1 Samuel 8 - Kaxinawá Bíblia (BR)

Yununika shanẽ ibu kushipahaira Israelĩ enabu hayakatsi yuka inibukiaki, na hãtxarã

¹ Anibui Samuel babukĩ hau habũ Israelĩ enabu unãti wanika kushipa hau hatu ishũkubaĩshanũbũ hawẽ huni bake dabe katukĩ yununikiaki.

² Hawẽ huni bake iyua hawẽ kena Joel inũ hawẽ huni bake ha katxukea hawẽ kena Abias, Berseba anu ha dabe hatu shanẽ ibushũkĩ Israelĩ enabu yunukĩ taewaibũ

³ hatu haska wakĩ hawẽ bakebu hatu katushũbiaima hatũ epa pepakũkaĩmis keskama hakia ibubis kemuhairai shinã txakakĩ pei hune binũ, iwanã, hatu yukakubaĩkĩ hawara yunuti pepa txibãma ikubainaibuwẽ taea

⁴ Israelĩ enabu anibu unanepa shanẽ ibubu dasibi itxai keyutã Ramá anu Samuelbe hãtxai bushũ

⁵ yuikĩ: “Anibui mĩ ma babuaii. Mĩ huni bake dabetunã, mĩ nuku amis keska nuku pewabumaki. Haskawẽ taeshũ hau nuku yunukubaĩshanũ yununika shanẽ ibuhaira katukĩ nuku yunushũwẽ, mae betsa betsapa anu nawa hiwebaunabũ beya hayabu keskarã”, akeakeabu

⁶ yununika shanẽ ibu kushipahaira yukakĩ ea abiabu hatũ hãtxa Samuelĩ betxipaiama haskakiri Senhor Deusbe hãtxakĩ yuka

⁷ kemakĩ Samuel yuikĩ: “Hamapai tibi minabũ mia yukaibu hatu ashũwẽ. Hatu mekei ẽ ana hatu shanẽ ibushũyamanũ mia danãma hakia ea habũ danaĩ ikanikiki.

⁸ Hanu hatũ shenipabu Egito anua ẽ hatu tashnimabiranaitiã itiani iki ikanikiki, haska ea akubiranibu keska mia wairã. Haskawẽ taeshũ yushibu betsa betsapa kẽwãkĩ ea henekubaĩmisbuki.

⁹ Haska mia yukaibu mĩ nĩkashurã, peki. Hatu katushũshãwẽ. Hakia mĩ hatu katushũriama haska hatũ yununika shanẽ ibu kushipahairatũ hatu yunukĩ amakubaĩshanai dasibi shabakabi bebũkiri hatu txitekĩ unãmawe, haska habũ dayashũshanaiburã”, aka

¹⁰ yununika shanẽ ibu kushipahaira yuka ikaibu Senhor Deusũ hãtxa Samuelĩ nĩkatã hatu bamabimakĩ

¹¹ yuikĩ: —Haska yununika shanẽ ibu kushipahairatũ matu akubaĩshanai matu yuinũ ea nĩkakãwẽ. Matũ bakebu kenatã detenamenikabu hatu yunukĩ hatiri detenamenikabu wakĩ hatiri hawẽ cavalo tarãtiki mapumisbu wakĩ hatiri itxapa cavaloki katsaumebaĩtirubu hatu wakĩ hanushũ hatiri habũ shanẽ ibu kushipahaira mekenikabu hatu washũ hatu yunupakeshãkanikiki,

¹² betsabu 1.000 detenamenikabu shanẽ ibushũkĩ yunuti wakinã, betsabu 50 detenamenikabu yunuti hatũ shanẽ ibu beshmas wakinã. Matu mã huni ewaburã, hatiri katukĩ hawẽ bai anu dayarubu wakĩ hatiri bai anu bimi tsekanika wakĩ hatiri habũ hashi inũ kanũ inũ pia wanikabu wakĩ hatiri hawẽ detenameti cavalo tarãti dami wanika matu wakubaĩshãkanikiki.

¹³ Ha dikabi matũ bake txipashbu itxapa hatu dayamakatsi katushanikiki, eska tibi hau ashunũbunã. Betsabu sheni ininipa wanikabu wakĩ inũ betsabu hawẽ bawashunikabu wakĩ inũ betsabu misi wanikabu wakĩ hatu dayamakubaĩshãkanikiki.

¹⁴ Matũ bai pepabu inũ matũ uva bimi bai pepaburi inũ oliva hi bai pepaburi hawẽ kushipawẽ matu mebĩtã hau ibu wanũ hawẽ dayaru hatu inãkubaĩshanikiki.

¹⁵ Matũ shekiwã betsa betsapa inũ matũ uva bimi ano tibi mã tsekaibu 10 tibi mã haya bestitxai tibi décima parte mebĩtã hawẽ dayaru inũ hawẽ merabewanika shanẽ ibu beshmasbu habe tsuabu hatu inãkubaĩshãkanikiki.

¹⁶ Ha dikabi matũ dayaru hunibu inũ, matũ dayaru aĩbuaibu inũ, matũ ina awa pepabu inũ, matũ jumento matu mebĩkĩ ibu watã hau ha dayashunũbũ hatu yunukubaĩshãkanikiki.

¹⁷ Ha dikabi ano tibi matũ txashuwã inũ cabra tanashũ 10 tibi mã haya bestitxai tibi décima parte bikubainaya maturi mã hawẽ dayaru iriakũkaĩshanaii.

¹⁸ Ha yununika shanẽ ibu kushipahaira ikis mã katukatsi ikaitunã, matu itxakawakubainaya Senhor Deusũ hau matu merabewanũ kashakĩ mã yuka Senhor Deusũ matu ana nĩkama ishanikiki— hatu wa

^19-20 Samuelĩ hatu mesewabia hawẽ hãtxa nĩkabuma Israelĩ enabu anibu unanepa shanẽ ibubũ kemakĩ yuikĩ: —Habiaskabiakẽ yununika shanẽ ibu kushipahaira nũ hayakatsis ikaii. Dasibi mae betsa betsapa hiwebaunabu keskairã, yunukĩ nuku mekekĩ nukũ detenamenikabube tsuabura nukuki sinataibu nuku maemashũkubaĩshanunã— akeakeabu

²¹ nĩkatã hatũ hãtxa Samuelĩ Senhor Deus banabimakĩ yuia

²² kemakĩ Senhor Deusũ yuikĩ: —Haska mia yukaibu keska nĩkatã yununika shanẽ ibu kushipahaira hatu katushũshãwẽ— aka hatu anu ana kashũ Israelĩ enabu Samuelĩ yunukĩ yuikĩ: —Matũ mae tibi anu txĩtũribaĩkãwẽ, haska mã ea yukashu ẽ matu ashũshanairã— hatu wa