1 Samuel 19 - Kaxinawá Bíblia (BR)

Saulũ Davi tenãpaibia binupaunikiaki, na hãtxarã

¹ Hau Davi tenanũbũ hawẽ bake Jônatas inũ hawẽ shanẽ ibu beshmasbu Saulũ hatu yunua hakia Jônatasã Davi betxipaihairaiwẽ taea

² Davi anu kashũ hawẽ epã hãtxa banabimakĩ yuikĩ: —Ẽ epã mia tenãkatsis ikikiki. Haskakẽ meshukiri penama bai anu hune ka hari iruyutãshãwẽ.

³ Hari mĩ ka anu ẽ epabe ẽ kashanaii. Haskara mikiri ea yuimẽkaĩ. Tapĩtã mikiri ẽ habe hãtxashanaii. Ẽ epa ma kakẽ haska ea yuishu ẽ mia yuishanaii— abaini kaya

⁴ ana meshukiri penama hawẽ epabe bai anu kashũ Davi merabewakĩ daewashũkatsi ikĩ Jônatasã hawẽ epa Saul yuikĩ: —Shanẽ ibuũ, mĩ tsuma Davinã, hawa txakabuwakĩ mia txakabuwama haki sinatakĩ meyamawe, pe besti mia ashũmiskirã.

⁵ Eskawẽ taeshũ ea nĩkawe. Filisteu nawa Golias detenamenika mesebiakẽ Davi dateyamakaĩ Senhor Deusũ Davi merabewaya Filisteu nawa nuku putamaimarã, uĩtã ibubis mĩ benimaimaki. Senhor Deusũ hãtxa danãkĩ hawa txakabuwaismabiakẽ hawawẽ dabanã Davi mĩ tenãkatsis ikai?— aka

⁶ Jônatasã hãtxa nĩkakĩ shinãtã atimas kemakĩ yuikĩ: —Aa, txanimaki. Senhor Deusũ nuku nĩkaya ẽ mibe yubakaii. Davi ẽ ana tenãmaki. Hau hiwepakeshanũwẽ— abaini kakẽ

⁷ hanushũ Jônatasã Davi kenashũ haska ibube hãtxashu banabimakĩ yuikĩ daewashũ Saul anu Davi iyua haska washũkubiranima keska wakĩ Davĩ ana Saul merabewakubainaya

⁸ ana hatube detenamenũ ika Filisteu nawabu Israelĩ enabu maiwã pakea anu ana bei hikiabu hatu nemakĩ putanũ ika hawẽ 1.000 detenamenikabuya Davi ka Filisteu nawabube detenamekĩ hatu maemakĩ mirima tenaĩbuwẽ taea Filisteu nawabu habu hiwenũ ika datei pashai keyuabũ

⁹ meshu betsatiã Deusũ yunua yushĩ txakabu Saulki ana hikia Saul dushku iki itsai bika teneaya shusha wakĩ beshtenũ, iwanã, harpa Davĩ mimawashunaya hawẽ hiwe anu hashi tsuma Saul tsaushũ

¹⁰ Davi txatxikĩ keneki tsãpa wanũ, iwanã, hawẽ hashi Saulũ hawaira haki puta hakia Davĩ binui dabeketanai kene besti txatxia nikẽ haska wakĩ datea uĩbaini habias meshu merã hawẽ hiwe anua Davi kaĩkaini pashakẽ

¹¹ hawẽ hiwe anu hau hawaira kesheshũ uinũbũ hatu mekemakĩ penama tashnikainai hau tenãshanũbũ hawẽ tsumabu betsa betsapa Saulũ hatu yunua bushũ kesheaibũ hakia hawẽ aĩ Micalĩ Davi yusĩkĩ yuikĩ: —Ikis pashariwe. Nenua mĩ pashamarã, meshukiri mĩ mawatiruki— atã

