1 Samuel 16 - Kaxinawá Bíblia (BR)

Davi hau shanẽ ibushanũ Deusũ katunikiaki, na hãtxarã

¹ Atimas Senhor Deusũ Samuel yuikĩ: —Saulwẽ taearã, hatiã hawẽ nui kashakũkaini mĩ hakimashanai? Israelĩ enabu Saul hatu shanẽ ibushũkũkainai ana haskai ẽ betxipaiamaki, mĩ haska shinainã. Menã benikaĩ ha piti sheni mĩ txashuwã mashũ bishtuki mata watã Belém anu huni betsa Jessé hiwea anua hawẽ huni bake betsa hau ha Israelĩ enabu shanẽ ibushũkũkaĩshanũ ẽ ma katushinawẽ taea hari katãwẽ— aka

² Samuelĩ kemakĩ yuikĩ: —Haskakaĩ ẽ mia ashũtirumẽ? Mĩ ea haska yunua shanẽ ibu bena katui ẽ kaya Saulũ tapĩtã ea tenãshanikiki— aka kemakĩ Senhor Deusũ yuikĩ: —Belém anu ina awa bake babupa bushũ: “Senhor Deus kẽwãtanũ ika matu anu ẽ huaii”, iwanã, hatu yuitãshãwẽ.

³ Ina awa bake tesẽshũ hawẽ sheni menukĩ keyushũ pitxãtã Deus kẽwãkĩ hawẽ nami ẽ mibetã piyuaii, iwanã, Jessé kenashãwẽ. Mĩ harishũ haska wai kai ẽ mia yuishanaii. Ha shanẽ ibushanai Jessé bake betsa haratura ẽ mia yuikĩ yunua katukĩ shanẽ ibu kushipa meribi wakĩ sheni mashu ashãwẽ— aka

⁴ haska Senhor Deusũ yunua Samuelĩ abaini kai Belém anu hikiaya ha mae anua anibu unanepabu kaĩbirã dateyabi ikĩ Samuel yukakĩ: —Unanumawẽ taea mĩ huai?— akeakeabu

⁵ kemakĩ Samuelĩ hatu yuikĩ: —Haa. Unanumawẽ taea ẽ huaii. Senhor Deus kẽwãkĩ na ina awa bake babupã sheni menukĩ keyutã hawẽ kẽwãti nami matubetã pinũ ika ẽ hushuki. Matũmebi datxuki petã hawẽ kẽwãti nami ebetã pikãwẽ— hatu watã Senhor Deusũ Jessé inũ hawẽ huni bakebu hau ha meribi pepa wanũ Samuelĩ Senhor Deus hatu yukashũtã ina awa sheni menukĩ keyushũ hawẽ kẽwãti nami hua habetã pinũ, iwanã, Jessé inũ hawẽ huni bakebu kenakĩ Samuelĩ huni betsa yunua

⁶ hatu yuia bei hikiaibũ Jessé huni bake iyua Eliabe Samuelĩ uĩkĩ: “Txanima haki, Senhor Deusũ ma katushinarã, hau Israelĩ enabu shanẽ ibukũkaĩshanunã”, ikĩ shinãyã

⁷ hakia Senhor Deusũ Samuelĩ shinã uĩkĩ yuikĩ: “Haskamaki. Hawẽ yura hawẽrua keyatapa shua uĩyamawe, ẽ ma haska danainã. Hunibũ bemakis hatu uĩmisbu keska wakĩ miãri bemakis uĩyamawe. Hakia eã uĩkinã, hatũ huĩti merã pe besti shinaĩbu ẽ unãti wamiski”, aka

⁸ hanushũ hawẽ huni bake betsa Aminadabe kenashũ Jessé Samuel uĩma hakia Samuelĩ yuikĩ: “Senhor Deusũ ha katuamariki”, aka

⁹ hanushũ hawẽ huni bake Samá kenashũ Jessé Samuel uĩma hakia Samuelĩ ana yuikĩ: “Hari Senhor Deusũ katuamariki”, aka

¹⁰ Jessé hawẽ 7 huni bakebu uĩmakĩ keyua Samuelĩ yuikĩ: “Na hatiburã, Senhor Deusũ tsua katuamaki”, iwanã

¹¹ hawẽ henekĩ ana yukakĩ: —Hatismẽ, mĩ huni bakeburã? Ana betsa hayamamẽ?— aka kemakĩ Jessé yuikĩ: —Txashuwã hatũ mekea mashkuhaira besti nenu hayamaki— aka Samuelĩ Jessé yuikĩ: —Hau benatanũbũ hawaira hatu yunuwe. Hanua ha huaya Senhor Deus kẽwãkĩ benimai nũ taewatiruki— akaya

