1 Samuel 14 - Kaxinawá Bíblia (BR)

Mẽtsisipakaĩ Jônatasã Filisteu nawabu hatu detekĩ maemanikiaki, na hãtxarã

¹ shaba betsatiã Saulũ huni bake Jônatasã hawẽ merabewanika yuikĩ: —Ukeri pashku pukebaĩ Filisteu nawabu detenamenikabu shuku betsa detenũ kawe— aka haska kaĩkĩ hawẽ epa Saul banabimama

² mati manã tenãmãshũ hanushũ shekiwã trigo katamisbu anu hi betsa hawẽ kena romeira namã Migrom anu manishũ 600 hunibubetã Saulũ manaya

³ Senhor Deus yukanũ ika Deusbe hawenabu hãtxashunikatũ tari hawẽ kena éfode Aíasĩ beshuã inikiaki. Aíasĩ eparã, Aitube inikiaki, Icabô betsarã. Hanua Icabô eparã, Finéias inikiaki. Finéiasĩ epa Eli inikiaki. Siló anushũ hawenabu Senhor Deusbe hatu hãtxashunikari ikũkainikiaki, Elirã. Jônatas tashnikaĩkĩ tsua yuiama ka tsuã hawa unãmakẽ

⁴ mati kuburu keyatapa dabe hawẽ kena Bozez inũ Sené ha dabe namakis bai anu Filisteu nawabu detenamenikabu maniabu anu kemanũ ika ka

⁵ mishki mati keyatapa betsa Micmás bebũ nortekiri nia inũ betsa Gibeá bebũ sulkiri niriakẽ

⁶ hanushũ hawẽ merabewanika Jônatasã yuikĩ: —Filisteu nawa detenamenikabu hawa nukũ Deus unãbuma anu hatuki kemai ukeri kesha betsauri kawanãwẽ, Senhor Deusũ nukuwẽ taeshũ nuku merabewatirumẽkainã. Senhor Deusũ hawẽ maemati kushiparã, hawa bikamaki. Huni itxapawẽ kasmai huni eskarabeswẽ Senhor Deusũ nuku hatu maemamatiruki— aka

⁷ kemakĩ hawẽ tsumapã yuikĩ: —Haskakenã, haska mĩ shinaĩ keska akubaĩwẽ. Hawara mĩ shinaĩ ẽ mia txibãkĩ ashũkubaĩtiruki— aka

⁸ haska yuia hanushũ Jônatasã kemakĩ yuikĩ: —Uiã, ukeri hanu mapuabu anu kapukenãwẽ, hau shinãshũ habũ nuku uinũbunã.

⁹ Habũ nuku uĩtã yuikĩ: “Manayukãwẽ, matu anu nũ butuairã”, nuku akabu nũ hatu manaii, hatu anu mapekeamarã.

¹⁰ Hakia habũ ana nuku yuikĩ: “Nuku anu mapekekãwẽ”, nuku akaibuwẽ taeshũ Senhor Deusũ nuku merabewaya nũ hatu maematiru unãtã hatu detenũ ika samama nũ hatu anu mapekekaĩtiruki— aka

¹¹ hau shinãshũ hatu uinũbũ huneabu anua tashnibainaibu Filisteu nawabũ hatu betxitã yuikĩ: “Uĩkãwẽ. Hanu ma huneshinabu mishki tãpe anua Hebreu nawabu ma tashnibirãkanikiki”, iwanã

¹² hui kushipawẽ Jônatas inũ hawẽ tsuma sai akĩ yuikĩ: —Detenameti matu yusinũ nuku anu mapekekãwẽ— ikaibũ hawẽ tsuma Jônatasã yuikĩ: —Senhor Deusũ nuku merabewakĩ Israelĩ enabu hatu deteshũkĩ maemaikiki. Etxũ hukĩ ea txibãbirãwẽ— aka

¹³ hani mĩ mapeketiruma anu mapekei betãkubaini Jônatas mapekeaya hawẽ tsumapãri txibãriabaini habe mapeketã Jônatasã Filisteu nawabu detekĩ di atanai hawẽ tsumapã hatũ namekĩ tenãkubaũkĩ

¹⁴ habu dukũ tenã taewakĩ hanu kesheabu anu mae hatiuma anushũ Jônatas inũ hawẽ tsumapã 20 hunibu hawaira hatu detekĩ tenãbu

