1 Samuel 17 - Kaxinawá Bíblia (BR)

Filisteu nawa Golias Davĩ tenanikiaki, na hãtxarã

¹ Israelĩ enabu detenamenikabube detenamenũ ika Filisteu nawa shanẽ ibubũ hawẽ detenamenikabu hatu itxawabirã Judá enabũ maiwã pakea anu mae betsa Socó inũ Azeca namakis Damim mae anu hatũ tari hiwe pũtebaunabũ

² hanua haskariai Filisteu nawabube detenamenũ ika Saulũ hawenabu itxawariabirã pashku Carvalho napãpa anushũ hawẽ detenamenikabubetã hatu detenũ ishũ pewakĩ hatũ tari hiwe pũteriatã hanushũ Filisteu nawabube detenameti mabu pewaibũ

³ hanua mati mananã betsauri Filisteu nawabu mapubaunabu inũ ukeri mati mananã betsa anuri Israelĩ enabu mapuriabaunabu ha pashku napaku namakiswẽ taea pashka uinanaĩbũ

⁴ hanua Filisteu nawa detenamenika betsa hawẽ kena Golias hawẽ yura keyatapahaira 3 metro haya hawẽ maewã Gate anua hua hawenabu nashui ika nikẽ

⁵ tsuã hau deteyamanũ hawẽ bushka hunekĩ maiti bronze mane sawea inũ bronze mane tari hawẽ shutxi anu inũ petxiuri hunekĩ saweria hawẽ shãkama 55 quilorã,

⁶ hawẽ kishi inũ hawẽ bikerã anu huneriakĩ bronze mane saweria ha putakĩ hatu txatxiti hashi bronze maneri inũ,

⁷ hawẽ hi kushipa txatxiti hashi ewapa nũkupa hawẽ debu ferro mane kenuhaira hawẽ shãkama 6 quilo ia inikiaki. Hawẽ merabewanikã hawẽ detenameti mabu bushũmis bebukainaya

⁸ Golias kaĩkirã nishũ hui kushipawẽ Israelĩ enabu hatu yuikĩ: “Haskai detenamenũ ika bebiashina mã hamẽ mapuabumẽ? Earã, ẽ Filisteu nawaki. Hakia maturã, mã Saulũ tsumabuki. Butukirã tsua ebe detenameyuimẽkaĩ, huni betsa matu anua katutã ea anu yunukãwẽ, hau ebe detenameyununã.

⁹ Matunabu betsa detename unaĩtũ ea maemaya nuku dasibibu nũ matũ dayaru ikũkaĩshanaii. Hamẽ eã ẽ ha huni maemakẽ matu dasibiburi mã nukũ dayaru ikũkaĩtiruki.

¹⁰ Ikis Israelĩ enabu detenamenikabu tibi yuikĩ ẽ matu shinãmaii. Hau ebe detenameyunũ bestitxai yunukãwẽ”, hatu wa

¹¹ haskai Saul inũ Israelĩ enabũ Filisteu nawa hãtxai nĩkatã ana hawa benimama punu nukatã haki datei keyuaibũ

^12-14 Saul shanẽ ibuyukẽ Efrateu nawa Belém anua huni betsa Jessé anibuhaira 8 huni bakeya hawẽ bake mashku Davirã, Jessé 3 huni bake iyua, Eliabe inũ Aminadabe inũ Samá Filisteu nawabube detenamenũ ika Saulbe ma bushiãbu

¹⁵ hanua uatiã Saulũ Davi kena hubiashina ana hawẽ epã txashuwã meketanũ ika Saul anua tashnikaini Belém anu txĩtũkaĩshĩkẽ

¹⁶ ha Golias tashnikirãkirãkĩ shaba tibi penama inũ bari kaya tibi hatu kashe hãtxawẽ yuikĩ Israelĩ enabu sinatamakubaini 40 dia hatu bika tenemaya

¹⁷ shaba betsatiã Jessé Davi yuikĩ: “Shekiwã trigo tsui 20 litro inũ 10 misi bitã hatũ tari hiwe anu mĩ betsabu bushũtãwẽ.