¹² Jessé hatu yunua bushũ itanabu hawairakirani ha berunã hawẽ bake mashku hikiaya hawẽ yura hawẽruahaira inũ hawẽ beru hawẽruari Samuelĩ uiãyã hanushũ Senhor Deusũ Samuel yuikĩ: —Ha niarã, haki. Hau Israelĩ enabu shanẽ ibuhairashanũ benitã piti sheni mashu ariwe, katukinã— aka

¹³ haska wa Samuelĩ nĩkatã sheni bua hawẽ kapãkãkia bitã hawẽ epa Jessé inũ hawẽ betsabũ uiaĩbũ berunã hawẽ kena Davi piti sheniwẽ Samuelĩ mashu akĩ hau Israelĩ enabũ shanẽ ibukũkaĩshanũ katuaya habiatiãri Senhor Deusũ Yushinĩ Davi kushipa wakĩ taewaya hawa ana manai niti ikama hatu yuibaini Ramá anu hawẽ hiwe anu Samuel txĩtũkainikiaki.

Davi Saulũ merabewanika inikiaki, na hãtxarã

¹⁴ Hanushũ Senhor Deusũ yushinĩ Saul henebaĩkẽ hakia hau bika tenemakubaĩshanũ yushĩ txakabu Senhor Deusũ yunua haki hikishina Saul ana shinã pewamamakĩ bika tenemaya

¹⁵ hawẽ tsumabũ Saul yuikĩ: —Shanẽ ibuũ, Senhor Deusũ ma yunua yushĩ txakabũ mia bika tenemaikiki, mĩ unaĩmẽkainã.

¹⁶ Mia haska waya tsuãra harpa mawa unãhairai hau mia benashũtanũbũ mĩ tsumabu nuku yunuwe, nũ benai kairã. Yushĩ txakabũ mia bika tenemai harpa mawanikatũ mia mawashunaya mĩ pekũkaĩshanaii, ha mĩ bika teneairã— akeakeabu

¹⁷ hawẽ tsuamabu kemakĩ Saulũ hatu yuikĩ: —Peki. Huni betsã harpa mawa unãhairai ea benashũbaũtãkãwẽ. Betxitã ea iweshũtãkãwẽ— hatu wa

¹⁸ hawẽ tsuma betsã Saul yuikĩ: —Belém anushũ Jessé huni bake mashku Davi hawẽruatũ harpa mawa unãhairai inũ ha dikabi kushipakaĩ detenamea unaĩ inũ pe shinaĩ hãtxai pemis ẽ uĩmaki, Senhor Deusũ haskai merabewakubainairã— aka

¹⁹ hanushũ hau yuishũtanũbũ Saulũ hawẽ tsumabu Jessé anu hatu yunukĩ: “Belém anu bushũ Jessé ea yuishũkĩ: ‘Mĩ huni bake Davĩ txashuwã mekenika ea nitxĩshũwẽ’, akĩ Jessé ea yuishũtãkãwẽ”, akĩ hatu yunua

²⁰ bushũ Saulũ hãtxa Jessé yuiabu nĩkatã hawẽ bake nitxĩshũkĩ hau haya iyutanũbũ jumento kamaki misi saku mata inũ bitxi bishtu vinho mata naneshũtã hanua cabra bake jumentoki dũtãshũ Saul anu haya yunua

²¹ kai hikishũ Davĩ Saul yuikĩ: “Ea Jessé bake mianu ma ẽ hushuki, mia dayashunirã. Hanua ẽ epã na piti inãkuĩ mia yunushinaki”, aka hanushũ Saulũ hawẽ merabewanika wakĩ Davi betxipaihairakĩ katushĩshũ

²² hanushũ Saulũ hawẽ hãtxa ana Jessé bumakĩ: “Mia ea akĩ mĩ bake Davi mĩ ea nitxĩshũshina ẽ betxipaihairaiwẽ taeshũ ea heneshũwẽ, hau ea anu ikũkaĩshanunã”, akĩ hawẽ hãtxa bumanikiaki.

²³ Hanushũ haska washĩkẽ yushĩ txakabu Deusũ yunua Saul bika tenemakĩ ana taewaya Davĩ harpa mimawa pewashunaya Saul anua yushĩ txakabu tashnikainaya Saulũ ana pe shinãpaunikiaki, beshteketã petũ besuirã.