1 Samuel 12 - Kaxinawá Bíblia (BR)

Saulũ hau hatu yunukubaĩshanũ shanẽ ibu kushipa wakĩ Samuelĩ Saul yununikiaki, na hãtxarã

¹ Haska wai menei keyutã Israelĩ enabu dasibi Samuelĩ hatu yuikĩ: —Dasibi mã ea yukai nĩkaimashũ matu merabewakĩ shanẽ ibuhaira kushipa ẽ ma matu katushũshinaki, na mã uiainã.

² Matu hatũ yunukubaĩshanũ yununika shanẽ ibu kushipahaira mã ma hayaki. Hamẽ earã, ẽ ma matu anibushunaki, ẽ bu siũ siũpairã. Hakia ẽ bakebu ma huni ewabu matube hiwekanikiki. Berunãtũ ẽ matu yunutiani na habiatiã matu bebũ nishũ ẽ ma matu heneaii.

³ Na habiatiã ẽ nenuki. Haskara ẽ matu akubirãshinamẽkaĩ, ea yuikãwẽ. Tsuã ina awa kasmai jumento ẽ biaĩmamẽkaĩ, bika tenemakĩ tsua ẽ itxakawaimamẽkaĩ, hawa txakabu hau hatu unãyamanũ hune hatũ pei ẽ biaĩmamẽkaĩ, Senhor Deus bebũ inũ matũ shanẽ ibuhaira Senhor Deusũ katuima bebũ ẽ tsuara haska waimarã, shabakabi ea yuikãwẽ, mã huni betsa ẽ haska waima ẽ diriarã, hawara pepawẽ ẽ matu pakairã— hatu waya

⁴ habũ kemakĩ yuikĩ: —Bika tenemakĩ itxakawakĩ mĩ shinã betsa wanũ, iwanã, pei mia inaĩbu bikubirãkĩ mĩ nuku haska waismaki— akabu

⁵ Samuelĩ ana hatu yuikĩ: —Haskakenã, ekiri txakabu mã betxiamarã, Senhor Deus inũ matũ yununika shanẽ ibuhaira Senhor Deusũ katuimatũ habias unãkanikiki, txakabuwakĩ ẽ hawa kaneismarã— hatu wa habũ kemakĩ: —Haa, txanimaki— akeakeaibũ

⁶ Samuelĩ ana hatu yuikĩ: —Moisés inũ Arão Senhor Deusũ hatu kushipa watã hatu merabewakĩ Egito anua Senhor Deusũ matũ shenipabu hatu tashnimabiraniki.

⁷ Haskawẽ taeshũ matũ shinã pewakĩ ea nĩkahairakubaĩkãwẽ. Senhor Deusũ nuku nĩkaya haska wakĩ matũ shenipabu inũ maturi Senhor Deusũ duawakubirãmiskiri yuikĩ ẽ matu shabakabi washunai ea nĩkakãwẽ.

⁸ Jacó inũ hawẽ bakebu inũ hawẽ bababu Egito anu hikiabu txipu hatu itxakawakubainaibũ hau hatu merabewanũ matũ shenipabu kashakĩ yukaibu Senhor Deusũ Moisés inũ Arão hatu anu yununikiaki. Egito anua ha dabetũ matũ shenipabu iwekubirãkĩ na mai anu matũ shenipabu hatu hiwemanibuki.

⁹ Hakia Senhor Deus hatũ mekenika Deus matũ shenipabũ hakimanibuwẽ taeshũ hatu kupikĩ Hazor anu Jabim shanẽ ibũ detenamenikabu shanẽ ibu Sísera Senhor Deusũ yunukĩ, Filisteu nawaburi yunukĩ, Moabe nawa shanẽ ibuburi yunukubainaya matũ shenipabuki sinatakĩ hatu detekubainaibũ

¹⁰ hakia txipu huĩti nishmashũ haska ma kaneshina Senhor Deus yuikĩ: “Mia danãkĩ mia henebaĩ yushibu Baal inũ Astarote kẽwãkubirani nũ txakabuhairaimaki. Nukuki sinataibu nuku nemashũwẽ, hau nuku ana yunuyamanũbunã. Mĩ nuku haska washuna mia besti duawakatsis ikĩ nũ mia yubaii”, akabu

¹¹ Mã unanuma hiwekatsis ikaiwẽ taeshũ Senhor Deusũ matu nĩkatã matuki sinatakĩ matu itxakawaibu hau habũ matu nemashũkubainũbũ Gideão Jerubaal inũ, Baraque inũ, Jefté inũ, ea Samuel Senhor Deusũ nuku yunuakeakekubaĩshinaki.

