1 Pedro 4 - Kaxinawá Bíblia (BR)

¹ Na mai anua hawẽ yurawẽ Cristo nuitapai yumani keskai ha ini keskariakĩ matũri txibãkubaĩkãwẽ, tsuãra hawẽ yurawẽ bika betsa betsapa txakabu tibi mebiai ha txakabu Cristõ binuni mã maemariatirubukirã.

² Hatishũ matũ kemu na mai anushũ henetã hatishũra matũ hiweawẽ besti haska Deusũ xinãkĩ abuai matũ hiweawẽ dayashuni hiweyukãwẽ.

³ Hamẽ Deus mã ikũwãriama ha ikũwãbuma keska mã iriapaunibuki. Hawara hakimatixara kemuti txibaĩnã, ha inũ, kemui aĩbu tibibe menamei inũ, piti mirimawẽ kemutapai inũ, nawai beyusi paeĩ inũ, dami yushĩ kẽwaĩ mã txakabuhairai keyurianibuki.

⁴ Hakia natiã ana ha haskaibube ana hatube ketashametã mã ana hatube betsa betsapai kemutapamakẽ mã hatube ikĩ hatu uĩmapauni habu matuki ẽ hẽ ikĩ matu yuãmisbuki.

⁵ Natiã ha habu haska hiwekubaĩmisbu Deus bebunua haki txanishanaibu pewamisshũ hanu bari hawẽ heneaitiã Deusũ hiweabu inũ mawabu hatu unãti watã hatu kupishanikiki.

⁶ Hatu haska washanaiwẽ taea tsuabura hatũ yurawẽ txakabui mawa keska hiwekĩ yurabũ hatukiri uĩ hãtxabiamiswẽ taeshũ Deusũ hatu unãti watã kupitirubia hatũ xinã betsa watã hatũ yura txakabubiakẽ yusĩnanãmisbũ Cristõ kakapekiri hatu yusĩabu hatũ yura txakabubia xinã betsa watã hatũ yushĩ Deusbe hiwetirubu hatu yusĩabu nĩkanibuki.

Jesus Cristo dayashuni merabenãtikiaki, na hãtxarã

⁷ Hanua na mai keyui ma kemaya ana tatimama matũ xinãnẽ pe mekei unãnepai txanima kayabi Deusbe hãtxai heneyamakubaĩkãwẽ.

⁸ Matu dasibirã, eska besti ikubaĩkãwẽ. Hawara mã hatubetã kanemis mã nui itxapa hayarã, hawẽri matũ txakabu mã buatiruwẽ taea nuinamei inũ abuname kayabikubaĩkãwẽ.

⁹ Tsuara nia matũ hiwe anu mapekeaibu hatuki dakekenaĩ hãtxa txakabuwama hatube beyanamekubaĩkãwẽ.

¹⁰ Haska Deusũ matu kuxipa inãkĩ duawamis hawẽ dayakĩ pewakubaĩkãwẽ, hawẽ duapa kuxipa tibi ma matu inãni mã hayawẽ taeshũ betsabu uĩmai merabenaĩnã.

¹¹ Haska inũ, tsuãra yusĩkatsis ikinã, Deusũ matu yusĩmis keska besti hau hatu yusĩkubainũbũwẽ, ibubis hatũ hãtxawẽ akamarã. Ha inũ, tsuãra yura betsabu merabewakatsis ikĩ haska Deusũ matu kuxipa inãmis hatu uĩmakĩ hau hatu merabewakubainũbũwẽ. Hawara betsa betsapawẽ merabenãkĩ mã akubainairã, hawẽ Deus hatu kẽwãmakubaĩkãwẽ, Jesus Cristowẽ taeshunã. Mã hatu haska wakubainairã, Jesus Cristo shanẽ ibumis dasibi kuxipa pepa hawenaki, ikibi ini hawẽ kuxipa paepa heneismarã. Haskakirã.

Nũ Cristo ikũwaĩ nuku itxakawabu benimatikiaki, na hãtxarã

¹² Ẽ betsabu inũ ẽ puibuũ, matuwẽ nuikĩ matu yuinũ nĩkakãwẽ. Dasibi ikũwaĩbunã, bika betsa tibi nũ tenekubaĩmisbuki. Ma maturi memairã, ha bikawenã, hawẽ e iki hawẽ nuiama mestẽtã tenekubaĩkãwẽ.

¹³ Haska matu memabiabu Cristo ani keska wakĩ habiaskarianiwẽ taeshũ matu tenemariakanikiki. Haskawẽ taea Cristo shanẽ ibuhairai ana tashnikirã matu benimahairawashanai xinaĩ natiã haskawẽ benimatimabiakẽ Cristowẽ taea benimayukubaĩkãwẽ.

¹⁴ Ha inũ, mã Cristokiri yusĩkubainaibuwẽ taeshũ haska abuama tsuabura matuki sinatai ha ikaibuwẽ taea mã ma Deusũ pepa haya hawẽ benimakubaĩkãwẽ, Deusũ Yushĩ Pepatũ matu merãshũ matu henebainama hawẽ kuxipa matu uĩmakubainikikirã.

¹⁵ Matũ yura betsa nuitapairã, eskawẽ taea imisbuki, pubẽburã, yumetsuburã, itxakanikaburã, yura betsa bika waiwẽ taeshũ hatu yumãwãmisbuki. Hamẽ matu ikirã, mã hatu keska hiweamabia matu yumãwaĩburã, haska peki.

¹⁶ Haskawẽ taea mã shabakabi Cristo txibaĩbu matu nuitapa wabiaibu hatuwẽ datei dakeama mã Cristonabuwẽ taea hawẽ Deus kẽwãkubaĩkãwẽ.

¹⁷ Jesus Cristo ikũwaĩ nũ hawenabuwẽ taeshũ natiã bika betsa tibi memakĩ nuku tenemakubaĩkanikiki. Haska nũ tenebiamiskẽ Jesus ana huaya habũ Deusũ kakape danãmisburã, habu Deusũ kupiarã, haskarara Deusũ hatu kupiaitiã yumãkĩ tenetxakayamashãkanimẽkaĩ?

¹⁸ Nũ Deusunabu bika betsa betsapa tenebiai pashai Jesusbe hiwenũ ika nũ manaibũ habũ txakabuwakĩ Deusũ hãtxa danãkĩ nĩkaisbuma hatũ txakabuwẽ Deusũ hatu kupiaitiã haskarara bika hatu tenematxakayamashanikiki.

¹⁹ Hanushũ Deusũ yunua hawẽ xinãnẽ tsuabũra aki bika teneaiburã, haskaibu peki. Hanushũ hawara pepa akinã, hau heneyamakubainũbũwẽ. Hau matu mekekubainũ matũ hiwea Deus inãkubaĩkãwẽ. Hatũ nuku damiwanishũ nuku heneisma ikũkaĩkĩ nuku uĩmashanikiki.