1 Samuel 31 - Kaxinawá Bíblia (BR)Saul hawẽ huni bakebube detenamei ka hatu tenanibukiaki, na hãtxarã ( 1 Cr 10.1-12 ) 1 Mati mananã Gilboa anushũ hatu detenũ ika Filisteu nawa detenamenikabu mapekebaini bushũ Israelĩ enabube detenamekubaĩkĩ hatu maemakubainabu pashai bui Israelĩ enabu mirima mawakubainaibũ 2 Saul inũ hawẽ huni bakebu txibãkĩ Filisteu nawabũ Jônatas inũ Aminadabe inũ Malquisua detekĩ tenãtã 3 Saul besti bena txakayamakĩ atimas betxitã pia itxapa Saulkiri bishku bishku akaibũ ha dapi titiki ikai uĩ hawẽ datehairakĩ 4 hawẽ detenameti mabu bushunika hawẽ tsuma Saulũ yuikĩ: —Hawa Deus umabũ ea atxitã eaya kashekĩ ea bika tenematirubuki. Hau habuã ea tenãyamanũbũ miã mĩ matxatu txaipa kenuhaira sitã ea detekĩ tenãwẽ— aka hakia hawẽ tsuma hawẽ datekĩ haska yunua akamawẽ taea haska uĩtã Saul ibubis hawẽ matxatu txaipa maiki timatã haki beukaini tatxakash iki hawẽ matxatu debuwẽ txatxitã hawaira debuaya 5 haskatã Saul ma mawa hawẽ tsumapã uĩtã hari habiaskariai hawẽ matxatuwẽ Saul ishu keskai mawariaya 6 haskai Saul inũ hawẽ huni bake dabe inũ besti inũ hawẽ detenameti mabu bushũmis hawẽ tsuma inũ hawẽ mekenikabu habe bukubaũmisbu habias shabatiã mawariabũ 7 pashku napãpa uke betsauri hiweabu inũ Hene Jordão ukeri kesha betsa esteuri hiweabu hatunabu detenamenikabu pashai hunebainaibu hatu uĩtã Saul inũ hawẽ huni bake dabe inũ besti ma mawabu unãtã hatũ mae tibi Israelĩ enabu dasibi henebaini pashariabainaibũ hatũ mae tibi anu hikitã Filisteu nawabu hanu niti itã hiweyuabũ 8 hanua bestẽbaũ penamahaira Filisteu nawabũ Israelĩ enabu tenãshinabu hatũ mabu bianũ ika Filisteu nawabu bukubaũkĩ mati Gilboa anu Saul inũ hawẽ huni bake dabe inũ besti mawashina daka betxitã 9 hanushũ Saulũ bushka teshteshũ hawẽ detenameti mabu bikĩ mebĩtã itxawashũ hatũ maewã hirabi hanu Filisteu nawabu hiwebaunabu anu hau hatuki txanitanũbũ hatu yunuabu ha mae tibi anuabũ nĩkatã hau hatũ yushĩ kẽwãti hiwe anushũ kẽwanũbũ hatu yunutã 10 hanushũ Saulũ detenameti mabu bushũ hatũ yushĩ Astarote kẽwãti hiwe anu aruabu, Saulũ yura inũ hawẽ bakebũ yura bushũ mae betsa Bete-Seã kenekauana anu hatũ yura dũtãbu 11 haska Saul itxakawakĩ hawẽ yura dũtãshinabu mae Jabes-Gileade anu hiweabũ nĩkatã 12 Saulũ hatu merabewaniwẽ taeshũ huni mẽtsisipabũ habiaskas shinãtã yubakabirã meshu txai tanabirani hushũ Bete-Seã anu hikishũ Saulũ yura inũ hawẽ bakebũ yura dabe inũ besti buteshũ bibaĩkĩ hatũ mae Jabes anu txĩtũbaini bushũ Jabes anushũ hatũ yura kuatã 13 hanushũ hatũ shau besti itxawatã hi ewapa keyatapa namã Jabes anu hatũ shau maiwatã habianuari hatu shinaĩ samakei 7 dia inibukiaki. |
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
Wycliffe Bible Translators, Inc.