1 Reis 2 - Kaxinawá Bíblia (BR)

Hawẽ henekĩ Davĩ hawẽ bake hãtxa wakĩ yununikiaki, na hãtxarã

¹ Davi ma mawa kemashũ unãkĩ hawẽ bake Salomão Davĩ yunukĩ:

² “Ma ẽ mawa kemaii. Yura dasibibu imisbu keskai nukũ shenipabuki ẽ nukui kashanaii.

³ Eamaki mẽtsisipai huni kushipakũkaĩshãwẽ. Hanira mĩ kai inũ hawara mĩ akubainai hau Senhor Deusũ mia merabewakubaĩshanũ haska Moisĩ keneni hawẽ yunuti inũ hawẽ nemati inũ dasibi haska betxipaiai unãkĩ haska mĩ mekenika Senhor Deusũ mia yunuai keska besti akubaĩshãwẽ.

⁴ Senhor Deusũ bebũkiri ea yubaniwẽ taea mã ẽ bakebũ matũ shinã hirabiwẽ inũ matũ yushĩ hirabiwẽ mã enabu pakubaĩkĩ hawa txakabuwama txanima ibubis mekei pe hiwekũkaini mã enabu Israelĩ enabu shanẽ ibuhairai ikubaĩshãkanaii, hawa heneama ipakeirã, mã Senhor Deusũ hãtxa txibãkubainaiburã.

⁵ Betsarã, eska wakĩ ẽ pui Zeruiã bake Joabẽ ea dake wani mĩ unaiĩ. Ẽ detenamenikabu shanẽ ibu dabe Ner bake Abner inũ Jéterĩ bake Amasa hanu unanuma hiweabũ hatu parãtã ha dabe Joabẽ txatxi dabekĩ hatu tenaniki, detenamekĩ hawenabu tenaĩbuwẽ taeshũ Joabẽ hatu kupikinã. Haska wakĩ hatu parãkĩ shabakabi txatxishũ Israelĩ enabu dasibi Joabẽ ekiri hatu txakabu shinãmaniki.

⁶ Joabẽ hatu tenani txakabukẽ eã ẽ hawa wamahairawẽ taeshũ hau unanuma Joabe mawayamashanũ unanepakaĩ hau hatũri bika tenenũ bika tenemakĩ Joabe tenãshãwẽ, ea kupishũkinã.

⁷ Hamẽ betsarã, yura betsabu habũ ea duawanibu ea haburi pepa washũkubaĩshãwẽ. Mĩ betsa Absalão anua ẽ pashaima Gileade mai pakea anushũ Barzilai ewẽ nuikĩ hawara nũ hayama nuku inãkĩ ea mekekubainimawẽ taeshũ Barzilaĩ enabu duawakubaĩshãwẽ. Jerusalém anu hawẽ huni bakebu bai beaibu hatu itã mĩ tapu anushũ hatubetã pikubaĩshãwẽ.

⁸ Hanua huni betsã ea haska wani uĩwẽ. Benjamimnẽ enabu betsa Baurim anu hiweni hawẽ kena Gerã huni bake Simei nenu Jerusalém anu mibe hiweaki. Absalão shanẽ ibuaitiã pashai Maanaim anu ẽ kaya ea txakabuhairawakĩ ea yupukubaĩyamaki. Absalão enabu, enabũ hatu maemaimakẽ nũ ana txĩtũkiranaya Hene Jordão anu eki nukukĩ ea ikashũ ea daewakĩ ẽ Simei tenãyamanũ ea yuka Senhor Deusũ ea nĩkaya ẽ habe yubakayamaki.

⁹ Habiaskabiakẽ Simeĩ ea txakabuwayamarã, miarã, hakimayamashãwẽ. Miarã, mĩ unanepaki. Haska mĩ wakatsis ikai kupishãwẽ. Hau unanuma mawayamashanũ Simei bika tenemakĩ hatu tenãmashãwẽ”, aka

Davi mawanikiaki, na hãtxarã

¹⁰ Davi hatũ shenipabu anu itxai kai unanuma mawa Jerusalém anu hanu ha dukũ mishkiwẽ hatu kenemabaunibu anu hawẽ kena bena wakĩ: “Davĩ Maeki”, anibu anu hawẽ yura maiwanibukiaki.

¹¹ Shanẽ ibuhairai taei Hebrom anu 7 ano itã hanua maei Jerusalém anu 33 ano ikũkaini habiati dasia 40 ano Israelĩ enabu Davi hatũ shanẽ ibuhairashũkũkainikiaki.

¹² Txipu Davi mawariama hawẽ epã shãtukũ Salomão shanẽ ibui taekaini kushipakũkaini shanẽ ibuai tsuã mebĩtiruma pepa inikiaki.