1 Samuel 10 - Kaxinawá Bíblia (BR)

Israelĩ enabu hatũ shanẽ ibu kushipahaira washũkĩ Deusũ Samuel Saul katumanikiaki, na hãtxarã

¹ hanua ha dabe niti itã bishtu oliva sheni mata Samuelĩ bitã Saul mashu atã hatũ beya txibãkĩ tãtsu akĩ yuikĩ: —Senhor Deusũ mia katukĩ meribi waikiki, Israelĩ enabu, hawenabukirirã, shanẽ ibushũkĩ mĩ hatu yunubaĩshanunã. Hatu yunukubaĩkĩ tsuabura hatuki sinatakĩ minabu itxakawakĩ bika tenemakubaini hatu dapi hiwebaunabu nemakĩ hatu henemakĩ keyukĩ Israelĩ enabu mĩ yunukubaĩshanaii. Eska ikis ẽ mia yuiai keska mĩ haki nuku akeakekainai ẽ mia shinãmaii, hawẽ unãti tibirã, haska Senhor Deusũ mia ma katua mĩ kairã.

² Ea anua mĩ ma ka, Benjamimnẽ enabu maiwã pakea Zelza anu hanu Raquel mai wanibu dapi huni dabeki mĩ nukui kaii. Ha dabetũ mia yuikĩ: “Jumenta mĩ benakubaũtanairã, ma betxishinabuki. Hakia mĩ epã jumentakiri ana shinãma matu dabekiri besti shinãhairaikiki, ‘Ẽ bake haskatã hatu betxipa?’ ”, iwanã, “mia shinaĩkiki”, akĩ mia haska wabu

³ nĩkabaini ana unuri bai tanabaini kai Tabor anu hi ewapa kushipa hawẽ kena carvalho anu 3 huniki mĩ hatuki nukui kaii. Habũ Deus kẽwaĩ Betel anu mapekei bei ha dukũ bebukirãkĩ 3 cabra bake iabainũ hanua betsã 3 misi ewapa tsumashũ benũ hanushũ betsãri txashuwã bitxi sakuki vinho mata iabiranai mĩ hatuki nukuaya

⁴ habũ mia yukakĩ: “Haskaramẽ?” mia watã mia misi dabe inãshãkanikiki. Bishãwẽ.

⁵ Ana kakũkaini mae betsa Senhor Deusũ Gibeá hanu Filisteu nawa detenamenikabũ keshea hiweabu anu mĩ ma kemai hikikẽ meribi mananã anua Deusũ hãtxa yuishunikabu nishi paewẽ paeã keska benimai butubiranai bei Deuskiri hãtxai bekubiranaibũ hatu bebũ harpa inũ xaxa ati inũ teperewe inu mimawati betsa mawakubiranaibuki mĩ hatuki nukushanaii.

⁶ Hatuki mĩ nukukẽ Senhor Deusũ yushinĩ mia kushipawaya Deusũ hãtxa yuishunikabu paeã keska hatube benimai habu betsa keskai mĩ huni betsahaira ishanaii.

⁷ Haska mia wa kaimashũ mĩ hatũ hiwea merabewakatsi ikai, pepakĩ hatu ashũkubaĩshãwẽ, Deusũ mia merabewakubaĩshanikikirã.

⁸ Mĩ haskakaĩshina bebũkiri Gilgal anu kashãwẽ, hari ana ẽ miki nukui kashanaii. Harishũ mibetã inabu sheni menukĩ keyutã hawẽ nami Deus daewati inãkuĩkĩ nũ daewashanaii. Harishũ 7 shaba ea manashãwẽ, ẽ kai miki nukushanairã, mĩ haska wakubaĩshanai harishũ shabakabi ẽ mia ana yui kashanairã— aka

⁹ —Ma ẽ kaii— abaini Saul kaya Deusũ Saul hawaira shinã betsa wamashũ haska hawẽ unãti Samuelĩ Saul yuishu Deusũ dasibi uĩmakubirãshu

¹⁰ hanua hawẽ dayarube Saul Gibeá ma kemai kai Deusũ hãtxa yuishunikabu benimabirani Saulki nukuabu Deusũ yushinĩ Saul betsa wakĩ kushipa wa nishi paewẽ paeã keska benimakĩ hatubetã Saulũ Deus kẽwãkubainaya

¹¹ Saul uĩkubirãmisbũ hatube Saul ikai uĩ habu yuka ikĩ yuikĩ: “Quisĩ bake haskai ikimẽkaĩ? Saulrã, habiari Deusũ hãtxa yuishunikari ikimẽkaĩ?” iake iakeaibũ

¹² huni betsã ana hãtxa betsawẽ yuikĩ: “Habũ eparã, tsuamẽ, hatũ hatu kushipa wairã?” hanushũ shinãkubiranibu yuikĩ: “Saulrã, habiari hawenabu Deusũ hãtxa yuishunikari ikimẽkaĩ”, iwanã, yuiakeakepaunibukiaki.

