1 Pedro 5 - Kaxinawá Bíblia (BR)

Mekenikabu hatu yusĩnikiaki, na hãtxarã

¹ Nukũ Shanẽ Ibu Cristo nuku yumãshunai ẽ uĩniwẽ taeshũ natiã habuã mae tibi anushũ Cristo ikũwaĩbu matu mekenikabu ẽ matu hatu yusĩ pewakatsis ikai ea nĩkakãwẽ. Eari Cristo ikũwaĩbu ẽ hatũ mekenãriki, habu keskarirã. Ha inũ, Cristo shanẽ ibuhairai hukĩ hawẽ kuxipa nuku uĩmaya eari ẽ hatube benimatxakayamashanaii.

² Deusũ enabu txashuwã keska matube hiweabu Deusũ matu yununi hatu mekeirakubaĩkãwẽ, mã haska pe xinãkĩ hatu merabewakatsi ikairã, haska Deusũ abuai keska wakinã. Hatu yunu bestiama inũ pei binũ ika kemuama hakia xinã tibi wama pe bestiwẽ nuikĩ hatu pe mekekĩ ashũkubaĩkãwẽ.

³ Ha inũ, maturã, habu matube itxamisburã, mã hatũ ibumaki. Haskawẽ taeshũ matũ hiwea pepa hatu uĩma bestikĩ txibãmakubaĩkãwẽ, hatube merabenãkinã.

⁴ Hanua mekenika kayabi Shanẽ Ibu Cristo hushũ mã hamapai binumisbu kupiti pepawẽ matu manakukĩ maiti hawẽrua keska txaputima matu inãshanikiki, Cristobe matu txashakapawakinã.

Ikũwaĩbu txĩtũtimakiri yusĩnikiaki, na hãtxarã

⁵ Habiaskariakĩ habuã mã hatu txibaĩbuũ, mekenikabũ matu yusĩkĩ yunumis nĩkatã hatũ hãtxa txibãkubaĩkãwẽ. Dasibi mã habũ ikũwaĩburã, babutã keãma nĩkakanãkubaĩkãwẽ, eskawẽ taearã. Deusũ hãtxa yuishunikatũ kenekĩ: “Tsuabũra yuikĩ: ‘Hamapai betsa betsapa emebi ẽ atiruki’, ikĩ keaĩburã, Deusũ hatu beshtemiski. Hamẽ tsuabura babutã yuikĩ: ‘Deusũ besti ea merabewaya hawara txakabu hawẽ pepawẽ besti ẽ daĩbaĩtiruki’, ikaibu duawakĩ habu merabewakubaĩmiski”, iniki.

⁶ Txanima Deusũ kuxipawenã, matu ashũtiru hayawẽ taea babutã keãma manakakubaĩkãwẽ. Hanu akaitiã Deusũ matu duawakĩ shanẽ ibu wakĩ kẽwãshanikiki.

⁷ Ha inũ, hawara tibiwẽ mã bika tenei teai niti imis tibi Deus inãkubaĩkãwẽ, hatũ matukiri xinaĩkikirã.

⁸ Inu keneya pĩtsikĩ yuinaka atxitã pinũ ika benabauni pubeĩ hãsh hãsh iki tekerẽ tekerẽ imis keskakĩ diabo Satanásã matu beparãtã matu maemanũ ishũ benakubaũriaikiki. Haskawẽ taea ibubis pe mekekĩ hamapai txakabu ana meama hanũ bestẽtã uĩrakubaĩkãwẽ.

⁹ Mã ikũwaĩ mestẽtã Satanásã kemuti ana meama henei hẽ iyamakubaĩkãwẽ, na haska tibi mã meairã, matubetã ikũwaĩbu mai hirabi anuari habias keskari teneriaibu xinaĩrakubaĩkãwẽ.

¹⁰ Ha dukunã, bari itxapama mã nuitapayuaii. Deusũ haska matu memabiatã habiatũri matu kuxipa wakĩ pashkatima watã ha hawẽ mestẽwãtiwẽ matu pepa wakĩ keyushanikiki. Jesus Cristobe nũ haki dasitã hiwea ikibi iki nũ pepai kuxipashanũbũ habias Deus nuikipatũ hawena wakatsi ikĩ nuku katuniki.

¹¹ Ha nukũ Deus shanẽ ibu kuxipahairarã, hau habiaskas ikũkaĩnũwẽ, niti ikamarã. Haskakirã.

Pedro hatuwẽ nuinikiaki, na hãtxarã

¹² Nukũ betsa Silvano txĩtuĩsma ẽ yunua na ẽ hãtxa eskarabes matu keneshũshu ẽ matu anu bumai nĩkakĩ uĩshãkãwẽ. Na haska Cristo ikũwãkĩ hawẽ matu nuimai mã ikairã, txanima Deus matuwẽ nuikĩ hawẽ pepa matu uĩmaikiki. Haskakẽ hawa txĩtuĩ niti ikama mã ikubainũbũ matu merabewakĩ keneshũkĩ ẽ matu yusĩshu inũ ẽ matu mestẽwãshu hawẽ taeshũ Deusũ pepa bikubaĩkãwẽ, ha nui pae mã hayawẽ taearã.

¹³ Roma anushũ ikũwaĩbu Deusũ habu matube katuni inũ Marcos ẽ bake keskatũ hatũ hãtxa matu yunuriakanikiki.

¹⁴ Haska inũ, Cristo txibaĩbu tibi hatuki nukutã hatu danãma hatube abunamekubaĩkãwẽ. Cristo ikũwaĩ mã hawenaburã, hau Deusũ unãnuma matu hiwemakubainũwẽ. Hatiski, ẽ hãtxarã. Pedro