1 Pedro 2 - Kaxinawá Bíblia (BR)

Jesuswẽ taeshũ Deusũ hawenabu bena wanikiaki, na hãtxarã

¹ Haska inũ, hamapai txakabu tibi mã akeakemis inũ, mã parananãmis inũ, mã beparamemis inũ, tsuara hawara pepa hayakẽ mã haskatiruma xinaĩ mã hatuki sinatamis inũ, hawara yura betsa ikai uĩtã matunamabia hawẽ taea mã yuãnanãkeakemis ana haskakiri xinãma henerikubaĩkãwẽ.

² Bakeixta kaĩ taea txutxu beya wamakĩ amabu hawẽ yumeti unãmis keskakĩ nukũ Shanẽ Ibu Jesusũ yusĩa kayati wakĩ hawẽ huĩti kuxipanũ ishũ hawẽ hiwekuĩ pashati hãtxa tapĩ mestẽkubaĩkãwẽ,

³ nukũ Shanẽ Ibu Jesusũ matu mekemis hawẽ pepa unãkĩ mã ma unãti wawẽ taearã.

⁴ Jesus hiwe mestẽwãti mixki keska hunibũ danãbianibũ Deusũ abuhairakĩ katuni bestibu tibi ha mixki hiwea pepa haibu wai haki ketashamekubaĩkãwẽ.

⁵ Mã haskakũkainaya mã Jesus ikũwaĩbu dasibi mixki hiwe keska wakĩ hawẽ kẽwãti kayabi matu wakubainikiki, haskai duanamei mã ma haki dasiaburã. Matu dasibi mã Deusbe hãtxashunikaburã, mã hawenabu meribiki. Jesus Cristo mã ikũwaĩbuwẽ taeshũ haska Deusũ abuai akĩ mã Deus benimawakubainaii.

⁶ Haskai kaikiri hawẽ yuishunika Isaías Deusũ yuikĩ: “Uĩa. Katushũ hawẽ hiwe mestẽwãti mixki pepa keska shanẽ ibu kuxipa Jerusalém anu ẽ tashnimashanaii. Hawẽ hãtxa habũ ha ikũwaĩbu eã ẽ hatu dakewama ishanaii”, aka nĩkatã keneniki.

⁷ Na haska keneni keska tsuabũra ma ha mixki kuxipa ikũwaĩbu maturã, mã ha abuhairaii. Hamẽ tsuabũra ha mixki kuxipa ha ikũwãma danãkubaĩkanikiki, ha keneni keska wakinã: “Mixki hiwe wanikabũ ha mixki danãbiaibũ hawẽ hiwe mestẽwãti kayabi mixki pehairaki, kuxiparã”, aniki.

⁸ Ha dikabi Deusũ na eskakiri Isaías yuikĩ: “Haki huti itã tĩ iti mixkiki, hawẽ hatu sinatamatirã”, ani keskariai tsuabũra ha hãtxa hakiri kakape nĩkatã txibãkatsi ikama danaĩ haki huti itã haki sinatai keskabu Deusũ habu kupishanikiki.

⁹ Hanua maturã, yura shuku betsa matu katuniki. Ha inũ, shanẽ ibu binua Deusbe hãtxashunikabu matu dasibi wakĩ ikũwaĩbu meribi shukua betsa matu wakĩ Deusũ ibu wakĩ abukĩ hawenabu matu warianiki. Haskawẽ taeshũ hakiri hawẽ daya pehaira Deuskiri mã txanikubaũshanũbũ mã mexu merã ika keskashũ txakabu wamisbu hanua matu kenakĩ Cristõ shaba hawẽrua anu matu hikimakĩ hiwemakatsi matu tashnimaniki.

¹⁰ Ha inũ, ha dukũ Deusunama mã inibuki. Hakia natiã mã ma Deusũ enabuki. Ha dukũ Deus matuwẽ nuiama ibiani na habiatiã matuwẽ Deus nuikiki.

