1 Samuel 15 - Kaxinawá Bíblia (BR)

Saulũ hawẽ yunua akĩ pewashunama kaneaya Deusũ dananikiaki, na hãtxarã

¹ Shaba betsatiã Samuelĩ Saul yuikĩ: —Deusũ enabu Israelbu mĩ hatũ shanẽ ibunũ ẽ mia katuima Senhor Deusũ eska mia yuikiki. Nĩkawe.

² Senhor Deus kushipa dasibi binua eska hãtxashinaki: “Egito anua Israelĩ enabu bekĩ Amaleque nawabũ maiwã pakea kapukebaĩpanãbũ hatu nemakĩ niti aniwẽ taeshũ natiã ẽ hatu kupikatsis ikaii.

³ Na habiatiã Amaleque nawabu anu bushũ hatu detekĩ keyutãkãwẽ. Hatuwẽ hawa nuiama dasibi hatu yamawakĩ keyutãkãwẽ. Hunibu inũ, aĩbuaibu inũ, bake mishtĩbu inũ, dama kaĩshinabu hatu tenã keyukĩ hanushũ hatũ ina awa inũ, hatũ txashuwã inũ, hatũ camelo inũ, hatũ jumento hatũ mabu dasibiyabi yamawakĩ keyutãkãwẽ”, akĩ Senhor Deusũ ea yuikĩ mikiri haska hãtxashinaki— aka

⁴ hanushũ Saulũ haska nĩkatã hawenabu Israelĩ enabu kenakĩ itxawatã hawẽ detenamenika maĩ bumisbu mae betsa Telaim anushũ hatu tanakĩ 200.000 hunibu tanatã hanushũ Judá enabu 10.000 hunibu tanakĩ keyuriatã

⁵ hatu haska wabaĩkĩ iyui Amaleque nawabũ shanẽ ibu hatũ mae ewapa anu hiweabuki kematã mishkiwẽ kenebaunibuwẽ taea napãpa tepakuanu mapubaũshũ

⁶ Moisĩ ainẽ enabu Queneu nawabu Amaleque nawabube husia hiweabuwẽ taeshũ hui kushipawẽ Saulũ hatu yuikĩ: —Queneu nawabuũ, tashnibirani neri dasibi kaĩ bekãwẽ. Amaleque nawabube nũ matu detekatsi ikamaki. Matubunã, Egito anua nukũ shenipabu Israelĩ enabu beaibu matũ shenipabũ hatu duawanibukiaki. Menã hawaira ea nĩkabirani bekãwẽ— hatu wa hawẽ hãtxa nĩkatã Queneu nawabu Amaleque nawabu anua kaĩbaini pashaibũ

⁷ haskabiranaibũ hawẽ detenamenikabubetã Saulũ Amaleque nawabu hatu dete taewakĩ Havilá anushũ hatu txibãbaĩkĩ Egito maiwã pakea kesha anu mae betsa Surkiri hiki buaibu hatu detekĩ keyutã

⁸ hanushũ Amaleque nawa shanẽ ibu Agague atxishũ hawenabu detenamenikabu besti dasibi hatu detekĩ maematã

⁹ hakia Saul inũ hawẽ detenamenikabũ Agague atxishũ mekeyutã hanushũ hatũ txashuwã bene inũ, yushã pepabu inũ, ina awa bene inũ, yushã shua detekĩ tenãma hakia hatũ mabu pepa karu betsa meketã hanushũ hatũ mabu pepa beshmas inũ hatũ mabu atimapa sharabu besti dera dera akĩ txakabuwakĩ keyuabũ

¹⁰ hanushũ Samuel Senhor Deusũ hãtxa wakĩ:

¹¹ —Pe dabanẽ Saul ẽ shanẽ ibu wani ẽ yunua ea akĩ pewashunama natiã ma ea heneawẽ taeshũ ẽ ma heneaki— aka haskakiri Samuel shinãma bika tenekĩ hau putayamanũ meshu txai tanakĩ Samuelĩ Senhor Deus Saulkiri yukashũshini

