1 Samuel 20 - Kaxinawá Bíblia (BR)

Jônatasã Davi merabewanikiaki, na hãtxarã

¹ Saul kakẽ Ramá dapi Naiote anua Davi haki datei kaĩkaini Jônatas hiwea anu hikishũ yukakĩ: —Ẽ hawa ana haska washiãmẽ? Ẽ hawa kaneshinamẽ? Mĩ iburã, hakiri ẽ hawa txakabuhaira washinamẽ? haskawẽ taeshũ benakĩ ea tenanũ, ika ikairã— aka

² kemakĩ Jônatasã yuikĩ: —Deusũ haska betxipaiamaki. Mĩ mawama ishanaii. Shinãkĩ ea nĩkawe. Ea hawa yuiama eamaki hawa betsa betsapa ẽ epã aismaki. Mia tenanũ ika haskakĩ ea hũtaĩmẽkaĩ? Haskatirumahairaki— aka

³ hakia nĩkamas Davĩ ana yuikĩ: —Mĩ ea betxipaihairai mĩ epã unãkĩ mia nuimakatsi ikama ea tenanũ ishũ mia haska yuikatsi ikamaki. Senhor Deus inũ miã mĩ ea nĩkaya ma ẽ debu kema txanima shabakabi ẽ matu yuiaii— aka

⁴ Jônatasã yuikĩ: —Mĩ haskarara betxipaiayarã, eã ẽ mia ashũtiruki— aka

⁵ Davĩ kemakĩ yuikĩ: —Eska ẽ shinaiĩ. Meshukiri ushe bena tashniaitiã besikĩ mĩ epa shanẽ ibuhairabe tsaushũ ẽ pimiski. Hanu habetã nũ piaitiã ẽ hawẽ dateaii. Ua meshukiri bari kariama bai anu ẽ huneyukatsis ikai ea nemayamawe.

⁶ Mĩ habetã piaya mĩ epa ea yuka ikayarã, miã eska ea yuishũshãwẽ: “Hawẽ mae Belém anu hawaira kaĩkĩ ea ea atã kashiãki. Bari tibi Senhor Deus benimawakĩ txashuwã sheni menushũkĩ keyushũ hawẽ kẽwãti nami hawenabu itxashũ bari tibi pimisbubetã pi kashiãkiaki”, mĩ wa

⁷ mia kemakĩ: “Peki”, mia wayarã, haskayarã, unanuma ẽ hiweshanaii. Hamẽ haskama eki sinatakĩ ea txakabuwashanai mĩ unãshanaii.

⁸ Haska ekiri hãtxashãwẽ. Ẽ ma mĩ dayarukirã, Senhor Deusũ nuku nĩkaya mibe haibunamei nũ yubakanameimaki. Haskawẽ taeshũ ẽ kaneshĩkẽ mĩ epa anu ea iyuama miã ea tenãriyushãwẽ— aka

⁹ hakia Jônatasã kemakĩ yuikĩ: —Haska tibi shinãyamawe. Ẽ epa ẽ nĩkayushanaii. Mia txakabuwakatsis iki mikiri hãtxai nĩkatã ẽ mia banabimashanaii— aka

¹⁰ nĩkatã Davĩ yukakĩ: —Mĩ epã ekiri txakabu shinãyã tsuã ea banabimatirumẽ? mĩ epã mia haska yuiayarã— aka

¹¹ Jônatasã kemakĩ yuikĩ: —Ua benãta bai anu kanãwẽ— abaini ha dabe kashũ

¹² harishũ Jônatasã ana yuikĩ: —Israelĩ enabu mekenika Senhor Deusbe ẽ yubakaii. Meshukiri inũ ua shaba betsatiãri habias baritiã haska ẽ epã shinaĩ tapĩ ẽ habe hãtxashanaii. Ẽ epã mikiri shinã pewaya ẽ mia banabimashanaii.

