1 Samuel 18 - Kaxinawá Bíblia (BR)

Jônatas inũ Davi haibunamehairanibukiaki, na hãtxarã

¹ Saulbe Davi hãtxai meneaya hanua hawẽ bake Jônatas habe haibunamenikiaki, Davi betxipaihairai ibubis betxipaiai keska wakinã.

² Hanushũ hau hawẽ epã hiwe anu ana txĩtũkaĩyamanũ habianua habe hiwei hau dayashũkũkainũ Saulũ Davi nematã yununikiaki.

³ Hanua Jônatas inũ Davi betxipainamerabei putanametimai haibunaĩ yubakarabenibukiaki, Jônatasã hawẽ yura betxipaiai keska wakĩ Davikiri shinãkinã.

⁴ Ha dikabi Jônatasã Davi inãkĩ hawẽ bemakia tari inũ hawẽ sãpu tima tari pekashũ sawemakĩ hawẽ matxatu txaipa kenuhaira inũ hawẽ kanũ pepa inũ hawẽ nanesheketi pepa inã keyunikiaki.

⁵ Haska Saulũ Davi yunua ashũkĩ Davĩ hawẽ unanepa uĩmakubainaiwẽ taeshũ detenamenikabũ shanẽ ibu beshmas Saulũ Davi washĩkẽ hanushũ Saulũ shanẽ ibu beshmasbu inũ hawẽ detenamenikabu dasibibũ Davi betxipaikubainibukiaki.

Dasibibũ Davi betxipaiaibũ Saulũ danaĩ haki sinatakũkainikiaki, na hãtxarã

⁶ Filisteu nawa Golias Davĩ tenãshĩkẽ Saul inũ hawẽ detenamenikabuya txĩtũbiranaibũ shanẽ ibuhaira Saul huai haki nukunũ ika benimahairabirani Israelĩ enabũ mae tibi anua aĩbuaibu hatũ mimawatiya kaĩbirãkĩ xaxa ati inũ tsarĩ tsarĩ atiya nawai kãtakubirani Saulki nukui

⁷ habias kãtati kãtakĩ heneama yuikĩ: “Saulũ 1.000 hunibu tenãshinaki. Hanushũ Davĩ 10.000 hunibu tenãshinaki”, iki heneabumakẽ

⁸ haskaibu Saulũ nĩkai betxipaiama sinatahairakĩ yuikĩ: —Davĩ 10.000 tenãshina yuikika. Hamẽ eanã, 1.000 besti ẽ tenãshinamẽ, haskakiri mã nuku kẽwainã. Mã daka hawaira matũ shanẽ ibu wai ikai?— ikĩ

⁹ ha Davi haska waibu nĩkai Saulũ hakiri shinã txakakĩ danã taewabainaya

¹⁰ haska washina shaba betsatiã Deusũ yunua yushĩ txakabũ Saulki hikitã hawẽ hiwe hawẽrua anua Saul dushku itsai bika teneaya shushawakĩ mimawashũmis keska wakĩ harpa Davĩ mawashunaya Saulũ hashi tsumashũ

¹¹ Davi txatxikĩ keneyabi tsãpa wanũ, iwanã, hawẽ hashi Saulũ hakiri puta Davĩ hashi binui dabekeaya dabeki txatxipaikĩ kanea

¹² ana Senhor Deusũ Saul merabewama Davi merabewaiwẽ taea Daviki Saul datekũkaĩkĩ

¹³ ana habe hiwemama nitxĩkĩ hau hatũ detenamenikabu shuku betsa hau yununũ comandante wakĩ Davi yunushina hatuki sinataibube detenamemakĩ Davĩ hatu iyutãtãkĩ iwebirãbiranaya

¹⁴ Senhor Deusũ Davi merabewa hatu detenamemakĩ hatu yunukĩ pewakubainai

¹⁵ Davĩ hatu haska wamai Saulũ hatu uĩ ana hawẽ datehairaya

¹⁶ hakia hatube detenamenũ ika butã butanaibũ Davĩ hatu pe yunukubainaiwẽ taeshũ Israelĩ enabu inũ Judá enabu dasibibũ Davi betxipaiaibũ

¹⁷ shaba betsatiã Saulũ ibubis shinãkĩ: —Ibubis ẽ Davi tenãtirumaki. Hakia Filisteu nawabũ ea ashũtirubuki— iwanã, Davi kena hua Saulũ yuikĩ: —Tsuki dateama mẽtsisipai Senhor Deus mĩ detenameshũkũkainaiwẽ taeshũ ẽ aĩbu bake iyua Merabe ẽ mia bimashanaii— aka