¹² uĩti shui anu dispi kushipawẽ Micalĩ Davi habias meshutiã butea pashakẽ

¹³ dami yura itsa beshũ Davĩ ushati anu datãshũ dami bushkaki cabra dani tima maimashũ dakukutiwẽ Micalĩ yabukẽ

¹⁴ hau Davi hawairabaĩ atxitanũbũ Saulũ hatu yunua hawẽ hiwe anu bua yuka ikaibũ hakia Micalĩ hatu yuikĩ: —Hawẽ ushati anu isĩ teneikiki— hatu wa txĩtũbaĩ Saul yuiabu,

¹⁵ hau Davi hawẽ ushati anu ana habi benatanũbũ Saulũ hatu yunukĩ: —Hawẽ ushati anu dakabiakẽ kaĩmatã ea anu iwetãkãwẽ, hau nenushũ tenanũbunã— hatu wa

¹⁶ Saulũ tsumabu ana bushũ Davĩ hiwe anu hikibaĩ hawẽ ushati anu dami yura itsa cabra dami tima maitiya betxitã hawẽ bake Mical besti atxitã iyushũ haska bestikiri uĩkãshu yuiabu

¹⁷ Saulũ Mical yuikĩ: —Ẽ haki sinatai hani hunekĩ nitxĩshũ haska wakĩ mĩ ea haskawẽ parãshumẽ?— aka parãkĩ kemakĩ Micalĩ yuikĩ: —Pashai ẽ nema ea yuikĩ: “Ẽ kai ea nemayamawe, ẽ mia tenãtirukirã”, ea watã kashiãki— aka

¹⁸ haskakaini Davi hunekaini Ramá anu Samuel uĩ kashĩshũ haska Saulũ ashiã Samuel yui keyushina hanua habe maei mae betsa Naiote anu Davi Samuelbe hiwei kakẽ

¹⁹ hari hiwei bushiãbu Saul banabimabu

²⁰ ana Davi hau haria atxitanũbũ hawẽ tsumabu Saulũ ana hatu yunua bui kemashũ Deusũ hãtxa yuishunikabu Samuelĩ hatu imaya nishi paewẽ paeã keska benimakĩ Deus kẽwãkubiranaibu uiãbũ hawaira Deusũ Yushinĩ Saulũ tsumabu haburi hatu betsa wa Deusũ hãtxa yuishunikariai nishi paewẽ paeã keska benimakĩ hatubetã Deus kẽwaĩbũ Davi tsuã hawa wama

²¹ hatu yunua bushiãbu haskaibũ Saulũ nĩkatã hawẽ tsuma betsabũri Davi hau atxinũbũ ana hatu yunua buabu Deusũ Yushinĩ hatu habiaskari wai nĩkatã hawẽ tsuma betsabu Saulũ ana ha katxu hatu yunua buaibu Deusũ Yushinĩ atxishũ habiaskas hatu wakubainaya

²² hanua ana nĩkatã ibubis Ramá anu Saul kai Seco anushũ hanu ũpash aruti ewapa anu hikishũ hatu yukakĩ: —Samuel inũ Davirã, hanimẽ?— hatu wa, itxapabũ kemakĩ yuikĩ: —Ramá dapi Naiote anu hiweabuki— akeakeabu

²³ hariri kai bai tanabaini namakis shũ Deusũ yushinĩ Saul betsa wakĩ kushipa wa ha dikabi paeã keska benimakĩ Deus kẽwãkubaini Ramá dapi Naiote anu Saul hikitã

²⁴ hanushũ hawẽ tari pekakĩ keyua Samuel bebũshũ shaba bestitxai inũ meshu bestitxai kaya nishi paewẽ paeã keska ikũkaĩkĩ Deus kẽwãkubaini penama hawẽ shinã haki dasi keyua dakehairai hawa yuiama Saul hawẽ hiwe anu txĩtũkiranikiaki. Haskakiri hakiri yuipauniburã: “Saulrã, habiari Deusũ hãtxa yuishunikari ikimẽkaĩ?” iake iakepaunibuki.