1 Samuel 13 - Kaxinawá Bíblia (BR)

Filisteu nawabube Israelĩ enabu ana detenamenibukiaki, na hãtxarã

¹ Saul huni ewakaĩkĩ Israelĩ enabu yunukĩ taewai shanẽ ibuima ano itxapa kariama

² detenamenika hau ikubaĩshanũbũ Israelĩ enabu 3.000 huni detenamenikabu katukẽ Betel manã mati matipa anu mae betsa Micmás anu 2.000 detenamenikabu habe bashikuabu hanua 1.000 detenamenikabu hawẽ huni bake iyua Jônatasbe hawẽ epa Saulũ yunua Benjamimnẽ enabũ maiwã pakea Gibeá anu hari hatu binukĩ keshemai kakẽ hanua hatiri yurabu tesheabu hau hatũ hiwetã bunũbũ Saulũ hatu yunua buabũ

³ Filisteu nawa detenamenikabu Gibeá anu kesheabu Jônatasã hawẽ detenamenikabubetã hatu detekĩ Gibeá anua hatu nitxĩkĩ keyua hatu haska wa hatũ maewã anushũ Filisteu nawa shanẽ ibubũ nĩkatã unaĩbũ hanushũ Hebreu nawabũ hau nĩka keyubaunũbũ Israelĩ enabu maiwã pakea tibi anushũ hau txashuwã mashũ txã txã akubaunũbũ Saulũ hatu yunua

⁴ hatu banabimabaũkĩ: —Filisteu nawa detenamenikabu Saulũ hatu detekĩ keyushinawẽ taea Filisteu nawa dasibibu Israelĩ enabuki sinatahairaibũ Gilgal anu dasibibu Saul anu ma itxakanikiki— hatu wabu ma nĩkakĩ keyuabũ

⁵ Filisteu nawabu Israelĩ enabube hatuberi detenamerianũ ishũ hawenabu 30.000 detenamenikabu cavalo tarãtiki mapuabu inũ, 6.000 detenamenikabu cavaloki katsaumeabu inũ, detenamenikabu maĩ bunikabu ianẽwã kesha anu mashi keska tsuã hati hatu tanatiruma hatu yunukĩ Filisteu nawa shanẽ ibubũ hatu itxawabu hati hayabu Micmás anu mapekebaini hikishũ mae betsa bari huaikiri Bete-Áven anushũ hatũ tari hiwe pũtebaunabũ

⁶ Israelĩ enabũ hatu uiã mesehaira dakakẽ uĩ datei pashai hunenũ ika mishki tãpe anu inũ, mai kini shãtu anu inũ, mashash mananã inũ, mai shãtu keru anu inũ, txatxa ũpash anu hunei iruabũ,

⁷ hatiri itxapa pashai Hene Jordão pukebaini bui maiwã pakea Gade inũ maiwã pakea betsa Gileade anu iruabũ hakia Gilgal anu Saul bashikua hawẽ detenamenikabu habe bashikua datehairai saki saki iki keyuaibũ

⁸ haska Samuelĩ yubakĩ hanu yuishina 7 dia Saulũ manabia hakia Samuel Gilgal anu huriamakẽ hunibu bestibu tibi inũ bui taewaibũ

⁹ hanushũ Saulũ yunukĩ hatu yuikĩ: —Inabu ea beshũrikãwẽ. Hawẽ sheni menu keyushũ hawẽ daewati nami nũ pinũbunã— hatu wa beshuãbu tesẽshũ hawẽ sheni dashpeshũ inãbu Saulũ ibubis hawẽ sheni menu

¹⁰ keyuaya Samuel hui hikiaya ikĩ haki nukui kashũ Saulũ pe hãtxa wabia

¹¹ Samuelĩ hawaira yuikĩ: —Haskakĩ mĩ haska washumẽ?— aka kemakĩ Saulũ yuikĩ: —Huni bestibu tibi inũ bui taewaibũ ẽ uiã haska mĩ ea yubakĩ yuishina ma binuaya mĩ huriama Micmás anu Filisteu nawabu mirima itxai keyuaibũ

¹² Senhor Deus ea akĩ merabe ẽ yukariama nenu Gilgal anushũ ea dukũ Filisteu nawabũ ea detetirubu shinãkĩ hani haskatima ibubis ina hawẽ sheni Senhor Deus ẽ menukĩ keyushũshuki— aka

¹³ Samuelĩ Saul kemakĩ: —Na haska mĩ ashurã, mĩ atimapahairashuki. Haska Senhor Deusũ mia yunuima mĩ kaneama ishurã, mĩ Israelĩ enabu shanẽ ibu niti ikama ikũkaĩkeanaii.

¹⁴ Hakia mĩ shanẽ ibui taebiaimakẽ minaburi ikubainama ishanikiki. Haskawẽ taeshũ huni betsa pepa haska betxipaiai keska ashũtiru Senhor Deusũ ana katushanikiki, Israelĩ enabu shanẽ ibu betsa mistukinã— abaini

¹⁵ hanira kai Gilgal anua Samuel kaĩkaini kaya, detenamekatsi pewatã detenamenikabũ Saul txibaĩ Gilgal anua kaĩbaini bui Benjamimnẽ enabũ maewã Gibeá anu hikiabũ hanushũ hawẽ detenamenikabu habe bekĩ txibãbu Saulũ hatu tanabaũkĩ 600 hunibu uiãyã

¹⁶ Saul inũ hawẽ huni bake iyua Jônatas inũ hatube beabu Benjamimnẽ enabũ maewã Gibeá anu niti ishũ manayuaibũ Filisteu nawabu Micmás anu hatũ tari hiwe pũtebauna maniabũ

¹⁷ hakia 3 detenamenika shuku haya habu tibi pashkabaini betsa maiwã pakea Sual anu mae betsa Ofrakiri butanũbũ

¹⁸ hanua shuku betsa Bete-Horomkiri butanũbũ hanua shuku betsa hanu tsua hiweabuma anu kesha Zeboim pashku napãpakiri bui hanushũ uĩbaũtirubu anu mananã hikiabũ,

¹⁹ matxatu txaipa kenuhaira inũ hashi Israelĩ enabu, Hebreuburã, hau detenameti dami wayamanũbũ Filisteu nawabũ hatu nemamisbuwẽ taea Israelĩ enabu maiwã pakea hirabi anu ferro mane kenuti mabu wanika tsua hayabumakẽ,

²⁰ hatũ kenu mabu dayati sharabu kenunũ, iwanã, Filisteu nawabũ hanushũ ferro mabu wamis inũ hanushũ kenumis anu hatũ dayati mabu hau bunũbũwẽ,

²¹ mai pukĩti betsa betsapa kenushũ pei heshe dabe hatu yuka pakamamisbu inũ, due inũ txatxiti kenukĩ pei heshe bestitxai hatu yukakĩ pakamamis ipaunibukiaki.

²² Haskawẽ taea habũ Saul inũ hawẽ bake Jônatas txibãbu habu hawa deteti kenu hayabumakẽ Saul inũ Jônatas besti matxatu txaipa kenuhaira inũ hashi hayabukẽ

²³ Filisteu nawabu kushibaĩ Micmás anu mati dabe namakis napaku anu hanu bai kati anu tsuã hatu nemama hikiabũ