¹⁸ Ha dikabi hatũ shanẽ ibu beshmas inãkuĩkĩ 10 awa txutxu tãki bushũriatãwẽ. Mĩ betsabu haskaramẽkaĩ, hatu ea uĩshũtãwẽ. Mĩ betsabu ma pe hiweabumẽkainã, kakape nĩkatãkĩ ea yuiyutãwẽ”, aka

¹⁹ habiatiãri Saul inũ Davĩ betsabu inũ Israelĩ enabu detenamenikabu Carvalho napaku anua Filisteu nawabube detenameaibũ

²⁰ Davi penama bestẽtã hawẽ epã txashuwã huni betsã hau mekeshũyunũ yunutã piti hawẽ epã yunushina hatu bushuĩ kai hatũ tari hiwe pũtebaunabu anu hikitushiaya Israelĩ enabu detenamenika mapubainabu hatũ date henei ana dateama detenamenũ ika sai sai iki keyuaibũ

²¹ mati dabe anua beisinãbukuĩ Israelĩ enabu inũ Filisteu nawabu mapubauna uinanaĩbũ

²² hanu piti inũ mabu mekeabu anu ha piti bushu hanu arubaini detenameaibu uinũ ika kushikaĩ ha mapubaunabu anu hikishũ hawẽ betsabuki nukushũ yukakĩ: “Mã haskaramẽ, nukũ epa ẽ yui kairã”, iki

²³ hawẽ betsabube Davi hãtxai heneriamakẽ Filisteu nawa mapuabu anua mẽtsisipa hawẽ mae Gaterã, Golias ana tashnikirã ana Israelbu mesewakĩ hau tsuara habe detenameyunũ habias hãtxa hatu yuikubainai ana hatu hãtxa wai Davĩ nĩkaya

²⁴ Israelĩ enabũ ha Golias uĩ hawẽ taea datei pashanũ ika txishtekiri hukirã

²⁵ yuinameakeakekĩ: —Ha huni keyatapa tashnikiranairã, mã uiaĩ? Hau habe nũ detenamenũ nuku kashe wakĩ nuku bika waikiki. Tsuãra maemakĩ tenãkẽ nukũ shanẽ ibuhairatũ mabu itxapa inãkĩ hawẽ aĩbu bake aĩwãmatã txipu hawenabus imposto pei ana yukama ikũkaĩshanikiaki— ikea iakeabu

²⁶ nĩkatã hari mapuabu Davĩ hatu yukakĩ: —Ha Filisteu nawã matu kashe wakubainai tsuara habe detenamekĩ tenãkĩ yamawakenã, ha huni detenamenika Saulũ hawa inãshanai yuishinamẽ? Deus hiweatũ detenamenikabu kashe wakĩ bika tenemakubainai tsua ikimẽkaĩ, hawa Deus ikũwãmarã— ikaya

²⁷ Golias tsuãra tenaĩwẽ taeshũ hawara Saulũ ha inãshanai ana habias hãtxa dama yuishu habũ Davi yuiabu

²⁸ hakia haska yuiaibu hawẽ betsa iyua Eliabẽ nĩkatã haskakiri Davi yuiaibu nĩkatã hawẽ betsa haki sinatakĩ Davi yuikĩ: —Haskai mĩ nenu huamẽ? Hanu tsua hiweabuma anu nukũ epã txashuwã itxapama tsuã mekeshũyunũ mĩ yunubirãshinamẽ? Nũ hatube detenameai besti uĩtanũ ika mĩ hua mĩ datemanikapai haska txakabu shinaĩ ẽ nĩkaii— aka

²⁹ kemakĩ Davĩ yukakĩ yuikĩ: —Ẽ hawa hãtxa txakabuwaiwẽ taeshũ mĩ ea ha akai, damahairabĩ ẽ hãtxai?— itã

³⁰ hawẽ betsa dapashkabaini kashũ huni betsa yukakĩ: —Ha Filisteu nawabe detenamekĩ maemakenã, Saulunã, hawa inãshanikiaki— aka habias betsabũ yuikãshu habiaskari Davi banabimakĩ yuiria

