1 Samuel 5 - Kaxinawá Bíblia (BR)

Filisteu nawabũ mai pakea anu Senhor Deus hatube yubakani hãtxa aruni bau bunibukiaki, na hãtxarã

¹ Senhor Deus Israelĩ enabube yubakani hãtxa aruni bau atxishũ Ebenézer anua bukĩ Filisteu nawabũ maewã Asdode anu bitxitã

² hatũ mekenika yushĩ Dagom kẽwãti hiwe merã bitxikĩ yushĩ dami Dagom dapi bushũ tsaũtanabu

³ penama Asdode anu hiweabu kashũ Senhor Deusũ hãtxa aruni bau bebũ yushĩ dami Dagom maĩ tĩ ika daka uĩtã bikĩ benitã habianuri ana pewakĩ tsaũbainabũ

⁴ ana pena betsatiã kashũ Senhor Deusũ hãtxa aruni bau bebũ yushĩ dami Dagom ana maĩ tĩ iki hawẽ bushka inũ hawẽ mekẽ dabe hikiti shui namã hawẽ nakishkũki hawẽ pabu tibi tũkeakeaketã hawẽ yura besti sẽkeama daka uinibukiaki.

⁵ Haskawẽ taea na habiatiã Asdode maewã anua hawenabu Dagombe hãtxashunikabu hawẽ kẽwãti hiwe anu hikikaini hawẽ hikiti shui nakishkũki metsai haki paisbumakiaki.

⁶ Txipu Asdode anu hiweabu inũ ha dapi hiweriabaunabuki Senhor Deus hatuki sinatahairakĩ hatu kupikĩ hatũ yura tibi su ika txakabuwakĩ dasibi isĩ hatu tenema datekubaĩkĩ

⁷ Asdode anu hiweabu dasibi isĩ tenehairakĩ ha isĩ mebauni yuinamekĩ shinaĩ: “Israelĩ enabu mekenika Deusũ nuku inũ nukũ yushĩ Dagom kupikĩ shaba itxapa nuku isĩ tenemakubainaiwẽ taeshũ hatũ mekenikã hãtxa aruni bau nukubũ nũ ana meketirubumaki”, ikeaketã

⁸ haskatã hatũ shanẽ ibubu hau hatube itxatã pewai benũbũ hatu yuibaunabu ma bea hatube itxai keyuabu hatunabũ hatu yukakĩ yuikĩ: —Israelĩ enabũ mekenikã hãtxa aruni baurã, nũ haska washãkanai, nuku yuikãwẽ— hatu wabu shanẽ ibubũ hatu kemakĩ: —Gate maewã anu hari maewakĩ butãkãwẽ— hatu wa Filisteu nawabũ hari bushũ

⁹ Gate mae anu mistushinabũ hanushũ Senhor Deusũ habu dasibiri hawẽ hatu datekĩ kupikĩ bake mishtĩyãbis su imakĩ isĩhaira tenemakĩ hatu nuitapawaya

¹⁰ haskawẽ taeshũ maewã betsa Ecrom anu Deus hatube yubakani hãtxa aruni bau Filisteu nawabũ ana maewai bukĩ hatu anu bitxibainaibũ Ecrom anu hiweabũ uĩkĩ hui kushipawẽ hatu nemakĩ: “Nukuri dasibi tenã keyunũ”, iwanã, “Israelĩ enabũ mekenika Deus hatube yubakani bau mã bekanaii”, iake iakeaibũ

¹¹ Deusũ haburi kupikĩ su ika pawakĩ hatu isĩ tenemakubainaya ha maewã anu hiweabu datetxakayamakĩ hatũ shanẽ ibubu hau hatu yuishũtanũbũ hatu kenabu ma bei itxai keyuaibũ hatu yuikĩ: “Israelĩ enabu mekenika Deusũ hãtxa hatube yubakani aruni bau nenu mã beimarã, hatu bushũritãkãwẽ, ibubu anurã, hau nenushũ nuku dasibi tenãyamanunã”, hatu wanibukiaki.

¹² Habu isĩmã hatu tenãma hatũ yura hirabi su iki keyua isĩ tenetxakayamai kashai bibiski ikĩ nenuma hatũ hui kaĩmaibũ txaihaira hiwebaunabũ hatu nĩka keyunibukiaki.