¹⁵ hatu haska wabaunaibu Filisteu nawabũ unãtã detenamenikabu hatũ tari hiwe pũtebaunabu anu inũ detenamenikabu shukuakeakea nãta keshebaunabu datebaunaibũ hanushũ Senhor Deusũ mai patxa sakumakĩ hawa shinãtimawakĩ hatũ shinã hatu benua Filisteu nawabu dasibi datehairai berukubaunaibũ

¹⁶ Benjamimnẽ enabũ maewã Gibeá anushũ Saulũ hatu yunua habu mapushũ uĩbaunaibũ Filisteu nawabu harakiri katima datei kushibaunaibu uĩkĩ Saul yuiabu

¹⁷ haska nĩkatã hawẽ detenamenikabu habe itxabu Saulũ hatu yuikĩ: —Tsua nukunabu nenu hayamamẽkaĩ, hatu benabaũkãwẽ— hatu wa tanakĩ uĩbaũkĩ Jônatas inũ hawẽ tsuma hayama uĩtã Saul yuiabu,

¹⁸ Israelĩ enabu detenamenikabu anu Deusbe hatu hãtxashunikã tari éfode ma beshiã Aías Saulũ yunukĩ yuikĩ: —Deusbe yubakani tari éfode nenu bewe— aka

¹⁹ Deusbe hatu hãtxashunikabe Saul hãtxaya Filisteu nawabu hatũ tari hiwe pũtebaunabu anua datei haskatima bis bis iki berukua itimaskahairakubaunaibu uĩkĩ nĩkatã Saulũ Aías ana yuikĩ: —Haskamaki. Éfode ana beyamawe— atã

²⁰ hawẽ detenamenikabu Saulũ hatu itxawatã: “Hatu detenũ bukãwẽ”, iwanã, hatu iyuaya hawa shinã betsawẽ haskatima hanubi Filisteu nawabu detenamebaunaibũ

²¹ ha dikabi uatiã Hebreu nawabu Filisteu nawabube dasia hiwenibu habu dikabi beshiãbu habuã Filisteu nawabu henebaũ ma hatunabu Israelĩ enabu merabewakĩ Saul inũ Jônatasbe dasitã Filisteu nawabu hatu detekĩ hatu merabewanibukiaki.

²² Hatu deteabu Efraimnẽ enabu maewã mati matipakiri Filisteu nawabu hari pashaibu nĩkatã hatu detenũ ika tashnibirãkĩ detekubaĩkĩ hatu txibãbaĩkĩ

²³ Bete-Áven anushũ hatu dete keyutã txĩtũtanibukiaki. Haska wakĩ Senhor Deusũ Israelĩ enabu merabewakĩ Filisteu nawabu hatu putamanikiaki.

Hau hawa piyamayunũbũ hawẽ detenamenikabu Saulũ hatu nemanikiaki, na hãtxarã

²⁴ Saulũ Israelĩ enabu hatu yubakĩ nemakĩ yuikĩ: “Bari kariama eki sinataibu nũ hatu dete keyuriama Filisteu nawabu txibãbaĩkĩ detekubaĩkĩ tsuã taska piyamayushãkãwẽ. Tsuãra ea nĩkama bunikĩ mã piarã, txakabuhairashanikiki”, haska hatu wabiranawẽ taea ha shabatiã Israelĩ enabũ hawa piti betsa metsabumahairakẽ ma hĩ iki punu nukai babubiashũ

^25-26 Filisteu nawabu txibaĩ hi shukua anu hikibaũ hanu buna hawẽ bata hi anua txakahairai ũpash keska habai mai anu pãtu tsaua Israelĩ enabu detenamenikabũ betxibiatã Saulũ hatu nemakĩ yupuawẽ taea datekĩ tsuã meamahairakẽ

²⁷ hakia hawẽ epã nemati hãtxa Jônatasã nĩkama ikawẽ taeshũ hawẽ hashi debuwẽ buna bata pãtu tsaua pukutã hawaira mebaini hawẽ shinã txãkaĩ benimakaini kaya

²⁸ hawẽ detenamenika betsã uĩtã yuikĩ: —Mĩ epã nuku yubakĩ yuikĩ: “Tsuãra na habiatiã piti betsa piarã, Senhor Deusũ hau txakabuhaira wanũwẽ”, akĩ nuku yuibiranawẽ taea haska nĩkabirana nukunabube nũ ma punu nukahairabuki— aka

²⁹ Jônatasã kemakĩ: —Ẽ epã hatu nemakĩ nukunabu itxakawakĩ hatu yubawẽ taea mã ma babuaki. Buna bata eskarabes mekĩ ẽ pia ẽ yura ẽ ma ana kushipashuki. Uĩwẽ.