¹² penamahaira Saulki nukutanũ ika Samuel kaya tsuãra yuikĩ: “Saul Carmelo anu kaikiki. Harishũ Amaleque nawa detekĩ keyushĩshũ hawẽ unãmati mishki keyatapa benikĩ hatu nitxĩmatã hanua bai betsa kawẽ Gilgalkiri butukainikiki”, aka

¹³ Gilgal baiwẽ Samuel kai hari Saulki nukua benimakĩ Saulũ yuikĩ: —Senhor Deusũ hau mia pepawakubainũwẽ. Haska Senhor Deusũ ea yunushinarã, ma ẽ meneshũshinaki— abia

¹⁴ hanushũ Samuelĩ txitekĩ yukakĩ: —Txashuwã maã maã ikaibu inũ ina awa maã maã ikaibu ẽ nĩkairã, haskakĩ ẽ haska nĩkai?— aka

¹⁵ Saulũ kemakĩ yuikĩ: —Na inabu bekinã, Amaleque nawabũ maewã anua nũ beaii. Mĩ mekenika Senhor Deus kẽwãkĩ ha inabu menukĩ kuashũshanũ, iwanã, txashuwã pepa inũ ina awa shuarãwã nukunabũ mekeshinabuki. Hakia dasibirã, nũ yama washinaki— ikaya

¹⁶ nĩkakatsi ikama nemakĩ Samuelĩ hawaira yuikĩ: —Haska ana yuiyamawe. Peswe. Eska Senhor Deusũ meshu merã ea yuishinai mia yuinũ nĩkawe— aka —Ẽ mia nĩkai ea yuiwe— aka

¹⁷ Samuelĩ ana yuikĩ: —Ibubis mĩ haska hayatiruma mĩ shinãbiaya nĩkamas Israelĩ enabu mĩ hatu shanẽ ibuhairashunũ Senhor Deusũ mia katuima mĩ shinãma ishiãmẽ?

¹⁸ Eskaki, shinãwẽ. Senhor Deusũ mia yunukĩ hawẽ nemati kushipawẽ ha Amaleque nawa txakabubu mia detemakĩ hatũ mabu mĩ yama washanũ mia yunushinaki.

¹⁹ Haska shinãma hawẽ hãtxa nĩkama binumakĩ hatu detebiakĩ hatũ mabu inũ hatũ inabu henebainaibu haskakĩ mĩ hatu biãbirãshinamẽ, Senhor Deusũ berubi txakabukiranirã?— aka

²⁰ Saulũ kemakĩ yuikĩ: —Haska Senhor Deusũ ea yunushina txibãkĩ hawẽ yunuawẽ taeshũ ẽ ma akĩ keyushũshinaki. Amaleque nawabu dasibi tenã keyutã hanushũ Amaleque shanẽ ibu Agague neashinabu ẽ iweshinaki.

²¹ Txanima Gilgal anushũ mĩ mekenika Senhor Deus ha inãkĩ hanushũ tenã keyukatsi inabu shua tesẽshũ menukĩ keyushũti nukunabũ hatu nawakĩ ibuwabirãshinabuki— aka

²² hanushũ Samuelĩ yuikĩ: “Senhor Deusũ betxipai benimamisrã, nũ ha nĩkakĩ nũ ashuaĩ besti betxipaimiski. Hamẽ ha inabu sheni menukĩ keyushũmisbu inũ hawẽ kẽwãti nami pitxãshũ pimisburã, hawẽ Senhor Deus benimai beshmasmiski. Habũ Senhor Deus nĩkakĩ ashũkubaĩmisburã, habuwẽ benimahairamiski, txashuwã sheni inũ hawẽ nami menukĩ keyushũmisbu binuarã.

²³ Habũ Senhor Deus ikũwãbumã danãkĩ txakabuwakĩ Deus sinatamamisburã, yushibube dayai mukayakĩ unãmisbu keskabuki. Tsuãra Senhor Deusũ yunuti hãtxa nĩkama habũ yushibu dami kẽwãmisbu keskabuki, txakabuwairã. Hamẽ miã akĩ Senhor Deusũ yunuti hãtxa mĩ danãkĩ txakabuwashinawẽ taeshũ natiã mĩ nukũ shanẽ ibu ikis mia danãriaikiki”, aka

²⁴ hanushũ Saulũ Samuel yuikĩ: —Pemahairaki. Txakabu wakĩ ma ẽ kaneshinaki. Eã ẽ pewai dabanẽ Senhor Deusũ yunuti txibãma inũ mĩ ea yusĩshina mestẽwãma nukunabuki datekĩ hatũ hãtxa eã habu besti ẽ nĩkashinaki.