¹³ Deusũ hãtxa yuishunikabubetã Deus kẽwãkĩ keyutã hawẽ epã hiwe anu Saul kai hikia

¹⁴ hawẽ kukã Saul inũ hawẽ dayaru yukakĩ: —Mã hani katãshinamẽ?— aka kemakĩ Saulũ yuikĩ: —Jumenta benakubauni nũ hawa betxiama kawãtãshinaki. Hakia Samuelki nũ nukutãshinaki— aka

¹⁵ hawẽ kukã ana yukakĩ: —Hawa Samuelĩ matu yuishinamẽkaĩ, menã ea yuirikãwẽ— hatu wa

¹⁶ kemakĩ Saulũ yuikĩ: —“Matũ jumenta ma betxishinabuki”, iwanã, besti nuku yuishinaki— aka hakia Israelĩ enabu yunushanũ haska Samuelĩ yuishinakiri hawa yuiama ishĩkẽ

¹⁷ hanushũ hau Senhor Deus kẽwãkĩ duawai benũbũ Mispa anushũ Israelĩ enabu Samuelĩ hatu kena

¹⁸ bei itxabu hatu yuikĩ: —Eska Israelĩ mekenika Senhor Deusũ ea yuishina matu yuinũ ea nĩkakãwẽ. “Matũ shenipabu Israelĩ enabu tashnimakĩ ẽ hatu iweniki, Egito anuarã. Egito nawabũ hatu ana atxipaiaya ẽ kushipawẽ ẽ hatu yamawaniki. Bekubiranaibu nawabu shanẽ ibu tibibũ hatu itxakawapanãbũ ẽ hatu maemashũkubiraniki”, ea washiãki.

¹⁹ Hakia habũ matu txakabuwakĩ bika tenemaibu matũ mekenika Deusũ matu merabewakĩ matu nemashũbiakubirana ha besti txitikatsi ikama natiã mã ha danãkĩ yununika shanẽ ibu kushipahaira mã ea yukaimawẽ taea na habiatiã Senhor Deus bebũ Jacó huni bake tibitũ enabu shukuabu tibi itxatã hanua hawenabu tibi anua Senhor Deus bebũ hau bebirã bebiranũbũwẽ— hatu wa

²⁰ Samuel hatu yunuaya Jacó huni bake tibitũ enabu bebirã bebiranaibu hawẽ unãti betsa watã haya inũ hayama watã Benjamimnẽ enabu anua Samuel hawẽ hatu katutã

²¹ ana hatu yunuaya Benjamimnẽ enabu shukuabu tibi pashkatã hawenabu nãtakea tibiri bebirã bebirãriaibũ hawẽ unãti watã Matrĩ enabu nãtakea Samuelĩ katushũ ana hatu yunuaya Matrĩ enabu hiwe ibu bestibu tibi bebirã bebirãriaibũ hawẽ unãti ana habiaskari watã Samuelĩ Quis katushũ hawẽ huni bake kena tibi hau yuinũ Samuelĩ Quis yunua hawẽ bakẽ kena tibi Quisĩ yuikubainaya habiatiãri hawẽ unãti Samuelĩ ana watã Saulũ kena tashnikẽ Saul benabiabaunabu hawa betxiabumawẽ taeshũ

²² ana Senhor Deus yukakĩ: “Saulrã, hani nũ haki nukutirumẽ?” akabu hatu kemakĩ Senhor Deusũ hatu yuikĩ: “Ma huaki. Ha mabu mania namã anu ma huneaki”, hatu wa,

²³ kushikaĩ hanu hunea anu kashũ Saul tashnimatã iwekĩ Israelĩ enabu itxabu bebũ nitxiãbu Saulũ keyatapa Israelĩ enabũ tsuã binuama hawẽ pũti anu kesubaĩbainabu dasibibũ uiaĩbũ

²⁴ Samuelĩ hatu dasibi yuikĩ: —Matũ yununika shanẽ ibu kushipahaira ikũkaĩshanũ na huni Senhor Deusũ ma katushu mã uiaiĩ. Israelĩ enabu tsua haska keska hayamaki— hatu wa kemakĩ hui kushipawẽ dasibibũ yuikĩ: —Bari itxapa hau hiwepakeshanũwẽ, nukũ shanẽ ibuhairarã— akĩ keyuaibũ

²⁵ hawara shanẽ ibuhairatũ akubaĩtiru inũ hawara atiruma Samuelĩ hatu dasibi yusĩkĩ tapĩmatã habias hãtxa dasibi unaki keneshũ Senhor Deuski nukuti tari hiwe anu arutã dasibi hatũ hiwe anu hau bunũbũ Samuelĩ hatu nitxiã buaibũ

²⁶ ha dikabi hawẽ hiwe Gibeá anu Saul kariai huni detenamenika betsa betsapa habe hau bunũbũ Saul betxipaimakĩ Senhor Deusũ hatũ shinã Senhor Deusũ pepa wa Saul txibãbainabũ

²⁷ hakia hãtxa txakabukĩ yuãmisbũ yuikĩ: “Hatũ nuku mekekĩ yunushanaimẽkaĩ, ha huninã?” akeakekĩ danãkĩ hawẽ kẽwãti inãkuĩti bushuãbuma unãbiakĩ Saulũ hawa yuiama inikiaki.