³⁰ Filisteu nawabũ piti nũ hatu putama buaibũ ha nukunabũ ha piti pikubaini hawẽ kushipatã nukunabũ Filisteu nawa mirima hatu detekĩ baris ma nũ hatu dete keyushu ikeanaii— aka

³¹ Israelĩ enabu punu nuka hĩ ibiakubaĩkĩ ha shabatiã Micmás anua Filisteu nawabu detekĩ txibãkubaĩkĩ hatu keyuriama Aijalom anu hatu henetã txĩtũbirãkĩ

³² atimas Filisteu nawabũ ma hatũ inabu henebainabu txashuwã inũ, ina awa inũ, hatũ ina awa bake bitã betsa tesẽshũ maiki meshte meshte ashũ hawẽ nami pasha himiyabi piaibũ

³³ hakia hatiri bushũ Saul yuikĩ: —Senhor Deusũ hãtxa danãkĩ txakabuwakĩ nami pasha himiyabi pikanikiki— akabu Saulũ kemakĩ hatu yuikĩ: —Matũmebi mã txibã pewaismaki, kanekĩ txakabuwairã. Mishki ewapahaira tarãbirã nenu ea beshũkãwẽ.

³⁴ Haska watãshũ hatũ ina awa inũ hatũ txashuwã bestibu tibitũ hau nenu benũbũ hatu yuikubaũtãkãwẽ. Nenu beshũ tesẽshũ hawẽ himi habai keyuaya meshte meshte ashũ bawashũ pitirubuki, nami pasha himiyabi pi txakabukĩ Senhor Deus ana sinatamamarã— hatu wa hatu yuibaunabu habias meshuki bestibu tibitũ ibubis hatũ ina awa beshũ tesẽshũ himi habawakĩ keyutã bawashũ pikĩ keyuabũ

³⁵ hanushũ ha dukũ tates taewabaĩkĩ Saulũ ibubis hawẽ kẽwãti txi tapu Senhor Deus ashũkĩ taewanikiaki.

³⁶ Haska hatu pewatã Saulũ hatu yuikĩ: —Ikis na meshu merã butubaĩ Filisteu nawabu ana hatu berutã detekubaĩkĩ penariama tsua betsa taska teshe wakĩ hiwemayamashãkãwẽ— hatu wa dasibibũ yuikĩ: —Haska mĩ shinaĩ keska akubaĩwẽ— akeakeabu hakia hawenabu Deusbe hatu hãtxashunika Aíasĩ Saul yuikĩ: —Hawara nũ akatsis ikai ariama Senhor Deus yukakĩ taewanãwẽ— aka

³⁷ hawẽ hãtxa nĩkatã Saulũ Deus yukakĩ: —Ana Filisteu nawabu hatu txibãkubaĩpa? Israelĩ enabu mĩ hatu nuku yunukĩ maemamatirumẽ?— aka habias meshu merã Senhor Deus hawa kemama pes dakakẽ

³⁸ haskakĩ Senhor Deusũ hawa yuiama tapĩkatsi ikĩ Saulũ hawenabu yuikĩ: —Detenamenika shanẽ ibu dasibibube nenu bekãwã, tsuã na habiatiã txakabuwakĩ mã kaneshumẽkaĩ, nũ tapinunã.

³⁹ Israelĩ enabu mekenika Senhor Deusũ ea nĩkaya ẽ matu yubaii, tsuãra Senhor Deus sinatamakĩ kanebiranamẽkaĩ, hau mawanũwẽ. Ẽ bake Jônatasã txakabuwakĩ kanebiranarã, habiari hau mawanũwẽ— ikaya shanẽ ibubu detenamenikabũ hawa yuiabumakẽ

⁴⁰ Israelĩ enabu dasibi Saulũ ana hatu yuikĩ: —Pashkatã mapu bukunãkãwẽ. Ukeri matu dasibi ikãwẽ, nekeri ẽ bake Jônatas inũ ea nũ niairã— hatu wa dasibibũ kemakĩ yuikĩ: —Haska mĩ nuku akatsis ikai keska awe— akabu

