã matũri mã hatu yusĩayã paai mae betsa betsapa anuabũ mã haska ikũwaĩbu habũ matu nĩkakĩ keyubaunaibũ nũ ana hawa hatuki txanitirumaki, mã ma hatu amayarã.

⁹ Ha inũ, mã haskaimabukiri ha mae anushũ nukukiri txanikĩ txanima haska mã nuku duawaima txanimisbuki. Ha inũ, damiwakĩ yushĩ itsa wabu mã kẽwãbiapauni ha henetã Deus hiwea kayabi ikũwãkĩ mã duawakĩ taewaimaki.

¹⁰ Haska bestikiri mã xinãma hakia Deusũ bake Jesus mawa ana bestẽwani nai anua txĩtũkirã ana hushũ nuku mekeaya hakia yurabu txakabumisbu Deusũ hatu kupikĩ hau nuku meama ishanũ, iwanã, unãkĩ uĩshanũ ika mã manakanaii.