1 Samuel 11 - Kaxinawá Bíblia (BR)

Amom nawabu Saulũ hatu maemanikiaki, na hãtxarã

¹ Amom nawa shanẽ ibuhaira Naásũ Israelĩ mae betsa detetã hatu mebinũ, iwanã, hawẽ detenamenikabu hatu pewatã maewã Jabes-Gileade anu hatu iweshũ hatu keshemabaunawẽ taeshũ Jabes anua anibu unanepabu kashũ Naás yuikĩ: —Nukube yubakawe, mĩ dayaru nũ ikũkaĩshanairã— akabu

² Amom nawa shanẽ ibu Naásũ hatu kemakĩ yuikĩ: —Matube yubakakatsi ikirã, ha dukũ matũ beru yusiuria matu tseka keyu bestitã hanu ẽ matube yubakatiruki. Israelĩ enabu dasibi ẽ hatu itxakawa haska mapuabu hatuki kasheabu dakeaibu ẽ uĩkatsis ikaii— hatu wa

³ haska hatu wa nĩkatã Jabes anua anibu unanepabũ kemariakĩ yuikĩ: —7 dia nuku manayuwe. Mĩ nuku manaya hau nuku merabewai benũbũ Israelĩ enabu maiwã pakea tibi anu kashũ mĩ hãtxa nũ hatu nĩkamayui kairã. Nuku merabewai beabumakẽ haska mĩ nuku yuishu keska nũ mia nemama mĩ nuku itxakawatiruki— akabu hatũ hãtxa Naásũ nĩkatã: —Peki— hatu wa

⁴ mae Gibeá hanu Saul hiwea anu habũ kaka bui hikishũ hanu hiweabu hatu banabimakĩ keyubaunabu, nĩka keyutã dasibi datei kasha txakayamaibũ

⁵ Saul hawẽ bai anu dayatani hawẽ ina awa dabe hi tekishkũyã dabeyabe hui yuka ikĩ: —Nukunabu haskaimẽkaĩ? Haskai kasha txakayamakanimẽkaĩ?— hatu wa Jabes anua hunibu hushũ hatu kaka yuikãshu habias kaka Saul banabimabu

⁶ Saulũ nĩkatanaya habiatiãri Deusũ yushinĩ kushipa wakĩ Saul atxiaya Saul sinata paepakaũkĩ

⁷ hanushũ matxatu txaipa kenuhairawẽ ina awa dabe tesẽshũ ha dabe meshte meshte atã Israelĩ enabu maiwã pakea tibi anu nami meshte tibi hau hatu inãkĩ eska hatu yuiakeakebaũtanũbũ hatu yunua bushũ hatu yuikĩ: “Saul inũ Samuelbe mã itxai beabuma tsuabũra mã hatu txibãma na ina awa meshte nũ matu beshũshu keska wakĩ Saulũ matũ ina awa tenãkĩ akawakĩ matu kupishanikiki”, akĩ hawẽ hãtxa bunikabũ hatu yuikubaunabu nĩkai datehairai huni bestitxai keskai dasibi hanus bei Saul inũ Samuelki itxai keyuabu

⁸ nĩkatã beabu Bezeque anushũ Saulũ hatu tanakĩ Israelĩ enabu 300.000 hunibu tanatã Israelĩ bake Judá enabu tari hawenabu tanakĩ 30.000 hunibu tanariashũ

⁹ Jabes-Gileade anuabũ kaka bei txani beshiãbu hatu yuikĩ: —Meshukiri bari mananãbitiã nũ matu merabewai kashanaii. Bushũ na habias kaka nukunabu Jabes anua hatu yuiri bukãwẽ— hatu wa bui hikishũ Jabes anu hiweabu habias hãtxa hatu banabimabu nĩkatã benimahairatã

¹⁰ hanushũ Amom nawa shanẽ ibu Naás anu bushũ parãkĩ yuikĩ: —Meshukiri mia anu nũ hushanaii. Nuku atxitã haska mĩ nuku wakatsi ikai keska nuku ashãwẽ— akabu nĩkatã Naásũ hatu manaya

¹¹ ushashĩkĩ Saulũ hawẽ detenamenikabu hatu pashkakĩ 3 shuku watã hune hatu iyukĩ meshu merã hawa hãtxai banama ma pena kemaya Amom nawabu bestẽriabuma anu hatũ tari hiwe pũtebaunabu anu hikibaĩkĩ hatu detetiyashũ hatu detekubaĩkĩ bari mananãbi hatu keyuabu Amom nawabu hatiri pashai kushibaini besti dasiabu hawa huni dabe nia tsuã betxiamakẽ

¹² txipu hawenabu betsa betsapabũ Samuel yuikĩ: —“Saul nukũ shanẽ ibuhaira kushipa itirumaki”, habu ikimaburã, ana haska hakiri shinã txakatirubumaki. Tsuabura hakiri hãtxa txakabuimabumẽkaĩ, nuku yunukãwẽ, nũ hatu detekĩ keyuairã— iake iakebiaibũ

¹³ shinã txakai hãtxaibu Saulũ hatu nemakĩ: —Israelĩ enabu Senhor Deusũ ma nuku merabewashũwẽ taea ikis tsua ana mawatirubumaki— ikaya

¹⁴ hawaira Samuelĩ dasibi hatu yuikĩ: —Nenua Gilgal anu bushũ Saul nukũ shanẽ ibu kushipahaira dasibi hatu unãmakĩ taewarinũ bukãwẽ— hatu wa,

¹⁵ nĩkatã dasibi Gilgal anu bui mapekei hikishũ Senhor Deuski nukuti tari hiwe bebũshũ dasibibũ yuikĩ: “Saul nukũ shanẽ ibu kushipahairaki”, atã hanushũ inabu tesẽshũ hawẽ nami bawashũ pi besi Saul inũ Israelĩ enabu dasibi Senhor Deus daewai habe haibunamei benimahairanibukiaki.