³¹ Davi yuka ikai betsabũ nĩkabaini kashũ Saul yuiabu nĩkatã hau Davi iwenũbũ hatu yunua

³² Davi kashũ Saul yuikĩ: —Ha Filisteu nawawẽ datei hau punu nukayamanũbũwẽ. Earã, ẽ mĩ dayaruwẽ taea ẽ habe detenamei kaii— aka

³³ kemakĩ Saulũ Davi yuikĩ: —Miarã mĩ berunãki. Ha Filisteu nawa keyatapabe detenamei mĩ mesti mĩ katirumaki. Hakia ha ikirã, berunã detenamekũkaũmis beya huni ewaki— aka

³⁴ Davĩ yuikĩ: —Eki txiti iwe. Earã, ẽ mĩ dayaru ẽ epã txashuwã ẽ mekeshũkubainai leão hune hushũ txashuwã atxishũ tukũbainai

³⁵ hawaira txibãbaĩ kusha kusha akĩ txashuwã tukuã ẽ shetakash akubaĩmiski. Ẽ haska wa eari pinũ ika ea shinãbirani huai hawẽ daniwẽ tsumabaĩ ẽ mestẽtiwẽ kusha kusha akĩ ẽ tenãmiski, dateamarã. Urso dikabi hushũ yumetsukainai ẽ habiaskari wamiski.

³⁶ Haskakĩ leão inũ urso detekĩ ẽ amis keska ha huni Filisteu nawa Deusuma ẽ habiaskari watirumamẽ? ha Deus hiweatũ detenamenikabu hatu mesewakubainairã.

³⁷ Inu betsa leão inũ ursõ ea mesewai Senhor Deusũ ea hatu binumakubaĩmis keska wakĩ ha huni Filisteu nawa keyatapatũ ea mesewabiaya Senhor Deusũ ea merabewariatiruki— aka nĩkatã Saulũ Davi yuikĩ: —Haskakenã, katãwẽ, Senhor Deus mibe kashũ mia merabewaikikirã— atã

³⁸ hanushũ Saulũ haya detenamemis tari hau Davi sawemanũbũ hatu yunua Davi mane tari sawemakĩ hau hawẽ bushka hunenũ mane maiti maimatã hawẽ yura hunekĩ mane tari hawẽ shutxi anu inũ hawẽ petxiuri hunekĩ sawemabu

³⁹ hawẽ deteti txaipa kenuhaira ibubis bitã Davĩ usũtã haska sawekĩ beyawaisma shãkamakẽ kapaikĩ danãtã Davĩ Saul yuikĩ: —Ẽ haska beyamawẽ taea haska sawetã ẽ kushikaĩtirumaki— itã Saulũ mane tari pekashũtã

⁴⁰ hawẽ bamati hi besti tsumabaini kakĩ pashku namakia 5 mishki tũkupabu katushũ hawẽ kapãkãki nanetã mishki haki nanetã putati tsumabaini Goliaski kemai kaya

⁴¹ hawẽ merabewanika bebushũkiranaya hanua Golias unãshubira hatxũ hukĩ

^42-44 unuria Davi uĩkĩ huni berunã hawẽ yura hawẽruahaira inũ hawẽ beru hawẽruari haskabe detenametima Filisteu nawã Davi yuikĩ: —Earã, ẽ kamã dabanẽ mĩ hi mestẽtiwẽ mĩ ea kushanũ ika huai?— akĩ hawẽ yushibũ kenawẽ Davi yuputã: —Haskakenã, neri huwe, mĩ namirã, peiyabu inũ pianãbu ẽ mia hatu inainã— aka

⁴⁵ hanushũ Davĩ kemakĩ yuikĩ: —Miarã, hashi dabe inũ matxatu txaipa kenuhairayatũ ea detenũ ika mĩ huaii. Hakia eanã, Israelĩ enabu mĩ hatu mesewakĩ datekubainaiwẽ taea hatũ mekenika Senhor Deus dasibi kushipa binuatũ kenawẽ taea mibe detenamenũ ika eari ẽ huaii.

