1 Samuel 28 - Kaxinawá Bíblia (BR)

Mae En-Dor anu aĩbu mukaya yukai Saul kanikiaki, na hãtxarã

³ Ma Samuel mawakẽ hawẽ nui Israelĩ enabu mae tibi anua kashanũ ika beshiã haya kashakubaini maĩtã ha mae Ramá anu hanua kaini anu maiwashinabũ yushibube hãtxakĩ haskashanai bebũkiri unanikabu inũ tsuara mawa hawẽ yushĩbe hãtxamisbu hawẽ maiwã pakea hirabi anua Saulũ hatu ha akĩ nitxĩmakẽ

⁴ Israelĩ enabu ana detekĩ hatu maemanũ ika Filisteu nawa detenamenikabu itxabirani beshũ Israelĩ enabu mae betsa Suném dapi hatũ tari hiwe pũtebaunabũ hatu nemanũ ika Israelĩ enabu detenamenikabu Saulũ hatu itxawashũ mae betsa Gilboa anu hatu iyua hanushũ hatũ tari hiwe pũtebaunabũ

⁵ hakia Filisteu nawa mirima hati tsuã tanatirubuma hatu uĩ Saul datei mesehairakĩ

⁶ hatu haska wapa? iwanã, Saulũ Senhor Deus yuka hakia Senhor Deusũ kemakĩ hawa yuiamahaira inũ, usha namaiwẽ yuiama inũ, Urim unãtiwẽ unãmamari inũ, hawẽ hãtxa yuishunikabuwẽ yuimamari

⁷ haska wa haskatima Saulũ hawẽ shanẽ ibu beshmasbu yunukĩ yuikĩ: —Hari kashũ ẽ yukai kanũ haniara aĩbu mawabũ yushĩbe hãtxamismẽkaĩ, ea benashũbaũtãkãwẽ— hatu wa hawẽ shanẽ ibu beshmasbũ Saul kemakĩ yuikĩ: —En-Dor anu mawabube hãtxamis aĩbu hiweaki— akabu

⁸ shanẽ ibukĩ tari hawẽrua sawemis pekatã tari betsa Saulũ sawetã ana shanẽ ibu keskama huni dabebe meshu merã ha aĩbu anu kashũ hikitã yuikĩ: —Huni betsa hawẽ kena ẽ mia yuia ma mawa hawẽ yushĩ hau hunũ mĩ muka kushipawẽ ea kenashũwẽ, mia pakakatsi ẽ mia yukairã— aka

⁹ aĩbũ kemakĩ yuikĩ: —Yushibubube hãtxakĩ haskashanai bebũkiri unanikabu inũ tsuara mawa hawẽ yushĩbe hãtxamisbu nukũ mai pakeanua Saulũ hatu putaima mĩ unaiĩ. Mĩ ea haska yuimaya ẽ mawatiruki. Haskakĩ mĩ ea haska yunuai?— aka

¹⁰ Saulũ yuikĩ: —Senhor Deusũ kenawẽ taeshũ ẽ mia yubaya hau tsuãra mia txakabuwayamashanũbũ Senhor Deusũ nĩkaya yubakĩ shabakabi ẽ mia hãtxa waii— aka

¹¹ aĩbũ kemakĩ: —Tsua ea tashnimashũwẽ, iwanã, mĩ ea aki ikai?— aka Saulũ yuikĩ: —Samuelĩ yushĩ ea kenashũwẽ— aka

¹² kenashuna Samuelĩ yushĩ tashnikiranai aĩbũ uĩ datehairakĩ: —Ewaa!— itã Saul yuikĩ: —Haskakĩ mĩ ea parãshumẽ? Habia mĩ miaki, Saulrã— aka

¹³ kemakĩ shanẽ ibu Saulũ yuikĩ: —Dateyamawe. Hawa mĩ uĩ ikimẽkaĩ, ea yuiwe— aka kemakĩ aĩbũ yuikĩ: —Yushĩ mai anua mapekekiranai ẽ uiaiĩ— aka