¹⁸ hakia Davĩ kemakĩ Saul yuikĩ: —Shanẽ ibuhairatũ dais ẽ itirumaki. Earã, ẽ hawaumaki. Ha inũ, Israelĩ enabu anua enaburi hawabumaki. Haskabiakẽ mĩ bake mĩ ea bimakatsi ikai ẽ bitiruki— aka

¹⁹ hakia Davi Merabe aĩwãmanũ, iwanã, haska yubashina ma kemaya Davi mebĩtã huni betsa Adriel mae Meolá anua Saulũ hawẽ aĩbu bake Merabe inãkĩ bimakẽ

²⁰ hakia hawẽ aĩbu bake betsa Mical Davibe betxipainameai tsuãra uĩtã Saul banabimabu nĩkai benimahairakĩ

²¹ ana shinãkĩ: “Hatube detenameaya Filisteu nawabũ Davi harishũ tenãshãkanikiki. Haskakẽ ẽ bake Mical bimatã yunu txakamakĩ Filisteu nawabu ẽ hatu tenãmatirumẽkaĩ”, itã Davi ana kenatã yuikĩ: —Daviĩ, eskatianã, ẽ mia dais washanaii, ẽ aĩbu bake betsa mia bimakinã— atã

²² hanushũ hawẽ tsumabu Saulũ yunukĩ hatu yuikĩ: —Tsuã nĩkama Davi bestibe hãtxakĩ ea eska yuishũkãwẽ: “Nukũ shanẽ ibuhairatũ mia betxipaihairaikiki. Ha inũ, hawẽ dayaru dasibibunã, nũ mikiri pe shinãkubaĩmiski. Shanẽ ibuhairatũ dais ikũkaĩshãwẽ, hawẽ bake biãtanã”, ea washũtãkãwẽ— hatu wa

²³ Saulũ dayarubu Davi anu bushũ habias hãtxa yuiabu hakia Davĩ hatu kemakĩ: —Shanẽ ibuhairatũ dais ikũkaini bikama dabanẽ mã shinaĩ? Haskai nuitapabiai ẽ shanẽ ibũ dais itirumẽ? Ẽ mitanumaki— hatu wa

²⁴ hanua Saul anu ana bushũ Davĩ hãtxa banabimakĩ yuiabu

²⁵ hau Filisteu nawabũ Davi tenãshanũbũ Saulũ kemakĩ hatu ana yuikĩ: —“Nukũ beya txibãkĩ aĩbu huni betsã bikatsirã, hatũ epa bebũkiri mabu ewapa bishũmisbuki. Hamẽ eanã, ẽ shanẽ ibũ yunuairã, haska ẽ shinãmaki. Hakia nukuki sinatamisbu kupikĩ Filisteu nawabu tenãtã 100 hina kubitxi meshtebirã ha dukũ ea beshũtiruki. Haska besti hakiri ẽ shinaiĩ”, haska Davi ea yuishũtãkãwẽ— hatu wa

²⁶ Davi anu ana bushũ Saulũ hãtxa yuiabu Davĩ nĩkatã: —Haskakenã, peki. Shanẽ ibũ ea dais wakatsi haska betxipaikĩ yunuairã, bikamaki— ishũ hanu Saulũ yubashina kemariamabiakẽ

²⁷ Davi hawẽ detenamenikabube kashũ hatubetã 200 Filisteu nawabu detekĩ tenãshũ hatũ hina kubitxi meshtetã beshũ shanẽ ibuhairatũ daisnũ ikirã ha 200 hina kubitxi Davĩ Saul inãtushiaiwẽ taeshũ hawẽ bake Mical Saulũ Davi inãnikiaki, aĩwãmakinã.

²⁸ Senhor Deusũ Davi merabewakubainaya hawẽ aĩbu bake Micalĩ Davi betxipaihairai uĩkĩ unaĩ

²⁹ ana Daviki datekũkaĩshina binumai ana haki Saul datekĩ danaĩ haki sinatai henetiruma inikiaki.

³⁰ Haska inũ, betsarã, Filisteu nawa shanẽ ibubũ Israelĩ enabu detenũ ika beaibu tibi Saulũ detenamenika shukua betsabu hatubetã hatu detekĩ maemabiaibũ Davĩ hawenabu binumakĩ hatu itxapa deteshũkubainikiaki, comandante betsabu binukinã. Haskaiwẽ taeshũ Davikiri dasibibũ nĩkabauni betxipaihairai hakiri pe shinãkubainibukiaki.