1 Samuel 6 - Kaxinawá Bíblia (BR)

Deusũ hãtxa aruni bau Filisteu nawabũ ana txĩtũwãkĩ hatu inãnibukiaki, na hãtxarã

¹ Senhor Deusũ hãtxa aruni bau Filisteu nawabũ hatũ mai pakea anu bushũ aruimabu hari 7 ushe kaya

² Filisteu nawabũ hatũ yushibubu kẽwanikabu inũ bebũkiri habũ haskashanai unananikabu hatu itxawashũ hatu yukakĩ: —Senhor Deusũ hãtxa aruni baurã, nũ haska watirumẽkaĩ, nuku yuikãwẽ. Nũ haska watã hatũ mae anu ana hatu inãtirumẽkaĩnã— hatu wabu

³ habũ hatu kemakĩ yuikĩ: —Deusũ hãtxa aruni bau mã ana hatu inãkatsi ikai haska besti hatu bumayamakãwẽ. Senhor Deus daewakĩ inãkuĩti pepa bumashũkãwẽ. Mã haska wa mã shushashanaii. Senhor Deusũ matu kupikĩ heneai mã unãshanaii, ana matu kupiamarã— hatu wabu

⁴ ana habũ hatu yukakĩ yuikĩ: —Senhor Deus daewakinã, hawa nũ inãkuĩtirumẽ?— hatu wabu hatũ yushibubu kẽwanikabũ hatu kemakĩ yuikĩ: —Matu inũ matũ shanẽ ibubu habias kupiti txakabu mei mã bika teneriaiwẽ taeshũ mane ourowẽ matũ yura anu su ika keska wakĩ 5 dami hatu amashãkãwẽ. Ha dikabi ouro shuya keska wakĩ 5 dami hatu amariashãkãwẽ, bestibu matũ shanẽ ibu tibi wakinã.

⁵ Mã bika teneaiwẽ taeshũ su ika keska ouro dami inũ matũ mae anushũ dasibi shuyã pikĩ dasibi txakabuwakĩ keyuaibu keska ouro dami wakĩ keyuabu ha damiyabi inãkĩ Israelĩ enabu mekenika Deus duawakĩ pewakubaĩshãkãwẽ. Mã haska wai Senhor Deusũ uĩtã matu inũ matũ yushibu inũ matũ mai pakea ana kupiama matu heneshanimẽkaĩ.

⁶ Israelĩ enabu Egito anua tashnibaĩpanãbũ Faraó inũ hawenabu huĩti kushikĩ hatu nemakubainaiwẽ taeshũ Israelĩ enabu mekenika Deusũ hatu kupihairaya atimas ana hatu nemama ini keskai matũ huĩti kushi wayamakãwẽ.

⁷ Ina awã tarãbaĩkĩ bumati bena hatu amakãwẽ. Ma akĩ keyuabũ ina awa dabe hawẽ bake txutxu henemariama tekishkũyã mapuisbuma bitã tarãti teumashũ hawẽ bake txutxu amai dabe txibaĩ nemakĩ hanu ina awa hiwe anu hatu bitxishãkãwẽ.

⁸ Haska washũ Senhor Deusũ hãtxa aruni bau beshũ tarãtiki nanetã hawẽ daewati ouro mabu inãkuĩti bau betsa merã ha dapi datãshãkãwẽ. Haska washũ hatu heneshãkãwẽ, ina awa dabe ibubis hau butanũbunã.

