1 Samuel 21 - Kaxinawá Bíblia (BR)

Davi Saul anua pashai txaihaira hunekainikiaki, na hãtxarã

¹ Mae betsa Nobe anu Davi kai hikiaya hawenabu Deusbe hãtxashunika Aimelequẽ Davi uĩ e iki teku ikaĩ haki nukui kashũ yukakĩ: —Haskai mimesti tsuã mia banawabirãma mĩ huai?— aka

² Davĩ parãkĩ yuikĩ: —Nukũ shanẽ ibuhairatũ ea yunukĩ: “Hawara pewatãwẽ”, ea akĩ yunushina hau tsuã unãyamanũ ea nitxiã hukĩ haratura ea yunua ẽ beai ẽ unãmaki. Hamẽ huni ẽ merabewanikaburã, ha mae anu hau eki nukui benũbũ hanu ẽ hatu yuibirãshinaki.

³ Haskawẽ taea ẽ huai hawa piti mĩ hayamẽkaĩ? Hatira misi mĩ haya 5 besti ea inãyuwe— aka

⁴ Deusbe hawenabu hãtxashunika Aimelequẽ Davi kemakĩ: —Dasibitũ ha misi pimisbu ẽ hayamaki. Deuski nukuti tari hiwe anu hawẽ kẽwãti misi meribi besti ẽ hayaki. Uatiã mibe beshiãbu ana hatũ aĩbe txutanameriabumakẽ hau pinũbũ ẽ mia inãtiruki— aka

⁵ Davi besu kushitã kemakĩ yuiriakĩ: —Hanu nũ detenamei kaĩkainaitiã hawa txutanameama nũ kamiski. Nũ haska ibiamis natiã txai hawara pewai nũ huairã, ẽ hunibuberã, nũ hawa txakabumaki. Nũ kaĩkirãshina haskawẽ taea nũ pehairaki. Haskakẽ ha misirã, mĩ nuku inãtiruki, dateamarã— aka

⁶ misi betsa hayamakẽ Deuski nukuti tari hiwe dĩtu meribi tapu anua Senhor Deusũ misi meribi watã inãmisbu dama bena washu shanabiri ikai mãtxĩkatsi ha misi dama maewakĩ bitãshu Aimelequẽ Davi inãyã

⁷ habiatiãri Saulũ txashuwã mekenikabũ haskarashina shanẽ ibu Edom nawa hawẽ kena Doegue Senhor Deuski nukuti tari anu nishũ dasibi uĩkĩ nĩkaya

⁸ Davĩ Aimeleque ana yukakĩ: —Mĩ hawa hayamẽ, hashi kasmai matxatu txaipa kenuhairarã? Ẽ shanẽ ibũ hawaira ea nitxiã hawairakirãkĩ ẽ matxatu txaipa kenuhaira inũ ẽ detenameti mabu betsa ẽ beama hushiãkirã— aka

⁹ Aimelequẽ kemakĩ yuikĩ: —Aa, ẽ hayaki, napãpa Carvalho anushũ mĩ tenãkĩ maemaima Filisteu nawa Goliasĩ matxatu txaipa kenuhaira bestirã. Nukunabu Deusbe hãtxashũti tari pũtea petxiuri tari keshtupawẽ yabutã ẽ aruima dakaki. Mĩ betxipaiai mĩ butiruki. Detenameti betsa ẽ hayamaki— aka Davĩ kemakĩ yuikĩ: —Pehairaki, ana betsa hayama habia bestikenã. Habia ea inãwẽ— aka Aimelequẽ bitãshũ Davi inã,

¹⁰ habias shabatiãri Saul anua kai ana pashai hunekũkaini Filisteu nawabũ maewã Gate anu hatũ shanẽ ibuhaira Aquis anu hikitã uĩ ka nikẽ

¹¹ hawẽ shanẽ ibu beshmasbũ betxitã yuikĩ: —Narã, Daviki, nukũ shanẽ ibuhaira Saulũ dayarurã. Nawakĩ kãtabaĩkĩ yuikĩ: “Saulũ 1.000 hunibu tenãshinaki. Hanushũ Davĩ 10.000 hunibu tenãshinakiaki”, Israelĩ enabũ aĩbuaibũ ikĩ kẽwaĩmabukiaki— akeakeabu

^12-13 txanimahaira haska waima Davikiri hãtxabaunaibu Davĩ nĩkai Gate anua Filisteu nawa shanẽ ibu Aquisĩ nuku detea ika haki datehairai hatu bebunua haskaismabia dateabu hawẽ shinã benui dushku keskai hikiti shui beputi betsa betsapa anu hawẽ mẽtsisĩ besha besha akĩ kenekubauni kemu bishtũyaĩ hawẽ keshniwẽ bishtũ bishku bishku abaunaya

¹⁴ haskai uĩkĩ hawẽ shanẽ ibu beshmasbu Aquisĩ yuikĩ: —Ha huni dushkurã, mã uiaĩ haskakĩ mã eanu iweshumẽ?

¹⁵ Ẽ hiwe anu na huni dushku ikũkainai ẽ uinũ mã iweamẽ? Nukunaburã, nũ dushku hayamamẽ?— hatu watã Davi tashnima