⁴¹ hãtxa kushipawẽ Saulũ Senhor Deus yuikĩ: —Israelĩ mekenika Senhor Deusuũ, mĩ dayarũ mia yukabia haskakĩ mĩ ea hawa kemamamẽ? Ẽ kaneamẽkaĩ, ẽ bake Jônatasã kaneamẽkaĩ, hawẽ unãti Urim hau haki tashninũwẽ. Hakia Israelĩ enabu minaburã, habũ kaneamẽkaĩ, hawẽ unãti Tumim hau hanu tashninũwẽ— akaya Jônatas inũ Saul anu unãti watã Urim bia kaiãyã hawẽ hatu unãti waya Israelĩ enabu kaneabuma hatuki pe kaiãyã

⁴² haskaya Saulũ ana hatu yunukĩ: —Ẽ bake Jônatasmẽkaĩ, ẽ eamẽkaĩ, nuku unãkĩ hawẽ unãti ana nuku anu kaĩmawe— aka unãti wati bia Jônatas hatu unãmai haki tashniaya

⁴³ haskaya Saulũ Jônatas yunukĩ: —Hawara mĩ kanebirana shabakabi ea yuiwe— aka Jônatasã shabakai txanikĩ: —Txanimaki. Buna bata betxitã ẽ hashi hawẽ debuwẽ besti pukutã eskarabes ẽ me bestibirãshinaki. Ẽ haska wabirãshinawẽ taearã, dateama ẽ mawatiruki— aka

⁴⁴ hãtxa kushipawẽ Saulũ yuikĩ: —Jônatasã, ẽ haska hãtxa yuibainawẽ taeshunã, mĩ mawamakenã, bikahairawẽ Deusũ hau ea kupishanũwẽ— akaya

⁴⁵ hakia haska wai hawenabũ nĩkatã Saul kemakĩ: —Haskatã e iskaũ Jônatas mawatirumẽ? Jônatasã hawenabu Israelĩ enabu Filisteu nawabu dasibi nuku maemamashũkĩ keyushũbiranawẽ taea mawatirumaki. Haska Jônatasã abiranarã, Deusũ merabewaya Jônatasã abiranawẽ taea Senhor Deus hiwekũkainaya Jônatas mawai hau tĩ iyamanũwẽ, hawẽ bu dikabi betsa teseamarã— akĩ Jônatas hau mawayamanũ haska yuikĩ Saul nemanibukiaki.

⁴⁶ Haskakẽ hatũ maiwã pakea anu Filisteu nawabu txĩtũbainaibũ Saulũ ibubis shinãtã ana hatu txibãma hatu henetanikiaki.

⁴⁷ Hatu haska watã tsuã ana nematirubuma Israelĩ enabu dasibi yunukubaĩkĩ Saul shanẽ ibuhairakĩ nawabu hiwebaunabu haki sinataibu hatu nemakĩ maemakubainikiaki. Moabe nawabu inũ, Amom nawabu inũ, Edom nawabu inũ, mae betsa Zobá anua shanẽ ibubu inũ, Filisteu nawaburã, hanira hatũ mae anu kakĩ hatu maemakubaĩpaunikiaki.

⁴⁸ Saulũ hawẽ detenamenikabu hatu itxawatã iyushũ Amaleque nawabu maemakĩ keyunibukiaki, nawa tibi dasibirã, Israelĩ enabu yumetsubirãbirãmisbu hatu nemashũkĩ keyukubaĩkinã.

⁴⁹ Hati Saulũ bakebu inibukiaki, hawẽ huni bakeburã, Jônatas inũ Isvi inũ Malquisuarã. Hanua hawẽ aĩbu bake daberã, iyua Merabe inũ mashku Mical inibukiaki.

⁵⁰ Saulũ ainĩ kenarã, Ainoã inikiaki. Ainoãnẽ eparã, Aimaás inikiaki. Hanua Saulũ detenamenikabũ shanẽ iburã, Abner inikiaki. Hawẽ eparã, Ner inikiaki, Saulũ epa betsarã.

⁵¹ Abielĩ bake daberã, Ner inũ Quis inibukiaki. Quisrã, Saulũ epa inikiaki.

⁵² Saul hanua shanẽ ibuima hiwekũkaĩkĩ Filisteu nawabube detenamei heneama mesebiakẽ Saulũ huni kushipabu katutã hau habetã Filisteu nawabu detenũbũ hatu itxawakubainikiaki.