¹³ Hakia ẽ epã mikiri shinã txakaya ẽ mia banabimama hau Senhor Deusũ ea kupihairakubaĩshanũwẽ. Hamẽ haskama ẽ mia banabimakĩ merabewaya unanuma mĩ pashashanaii. Haska Senhor Deusũ ẽ epa merabewakubainima keska wakĩ hau mia merabewariakubaĩshanũwẽ.

¹⁴ Na eskatiã hiweyushũ ẽ mia merabewai keska habias shinãwẽ haska Senhor Deusũ mia duawakubaĩmis keska ẽ mawariama habiaskari eari duawakubaĩshãwẽ. Hakia ẽ ma mawakẽ

^15-17 miki sinataibu Senhor Deusũ hatu unãti washũ kupi keyubiakẽ ea hakimama enaburi duawakubaĩshãwẽ— aka haskai ha dabe betxipainamei haibunamenibuwẽ taea ha dabe ana yubakanibukiaki.

¹⁸ Jônatasã Davi ana yuikĩ: —Meshukiri ushe benakẽ nũ besiaya hanu mĩ tsaumis anu mĩ hayamakẽ mikiri yuka ishãkanikiki.

¹⁹ Shaba dabe inũ besti kaya mĩ hayamakẽ hanu ẽ epã mia benahairashanikiki, pepawẽ kasmai, txakabu shinãkinã. Haskakẽ ha mishki tũku mania dapi uatiã mĩ hanu huneimanu ana habianuri hunetã ea manatãshãwẽ.

²⁰ Hari kashũ ha mishki tũku mania anuri mĩ hunea anu hanu tsua hayama keska anu 3 pia ẽ bishku bishku ashanaii.

²¹ Haska watã ẽ tsuma yunukĩ: “Ẽ pia ea benashũtãwẽ”, ẽ aka kaya ana yunukĩ: “Ha txaima pia mapuaki. Ea beshũwẽ”, akĩ ẽ haska waya ẽ epã mia hawa wamawẽ taea unanuma mĩ tashnikirãtiruki, Senhor Deusũ ea nĩkaya ẽ mia yubairã.

²² Hakia ẽ tsuma yunukĩ: “Turiri nãta mapuaki. Hari kashũ ea bishũtãwẽ”, akĩ ẽ haska yunuaya mĩ pashatanũ Senhor Deusũ mia haska betxipaiaya hawaira pasharitãshãwẽ.

²³ Na haska nũ yubakashu Senhor Deusũ nuku nĩkatã shinãpakeshanikiki— aka

^24-25 Davi hune kaĩ bai anu hunei kakẽ ushe benatiã besikĩ pinũ ika hanu shanẽ ibu tsaushũ pi beyamis anu keneki tabia tapu anu Saul tsaua ha tapu bebũ Jônatas tsaua hanua Saul dapi Abner tsaua betsa anu Davi hanu tsaushũ pimis shakakẽ

²⁶ Davikiri Saulũ hawa yuiama hakiri shinã bestikĩ: “Hawara Deusũ nemani nũ metiruma meshina periama hutirumamẽkaĩ”, ishiã

²⁷ besikĩ hatubetã pikubaini ha katxu shabatiã ana Davi ana hayamakẽ hawẽ bake Jônatas Saulũ yukakĩ: —Nukubetã besikĩ pi haskai Jessé bake meshukiri huama ishiã inũ ikis ana huamamẽ?— aka

²⁸ Jônatasã kemakĩ yuikĩ: —Davirã, hawaira kaĩkatsis ikĩ ea yuibaĩshinaki, hawẽ mae Belémkiri kakinã.

