1 Samuel 7 - Kaxinawá Bíblia (BR)

¹ Quiriate-Jearim anu hiweabu beshũ Senhor Deusũ hãtxa aruni bau biwãkĩ hatũ mae anu bushũ mati mananã anu Abinadabẽ hiwe uke merã bitxishũ hau mekekubaĩshanũ hawẽ huni bake Eleazar katushũ hau hatũ mekenũ meribi watã yununibukiaki.

Israelĩ enabũ Samuel katukĩ unãti wanika shanẽ ibu wanibukiaki, na hãtxarã

² Quiriate-Jearim anu Senhor Deusũ hãtxa aruni bau mekekĩ aruyamabu ma 20 ano kaya Israelĩ enabu dasibibũ Senhor Deus ana haibuwakatsis ikĩ yukahairabiabu

³ hatu hẽ akamawẽ taeshũ Samuelĩ hawenabu hatu yunukĩ yuikĩ: “Matũ huĩti hirabiwẽ inũ matũ shinã hirabiwẽ Senhor Deus anu ana txĩtũtã mã txibãkatsis ikairã, ea nĩkakãwẽ. Nawabu matu dapi hiwebaunabũ yushibu dami kẽwãti betsa betsapa mã haya ana kẽwãma henekĩ putakãwẽ. Ha inũ, yushĩ Astarote dami putakĩ keyutã matũ hiwea hirabiwẽ Senhor Deus besti duawakĩ nĩkakĩ kẽwãkubaĩshãkãwẽ. Mã haska wakubainaya Filisteu nawabũ matu atxinishũ matu yunumisbu matu ana yunumama Senhor Deusũ Filisteu nawabu babu watã matu mebikinãshanikiki”, hatu wa

⁴ Samuelĩ hãtxa ikũwãkĩ nĩkatã hatũ yushibu Baal kẽwãti dami dasibi inũ yushibu betsa Astarote kẽwãti dami dasibi Israelĩ enabũ putakĩ keyutã hanushũ Senhor Deus besti kẽwãkĩ duawakubaĩkatsis ikĩ shinaĩbũ

⁵ hanushũ Samuelĩ hatu yunukĩ yuikĩ: “Israelĩ enabu dasibi Mispa anu hari itxai bukãwẽ. Mã hari itxabu harishũ eã Senhor Deus ẽ matu yukakĩ ea ashuĩ kaii”, hatu wa

⁶ Mispa anu bui itxai keyushũ huni bestibu tibitũ txatxa ũpash bitãshũ Senhor Deusũ berubi kẽwãkĩ inãkuĩ keska wakĩ mai anu ũpash hukakĩ keyushũtã habiatiãri samekekĩ dasibibũ nĩkaibũ shabakabi hatũ txakabu yuikĩ: “Nũ hawa shinãma Senhor Deus danãkĩ nũ txakabuwakubaĩshinaki. Nũ ana haskakatsi ikamaki”, ikeakeaibũ Israelĩ enabu Samuel hatũ shanẽ ibu unãti wanika kushipa taeaya

⁷ Mispa anu Israelĩ enabu ma itxabu Filisteu nawabũ nĩkatã hatuki sinatamisbuwẽ taeshũ hatu detetanũ ika Filisteu nawa shanẽ ibubu hawẽ mẽtsisipa detenamenika itxapabuya beaibu Israelĩ enabũ hatu uĩ datekĩ

⁸ Samuel yunukĩ yuikĩ: “Filisteu nawabu hatũ kushipa hau nuku nemashunũ nukũ mekenika Senhor Deus yukakĩ nuku heneshũyamawe”, akeakeabu

^9-10 txashuwã bake bene pishta txutxu heneriama Samuelĩ atxitã tesẽshũ txiwẽ hirabi menukĩ Senhor Deusũ hau hatu merabewanũ Samuelĩ yukakubainaya hatu detenũ ika Filisteu nawa detenamenikabu kemaibũ Samuelĩ hãtxa Senhor Deusũ nĩkatã hatu merabewakĩ habu anu kana tũ ima txakayamakĩ hatu dateaya nĩkai datei Filisteu nawabu kushibainaibũ

¹¹ hatu haska waya Israelĩ enabũ hatu maematirubu shinaĩ Mispa anua hawaira tashnibaĩ hatu detenũ ika, buaibũ Filisteu nawabu pashaibu txibãbaĩkĩ hatu detekubaĩkĩ Bete-Car anu niti itã txĩtũbiranaibũ

¹² mishki kerã ewapa katutã unuri Mispa inũ unuri Sem namakis bushũ hakimatima shinãmati wakĩ hatu nitxĩmashũ yuikĩ: “Natiã Senhor Deusũ nuku merabewakĩ heneama nũ unaĩwẽ taea hawẽ kena Ebenézerki”, Samuelĩ hatu wanikiaki.

¹³ Israelĩ enabũ ma Filisteu nawabu hatu maemakĩ keyuabuwẽ taea Filisteu nawabũ Israelĩ enabũ mae anu txĩtũkirã hatu ana meãma ikubainibukiaki, Samuel hiweatiã Senhor Deus Filisteu nawabuki sinataiwẽ taearã.

¹⁴ Filisteu nawabũ maewã dabe Ecrom inũ Gate namakis hatũ mai pakea kesha dapi Israelĩ enabũ mae inũ hatũ bai kesua betsa betsapa hatu mebĩkĩ keyubianibu ana ibuwakĩ Israelĩ enabũ Filisteu nawabu hatu nitxĩkĩ putakĩ keyutã ha dikabi Amorreu nawabu hatu nematã Israelĩ enabu ana hatube detenameama unanuma hatube hiwenibukiaki.

¹⁵ Samuel hiweatiã hatu dayashuni Israelĩ enabũ shanẽ ibu unãti wanika kushipa ikũkaĩkĩ

¹⁶ ano tibi Betel anushũ inũ, Gilgal anushũ inũ, Mispa anushũ hatu uĩ kakũkaũkĩ Israelĩ enabu hatũ mae tibi anua bea itxashũ hatũ txakabu inũ hawara bika teneaibukiri Samuel banabimabu hatu daewakĩ hãtxawẽ hatu pewakĩ Samuelĩ hatu yusĩkubaũpaunikiaki.

¹⁷ Haskakũkaũtani hanua kaini Ramá anu txĩtuinã, habianuri Senhor Deus kẽwãti txi tapu wani anu inũ hari hiwea shanẽ ibukĩ Israelĩ enabu Samuelĩ hatu yunupaunikiaki.