⁹ Israelĩ enabu mae Bete-Semeskiri hawa hikikaunama kai peairã, Deusũ hatũ nuku bika tenemai nũ unãshanaii. Hakia haskama hamakiri ha ina awa hikibainaiburã, hawãra nuku isĩ tenemakĩ kupiai nũ unãtirubuki— hatu wabu

¹⁰ haska habũ hãtxa nĩkatã haska wakĩ ina awa yushã dabe hawẽ bake txutxu amai katushũ hatũ bake dabe txutxu putamabirã hanu ina hiwe anu hatu bitxishũ ina awa yushã tarãti teumarabeshũ

¹¹ hanushũ Senhor Deusũ hãtxa aruni bau beshũ tarãtiki nanetã hawẽ daewati shuya dami ouro inũ yura hirabi su ika dami ouro inãkuĩti bau betsa merã ha dapi nanetã

¹² Bete-Semeskiri bai hau tanabaĩtanũbũ ina awa yushã heneabu hamebi kai maã maã ikũkaini besukiri bai tanabaini hawa benuama yusiuri inũ yusmauri hikiama kayatapibainaibũ hatxũ Filisteu nawa shanẽ ibubũ txibãkubaini ha Bete-Semes mai pakea kesha anu niti ishũ uiaĩbũ

¹³ pashku napãpa anushũ Bete-Semes anu hiweabũ hatũ shekiwã trigo tsekakĩ bewenikitãkĩ Senhor Deusũ hãtxa aruni bau awarã beai betxitã benimahairaibũ

^14-15 Bete-Semes anu hiwea huni betsa Josué bai anu hikia mishki ewapa daka anu ina awa dabe hawẽ tarãtiya niti ikabũ Senhor Deusũ hãtxa aruni bau inũ hawẽ dae wati inãkuĩti bau betsa Jacó huni bake Levĩ enabũ butekĩ mishki ewapa anu tari tsauãbu ha ina awa dabetã teurabebirãshu Bete-Semes anu hiweabũ pekatã hawẽ tarãbaĩti karu washũ ha ina awa dabetũ bau beshu tesẽrabetã Senhor Deus kẽwãkĩ ina awa dabe menukĩ keyushũtã habias shabatiãri inabu betsaburi tesẽshũ hawẽ sheni menukĩ keyushũ hawẽ kẽwãti nami huashũ piaibũ

¹⁶ Filisteu nawabũ ina awa txibãbiranabũ haska waibu dasibi uĩtã habias shabatiãri Filisteu nawa 5 shanẽ ibubu hatũ maewã Ecrom anu txĩtuaĩbũ

^17-18 Filisteu nawa 5 maewã Asdode inũ, Gaza inũ, Asquelom inũ, Gate inũ, Ecrom habu tibi bestitxai itxawatã 5 ouro dami su ika keska inũ mae tibi kenebaunabu inũ mae tibi keneuma ha 5 Filisteu nawa shanẽ ibubũ yunukĩ hatu mekemis tanatã hati ouro dami shuya keska itxawatã bau merã naneshũ Senhor Deus daewakatsis ikĩ Filisteu nawabũ inãkuinibukiaki. Bete-Semes anu Josué bai anu ha habias mishki ewapa Senhor Deusũ hãtxa aruni bau hanu dãtanibu ikis tsuabũra uĩriatirubuki.

¹⁹ Hakia Bete-Semes anushũ hatiribũ Senhor Deusũ hãtxa aruni bau haskara ikimẽkaĩ ishũ uke merã bepẽshũ ma uiãbuwẽ taeshũ hatu kupikĩ Senhor Deusũ 70 hunibu tenãkẽ uĩtã Senhor Deusũ hati hatu debuwawẽ taea Bete-Semes anu hiweabu nuihairai kashakubaĩkĩ yukakĩ

²⁰ yuikĩ: “Senhor Deus meribihairabe tsua hiwetirumaki. Haskakẽ nũ hani yunutirumẽ?” ikũkaĩkĩ

²¹ Quiriate-Jearim anu hiweabu anu hatũ hãtxa bumakĩ hatu yuikĩ: “Senhor Deusũ hãtxa aruni bau atxibiabainimashũ ana nuku anu yunushinabuki. ‘Hau menã beshũ biri benũbũwẽ’, matu washiãbuki, hatu watãkãwẽ”, aka