⁴⁶ Haskawẽ taeshũ Senhor Deusũ ea merabewa ẽ mia maemaya ikis mia detekĩ tenãtã mĩ bushka ẽ mia teshteaii. Ha dikabi mã Filisteu detenamenikabu ẽ matu tenã matũ nami peiyabu inũ pianãbu ẽ matu inaiĩ. Ẽ matu haska waya mai hirabi anu hiwebaunabũ Israelĩ enabũ mekenika Deus kushipahaira haya unãshãkanikiki.

⁴⁷ Na nenu nũ detenamei itxaburã, nukuburã, hawa matxatu txaipa kenuhaira inũ hashiwẽ Senhor Deusũ nuku detenamemakĩ hiwemama dasibibũ mã unaiĩ. Na detenamei nũ huarã, Senhor Deusunaki. Haskakẽ Senhor Deusũ matube detenamemakĩ nuku matu maemamaikiki— aka

⁴⁸ Haska wa Golias nĩkai benitã Davikiri hui kemakũkiranaya habiatiãri Davi hawaira hari kushikaĩ ha bebũ nitã

⁴⁹ hawẽ mekẽ mistubaĩ hawẽ kapãkã anua mishki tũkupa bishũ putatiki nanetã bekũ bekũ akĩ mishki tũkuwẽ Golias betũku anu tsakakĩ bepesa ha mishki hawẽ betũkuki usuã haska wa mawai besuuri tĩ iki maĩ di ikaya

⁵⁰ haska wakĩ Davĩ Filisteu nawa maemanikiaki, hawẽ bekũ bekũ akĩ putatiwẽ inũ mishki tũkuwẽ besti Filisteu nawa keyatapa tenãtã hawa matxatu txaipa kenuhaira buama ikawẽ taea

⁵¹ kushikaĩ hawẽ yura dapi kashũ Goliasĩ matxatu txaipa kenuhaira haya sitã ibubis hawẽ bushka teshtekĩ tenãyã ha bestitũ detename unaĩ haki txiti ikabu ma tenã mea Filisteu nawabũ uĩtã datei pashai kushibainaibũ

⁵² Israelĩ enabu inũ Judá enabũ hatu uĩtã hatu detenũ ika hui kushipawẽ sai sai ibaĩkĩ hatu txibãbaĩkĩ hatũ detetiyashũ Filisteu nawabu maewã dabe Gate inũ Ecrom mishki kenebaunibu anu hatu henetã Saaraim bai kawẽ inũ Gate bai kawẽ Ecrom anu bai ka namaki Filisteu nawabu mirima debua mania uĩkubirani

⁵³ hatu txibãkubaĩtani ana txĩtũbirã Filisteu nawabũ hatũ tari hiwe pũtebaũshinabu anu hikitã hatũ mabu biãkĩ tsispu keyuaibũ

⁵⁴ hanushũ Goliasĩ bushka teshtebaĩ Davĩ bitã txipu Jerusalém anu bunikiaki. Hakia Goliasĩ haya detenamemis mabu Davĩ bushũ hawẽ tari hiwe anu arunikiaki.

⁵⁵ Davĩ Filisteu nawa Golias detei kai uĩkĩ Saulũ bebũkiri hawẽ detenamenika shanẽ ibu Abner yukakĩ: —Abnerĩ, tsuã huni bake ikimẽkaĩ, ha berunanã?— aka kemakĩ: —Shanẽ ibuũ, Deusũ nuku uiãyã eãri ẽ unãmaki— aka

⁵⁶ hawẽ shanẽ ibũ Abner yunukĩ: —Hawẽ epa tsuamẽkaĩ, hatu yukatãwẽ— aka

⁵⁷ ma tapĩkẽ hanushũ Filisteu nawa Golias detekĩ tenãtãkĩ hawẽ bushka beaiki nukushũ Abner metsũbaĩ Saul anu iyua

⁵⁸ Davikiri dasibi ma hakimashina Saulũ Davi yukakĩ: —Berunaã, tsuamẽ, mĩ eparã?— aka Davĩ kemakĩ yuikĩ: —Earã, Belém anua mĩ tsuma Jessé ẽ bakeki— aka