²⁹ Hawẽ mae anushũ hawenabũ Senhor Deus kẽwaĩ besiaibũ hawẽ betsa iyuatũ kenakĩ hau hunũwẽ ashiãwẽ taea: “Enabu hawairakaĩ ẽ hatu uĩyui kai ea nemayamawe”, ea akĩ yukaiwẽ taeshũ ẽ hari yunua kashiãki. Haskawẽ taea mĩ hawẽ shanẽ ibũ tapu anushũ mibetã pi ana huyuamaki— aka

³⁰ haskai Saulũ nĩkatã Jônataski sinatahairakĩ yuikĩ: —Mĩ ewa txakabuhairatũ bakerã, mĩ miaki. Jessé bake mĩ haibuhairawẽ taea mia inũ mĩ ewaki daketiruburã, eã ẽ unãma dabanẽ mĩ shinaĩ?

³¹ Jessé bake mĩ yaushiairã, ha hiwekenã, miãraki mĩ ẽ shanẽ ibuai ea katxu mĩ ea mebĩ hikitirumahairaki. Hau mawayunũ ha benabaũtanũbũ hatu yunuwe. Betxitã neri ea ishũtãwẽ, ẽ tenainã— aka

³² Jônatasã kemakĩ hawẽ epa yuikĩ: —Haskarawẽ taea mawatirumẽ? Hawa txakabuwashinamẽ?— aka

³³ Saulũ haskai nĩkatã hawẽ bake Jônatas txatxinũ, iwanã, hawẽ hashi sanãtã putakĩ haska wai uĩ: “Txanima ẽ eparã, Daviki sinatahairakĩ tenãkatsis ikikiki. Haskakĩ ea ma unãmaikiki”, iki

³⁴ sinatahairai tapu anua ana habetã pikatsi ikama benikaini hawẽ epã Davikiri hãtxa txakabukĩ kũyã akĩ bika tenema hawẽ nuihairai ushe bena nishiã kẽwaĩ besiaibu shaba ha katxu Jônatasã ana hatubetã piama henebaina

³⁵ ushashini penaya habiatiãri Davi yubashina keskai hawẽ tsuma berunãbe Jônatas bai anu kashũ

³⁶ berunã yunukĩ: —Na pia ẽ bishkuai kushikaĩ benakĩ hawaira ea bishũtãwẽ— aka kushikainai bebũ bishku bishku akĩ hawẽ tsuma bebũ txaihaira ti tiki ashuã

³⁷ hanu pia ti ikanu niti itanaya hui kushipahairawẽ Jônatasã yuikĩ: —Ha mĩ niti ishu ana turiri pia betsa niaki— akĩ

³⁸ ana hui kushipahairawẽ yuikĩ: —Menã niti ikama kushikaĩ bitãwẽ— aka bitãkĩ hawẽ tsumapã hawẽ shanẽ ibu anu pia beshuãyã

³⁹ haska wakĩ berunã amai unãma hakia haska unãkinã, Jônatas inũ Davĩ besti unaĩbũ

⁴⁰ hanushũ Jônatasã hawẽ kanũ inũ hawẽ pia inũ hawẽ detenameti hau bushũtanũ hawẽ tsuma inãkĩ yunukĩ: —Nukũ hiwe anu ea bushũtãwẽ— aka

⁴¹ hawẽ tsumapã bushuĩ ma kakẽ mishki ture mãtxĩkĩ maspuanibu petxiuria Davi tashnikirã: “Mĩ haska wakĩ ea pehaira washuki”, aki Jônatas bebũ Davi dãti iki dabe inũ bestiki maiki beti beti itã benikauã nia hatũ beya txibaĩ habe tãtsu irabetã habe kasha txakayamai Davi hui teris iki teshatã

⁴² atimas neseaya Jônatasã yuikĩ: —Unanuma kai peritãwẽ. Nũ haibunamekũkaĩshanũ Senhor Deusbe nũ yubakaimawẽ taeshũ mia inũ ea merabewakĩ nukunabu pakubainaibu enabu inũ minabu Senhor Deusũ hau hatu merabewakubaĩshanũwẽ, nũ yubakaimawenã. Haskawẽ taeshũ ekiri pe shinãkubaini katãwẽ— aka Davi bai tanabaini kaya Jônatas hawẽ maewã anu txĩtũkiranikiaki.