²⁵ Hakia haska ẽ kaneshina menã ea hakimariwe, haska ẽ mia yukairã. Ea haska watã ẽ Senhor Deus kẽwaĩ kai ebe txĩtũkaĩwẽ— aka

²⁶ kemakĩ Samuelĩ yuikĩ: —Mĩ ma Senhor Deusũ yunuti hãtxa danãshinawẽ taeshũ natiã mĩ Israelĩ enabũ shanẽ ibubiakẽ Senhor Deusũ mia danaĩwẽ taea ana ẽ mibe hari kamaki— atã

²⁷ Samuel kai dabekekainaya ana niti anũ ishũ Saulũ Samuelĩ tari txaipa keshawẽ tsumãtã ninĩkĩ ushniã

²⁸ haska wã hanushũ Samuelĩ Saul ana yuikĩ: —Na ẽ tari mĩ ea ushnishu keska wakĩ Israelĩ enabũ mĩ hatũ shanẽ ibubiakẽ Senhor Deusũ mia ma ushnia keska waikiki. Haska keskari wakĩ mĩ shanẽ ibuai mia ma mebĩtã Israelĩ enabu betsa pepa mia binua Senhor Deusũ katutã inãshanikiki.

²⁹ Txanima Deusũ hawẽ kushipawẽ Israelĩ enabu hatu duawakubaĩmis txanitxakaisma inũ hawẽ shinã betsa waismaki, huni betsa betsapabũ hatũ shinã betsa wamisbu keskamarã— aka

³⁰ Saulũ Samuel ana yuikĩ: —Txanima kanei ẽ txakabushinaki. Hakia ẽ mia yukakĩ ea akaii. Hau Israelĩ enabu inũ hatũ anibu unanepabũ nũ kai uĩkĩ hau ea shanẽ ibuai eki meseyunũbũ haskama ebe kashũ mĩ Senhor Deus ea duawakĩ ea kewãmayui kawe— aka

³¹ hawẽ hãtxa nĩkatã Saul Samuelbe txĩtũkaini kashũ dãti iki beti itã hatũ mekenika Senhor Deus kẽwãkĩ meneaya

³² Samuelĩ hatu yunukĩ: —Amaleque nawa shanẽ ibu ea bebũ nitxĩ bekãwẽ— hatu wa hanushũ iweabu Samuel bebũ nishũ Agaguẽ shinaĩ: “Ma ẽ txakabu binushinaki”, ikĩ shinaĩ: “Ea ana tenãkĩ deteabumamẽkaĩ”, ishũ shinãbiaya

³³ hakia Samuelĩ Agague yuikĩ: —Mĩ matxatu txaipa kenuhairawẽ aĩbuaibu itxapa mĩ hatu bakeuma waniwẽ taea mĩ ewa hatu keskariai bakeumari ikũkaĩshanikiki— akĩ Gilgal anushũ hawaira Senhor Deuski nukuti tari hiwe bebũshũ Samuelĩ Agague derakĩ tenãkĩ bais bais akĩ keyutã

³⁴ hanua Samuel hawẽ hiwe Ramá anu kaya Saulri habe pashkakaini hawẽ mae Gibeá anu txĩtũkaini hawẽ hiwe anu ka hiweyuaya

³⁵ haska kainima Samuel mawariama ana haki nukushũ uiãma inikiaki. Senhor Deusũ shinaĩ: “Haskakĩ Saul Israelĩ enabu ẽ hatu shanẽ ibu washunimẽ?” ikĩ shinã betsaiwẽ taea haska washũ Samuel Senhor Deusũ shinã betsawatirumawẽ taea Samuelĩ ana uiãmabia hawẽ nuihairai kashakũkainikiaki.