1 Samuel 24 - Kaxinawá Bíblia (BR)

¹ Filisteu nawabu Saulũ hatu detekĩ txibãkubaĩtani niti itã txĩtũkirani hatube huai tsuãra banabimakĩ yuikĩ: “Davirã, hanu tsua hiweabuma En-Gedi anu kashiã hiweakiaki”, aka

² haska nĩkatã benimakĩ Israelĩ enabu hiwebaunabu detenamenikabu 3.000 hunibu Saulũ hatu kenashũ katutã mishki mati keyatapa anu Davi inũ hawẽ tsumabu benanũ ika hawẽ detenamenikabu iyui Saul kakũkaini

³ txashuwã hanu mekekĩ bitximisbu mishki kenekauna dapi mishki kini uke merã hawẽ tsumabu eskarabeya Davi hunekẽ Saul hawenabuyari habianuri kai puinũ ika ha mishki kini kesha anu hikikaĩ Saul tsautã puiaya

⁴ uĩtã Davĩ tsumabũ yuikĩ: —Ha miki sinatamis miã dukũ mĩ taewashanũ Senhor Deusũ mia yubaima ikis mĩ haska shinaĩ keska ariwe— iwanã, yunu yunu akabu Davi benitã unãshubira Saul anu kematã hune Saulũ sãpu tari kesha meshtebaini ana txishtekiri kakaĩ hunekẽ

⁵ hakia haska washuwẽ taea hawẽ huĩti nishmai keyushũ

⁶ Davĩ hawenabu hatu yuikĩ: —Ẽ shanẽ ibuhaira ẽ txakabuwai Senhor Deusũ ea nemashuki. Senhor Deusũ Saul katuniwẽ taea ha shanẽ ibuki— akĩ

⁷ hawẽ tsumabu niti akĩ hau Saul deteyamanũbũ Davĩ hatu nemakẽ kini anua Saul tashnikaini kaya

⁸ ha katxu Davi tashnikirã hui kushipawẽ Saul kenakĩ: —Ẽ shanẽ ibuũ, ẽ shanẽ ibuũ— aka nĩkatã nasukekauã Saulũ uiãyã haki mesei Davi dãti iki maiki beti itã ana benishũ

⁹ Saul yuikĩ: —Tsuãra ea mia txakabuwamanũ ishũ mĩ shanẽ ibu mia yuiabu mĩ hatu nĩkamismẽ?

¹⁰ Mishki kini anu ea dapi Senhor Deusũ mia yunushuki, mĩ unanunã. Senhor Deusũ ea haska wamabiaya mia mĩ ẽ shanẽ iburã, ẽ mia tenãkatsi ikama ẽ ibubis shinaiĩ: “Senhor Deusũ mĩ Saul mia katuniwẽ taea shanẽ ibu mĩ ikũkaĩmiski.” Senhor Deusũ mia katuniwẽ taeshũ mĩ hiweyunũ ẽ mia heneshuki— iwanã,

¹¹ Saulũ tari kesha meshteshu sanãshũ uĩmakĩ ana yuikĩ: —Uĩhairawe, ẽ shanẽ ibũ, mĩ sãpu tari kesha ẽ mia meshtẽshu ẽ mekẽnẽ ẽ tsumarã. Ẽ mia tenãti pe ishuki. Mĩ tari kesha besti ẽ mia meshtẽshuki. Ẽ mia haska besti washuwẽ taeshũ ẽ mia txakabuwakatsi ikama inũ ẽ mia atxitirubia emebi txakabukĩ ẽ mia hawa parãma mĩ unãriaii. Ẽ mikiri haskabiakẽ miã ea tenanũ, iwanã, benakĩ mĩ ea txibãkubaĩmiski.

¹² Ẽ mia haska washũwẽ taeshũ nuku dabe Senhor Deusũ besti hau nuku unãti wanũwẽ. Ẽ hawa miki sinatakaũ ẽ hashi ẽ hawa mikiri beniamahaira ikũkaĩshanaii, mĩ shanẽ ibukenã. Haskawẽ taeshũ hau Senhor Deusũ besti mia kupishanũwẽ.

¹³ Nukũ shenipabũ yuikĩ: “Txakabu kainã, huni txakabu anua tashnimiski”, ipaunibuwẽ taea haska shinãkĩ mĩ ẽ shanẽ ibuki sinatakĩ ẽ hawa miki hashi metaskama ikũkaĩshanaii.

¹⁴ Tsua benai Israelĩ enabu shanẽ ibuhaira tashnikirãshumẽ? Mĩ tsua txibãbirãshumẽ? Earã, ẽ kamã mawa keskamẽkaĩ? Ẽ masã keska daka, mĩ ea benakĩ txibãkĩ nati akairã?

¹⁵ Haskawẽ taeshũ nuku dabe shinãhairakĩ hau Senhor Deusũ nuku unãti wanũwẽ. Ẽ hawa txakabuma Senhor Deusũ unãkĩ hau mĩ ẽ shanẽ ibu ea nemashũkubainũwẽ— akĩ

¹⁶ Davi hãtxai meneaya Saulũ hui kushipawẽ yuikĩ: —Mĩ ea peirawawa! mĩ ẽ bake Davĩ ea haska hãtxa wairã— iwanã, kasha txakayamakĩ

¹⁷ Saulũ hãtsiri yuikĩ: —Ẽ mikiri txakabu shinãbiabirãkẽ ẽ shinã keska ekiri shinãma mĩ pewẽ mĩ ea binumaii.

¹⁸ Natiã haska mĩ ekiri shinãkĩ betxipaiai mĩ ea uĩmashuki. Senhor Deusũ mia anu ea yunubia mĩ hawa ea tenãma ishuki.

¹⁹ Txanimahaira tsuã taska haki sinataiki nukutã unanuma hiwemakĩ nitxĩtirumabiakẽ mĩ hawa ea meama ishuki. Mĩ ma ea atimapa binumashũwẽ taeshũ hau Senhor Deusũ mia pepawẽ manakukubaĩshanũwẽ.

²⁰ Txanima Israelĩ enabu mĩ shanẽ ibushanai hanu ẽ tapĩhairaii. Mĩ haska hatu mekekĩ yunuaya hawa txakabuama dasibi Israelĩ enabu beni kushipabaĩshãkanikiki. Haska natiã ẽ mikiri unãhairaii.

²¹ Mĩ shanẽ ibuaitianã, enabu dasibi ea hatu tenanãyamashãwẽ. Ha inũ, dasibi ẽ epã enabu ea hatu hakimawakĩ mĩ yamawayamashanũ Senhor Deusũ nuku nĩkaya ebe yubakawe— aka

²² haska wa Davĩ Saul yuba nĩkabaini Saul hawẽ hiwe hawẽruahairakiri txĩtũkainaya Davi inũ hawẽ tsumabu mishki mananã huneti kushipa anu buaibũ