¹⁴ Saulũ yukakĩ: —Haskara tashnikiranai mĩ uiaĩ?— aka kemakĩ aĩbũ yuikĩ: —Huni mestebuhaira tariwẽ yabukukiranai ẽ uiaiĩ— aka nĩkatã Samuelki ikĩ unãtã haki datei dãti iki maiki beti ikẽ

¹⁵ Samuelĩ Saul yuikĩ: —Ea iwekĩ haskakĩ mĩ ea bika tenemabiranai?— aka kemakĩ Saulũ yuikĩ: —Natiã date paepakĩ ẽ mia aki ikaii. Filisteu nawa itxapabu beshũ nuku detenũ ikaibu ẽ hatu haska washũ nematirumaki. Deus ẽ yukabia Deusũ daki ma ea heneaki. Ea ana kemama inũ hawẽ hãtxa yuishunikabu anu inũ usha namaiwẽ ea kemamaki. Haskawẽ taeshũ ẽ hatu haska watiru mĩ ea yuinũ ẽ mia kenashuki— aka

¹⁶ kemakĩ Samuelĩ yuikĩ: —Ma miki sinatakĩ Senhor Deusũ mia ma henebiaimakẽ mĩ haskakĩ hamẽ ea yukai?

¹⁷ Senhor Deusũ mia haska washanai ma ea mia yuimaimaki. Mĩ shanẽ ibuai mia mebĩtã mĩ haibu mibe dayakũkaĩmis Davi shanẽ ibu washanai ẽ mia yuimaki.

¹⁸ Senhor Deusũ mia yunua mĩ akĩ pewashunama inũ, Amaleque nawabu mĩ detekĩ keyushanũ Senhor Deusũ mia yunubia mĩ haska wakĩ txibãma ikimaki. Haskawẽ taeshũ Senhor Deusũ mia ana hawa amamaki.

¹⁹ Hanua ha dikabi Israelĩ enabu Filisteu nawabu detenamenikabu Senhor Deusũ matu hatu anu yunua matu maemashãkanikiki. Mia inũ mĩ huni bakebube mawatã meshukiri mã eki nukuaii. Ha inũ, txanima Filisteu nawabu Senhor Deusũ merabewaya minabu Israelĩ enabu maemakĩ keyushãkanikiki— akĩ hãtxa watã nesekẽ

²⁰ shaba hirabi inũ meshu txaitanai Saulũ hawa piamahaira hushũ Samuelĩ hãtxa nĩkai datehairai shinanei tĩ ika dakakẽ

²¹ hanua Saul haskatã hawa yuiama daka ha aĩbũ haska watima ha dapi kashũ uĩkĩ yuikĩ: —Mĩ tsuma aĩbu mĩ ea yuka ẽ mia ma merabewaki. Haskawẽ taea mawatibiakẽ hawa dateama haska mĩ ea yunua ẽ mia ashũshuki.

²² Haskawẽ taeshũ ẽ hãtxa nĩkawe. Ana kushipatã katãshũ ẽ mia piti eskarabes pimai piwe— aka

²³ Saulũ pikatsi ikamabiakẽ hawẽ shanẽ ibu beshmasbu inũ aĩbũ pimanũ, iwanã, “Menã piriwe. Menã piriwe”, akawãbu atimas Saulũ hatu yuikĩ: —Peki. Ẽ piaii— itã unãshubira benikauã dakatiki tsauyukẽ

²⁴ habiatiãri ina awa bake shua hawẽ mae anu nia aĩbũ tesẽshũ hawẽ nami meshte meshte ashũ pitxãtã shekiwã trigo duru pepa bishũ piti sheni inũ sal inũ ũpash eskarabes katxa akĩ shasha watiuma kameĩtã tsuikĩ keyutã ha misi inũ nami hua beshũ hatu bebũ tsaũshuna Saul inũ hawẽ shanẽ ibu beshmasbũ pikĩ menetã benibaĩkĩ: “Ẽ ma kaii”, abaini habias meshu merã bunibukiaki.