¹² Hakia matũ mekenika Senhor Deus matũ shanẽ ibu kayabibiakẽ Amom nawabu shanẽ ibu Naásũ matu detenũ ika hawẽ detenamenikabu matu dapi iweaya uĩ hatuwẽ datekĩ hau hatũ nuku yunukubaĩshanũ yununika shanẽ ibu kushipahaira nuku katushũwẽ, iwanã, mã ea yukaimaki.

¹³ Haska betxipaikĩ matũ yununika shanẽ ibu mã katuimarã, na ma nia. Haska mã ewẽ taeshũ mã yuka Senhor Deusũ ma matũ shanẽ ibu katushũ yunushinaki.

¹⁴ Natiã mã ha txibãtirubuki. Matu inũ matũ shanẽ ibu Saulũ Senhor Deus kẽwãkĩ, hawẽ hui nĩkakĩ, hawẽ yunuti inũ hawẽ nemati hãtxa danãma haska matũ mekenika Senhor Deusũ shinaĩ keska txibaĩ unanuma matũ yununika shanẽ ibube pe mã hiwekubaĩtirubuki.

¹⁵ Hakia nĩkabiakĩ hawẽ yunuti hãtxa inũ hawẽ nemati hãtxa mã danãkĩ mã txibãmarã, matu inũ matũ shanẽ ibuhaira Senhor Deusũ matu kupishanikiki, matũ shenipabu kupini keska wakinã.

¹⁶ Eskatiã hawẽ dateti dami ewapahaira Senhor Deusũ matu uĩmaikiki. Habianu tukuama mapushũ uĩyukãwẽ.

¹⁷ Ikis shekiwã trigo tsekamisbutiã ui ismaki. Txanimamẽ? Hakia na habiatiã ẽ Senhor Deus yukaiwẽ taeshũ uiyabi kana tũ imakĩ Senhor Deusũ ui yunuikiki, ikisrã. Shanẽ ibu kushipa betsa ea yukai mã txakabuhairaimaki. Natiã mã tapĩkĩ unãtirubuki, Senhor Deusũ matu uĩmayarã— hatu watã

¹⁸ Samuelĩ Senhor Deus yuka hawaira uiyabi kanatũ imabaĩbainaya Senhor Deusũ ui inũ kana tũ imabaĩbainaiwẽ taea Senhor Deuski inũ Samuelki dasibi datehairakĩ

¹⁹ dasibibũ Samuel yuikĩ: —Txakabu hayahairabia shinã txakakĩ ana nukũ txakabu matsãkĩ hamamaki nũ yununika shanẽ ibu kushipahaira yuka ikima ha shinãma hau nũ mawayamanũ mĩ Shanẽ Ibu Senhor Deus ea akĩ nuku yukashũwẽ, nũ mĩ tsumaburã— akeakeabu

²⁰ Samuelĩ kemakĩ ana hatu yuikĩ: —Dateyamakubaĩkãwẽ. Txanimaki. Mã txakabuhairaimaki. Hakia ikis Senhor Deus heneama, matũ shinã dasibiwẽ ha besti kẽwãkĩ ikũwãkubaĩshãkãwẽ.

²¹ Ana yushibu dami hawẽ parananaĩbu hiwea hayama txibãkĩ kẽwãyamakubaĩshãkãwẽ. Hiwea hayabumawẽ taeshũ hatũ matu mekekĩ merabewatirubumaki.

²² Senhor Deusũ matu hawenabu waniwẽ taeshũ hawẽ kena pepawẽ shinã betsa wama matu henebainamaki.

²³ “Senhor Deus ẽ matu ana yukashunamaki”, iki ea ẽ txakabukatsi ikamaki. Senhor Deus matu yukashuni ẽ henekatsi ikamariki. Haskawẽ taeshũ bebũkiri pe hiwekaĩkĩ mã kaneama ishanũbũ ẽ matu yusĩkubiranaii.

²⁴ Matuwẽ taeshũ haska Senhor Deusũ akubirãmis shinãhairakubaĩkĩ datekĩ txanima kayabi Senhor Deus besti kẽwãkubaĩshãkãwẽ, shinã betsa wamarã.

²⁵ Hakia Senhor Deus henekĩ mã ana txakabuwakĩ taewaya matu inũ matũ shanẽ ibu bena kupikĩ Senhor Deusũ matu matsukĩ akawashanikiki— anikiaki.