Deus kẽwaĩ pepakĩ hatu uĩmatikiaki, na hãtxarã

¹¹ Ẽ betsabu inũ ẽ puibuũ, ẽ matuwẽ nuikĩ yunuai ea nĩkakãwẽ. Mã txaikea huima mã ikũwãbumabe hiwea naxui ika keskaburã, ha yurabũ haska xinaĩ habũ kemu paewẽ matũ yushĩ atxishũ yabutã matu bika tenematirurã, haska abuama henekubaĩkãwẽ.

¹² Hakia ikũwãbumabe mã hiwearã, Deus kẽwaĩ hatu naxui ika hiweshũ pepakĩ hatu uĩmakubaĩkãwẽ. Mã haskaiwẽ taea mã yura txakabu ikai dabanẽ xinãkĩ matu yuãbiamisshũ matũ pepa uĩkĩ habũri Jesus Cristo ikũwãkĩ Deus kẽwãtirubuki, Deusũ hanu yurabu unãti wakĩ keyushanaitianã.

Shanẽ ibu tibi nĩkatikiaki, na hãtxarã

¹³ Nukũ Shanẽ Ibuwẽ taea na mai anu matũ shanẽ ibubu hatu nĩkakĩ txibãkubaĩkãwẽ, ha dukũ hatũ mai pakea shanẽ ibu betsa binuatũ yunu keyua

¹⁴ inũ habu shanẽ ibu beshmasbu shanẽ ibuhairatũ hatu yunua txakabu waibu hatũ yununikabu hatu kupimamis inũ pepa akaibu hatũ pewẽ kẽwãmisburã.

¹⁵ Eska Deusũ matukiri abukĩ xinaĩkiki. Mã pe besti wai hatu uĩmakubaĩkãwẽ, habũ matu yuaĩbu inũ hãtxa unãmabia unaĩsmapai matukiri sinatai hãtxa txakabumisbu hau beshtekei ana matukiri hãtxayamanũbunã.

¹⁶ Ha inũ, Deusũ kupiti Jesusũ txanima ma matu binumaniki. Haskawẽ taeshũ: “Ẽ ma kupiti hayamaki”, itã matũmebi ana txakabu unãti wamanũ ika ana haska xinãyamakubaĩkãwẽ, ana Deusũ kupitiki dateama hawẽ tsumabu pepa besti ikubainirã.

¹⁷ Dasibibũ matu yunumisbu hatu nĩkakĩ uĩmakubaĩkãwẽ, matubetã ikũwaĩbube nuinamei inũ Deusũ kuxipaki mesekĩ hawẽ hãtxa txibaĩ inũ Romano shanẽ ibu binuatũ hawẽ hãtxa nĩkatã txibãriakinã.

Jesus yumani keskariatikiaki, na hãtxarã

¹⁸ Hamẽ habũ mã hatu dayashũmisbuũ, haska matũ shanẽ ibũ yunuai danãma nĩkatã ashũkubaĩkãwẽ, matũ shanẽ ibu duapa inũ matũ shanẽ ibu duapamari ashũkĩ uĩmakinã.

¹⁹ Mã Jesus ikũwaĩnã, txanima ha dukũ matũ hiwearã, Jesusunaki. Mã hawa txakabu wamabiakẽ matũ tsumapã matu bika betsa betsapa memabiaibũ hawa yuiama tenetã haska Deusũ abuai ashuĩ haskai mestẽtã hiwekubaĩkãwẽ.

²⁰ Ha inũ, mã txakabuwaiwẽ taeshũ matũ shanẽ ibũ matu kupia yumaĩ sinatama mã pe beshmaski. Hakia Jesus ikũwaĩ mã pepaiwẽ taeshũ ha xinãma matũ shanẽ ibũ matu kupia yumaĩ hawa yuiama mã sinatamakẽ Deus matuwẽ xinã txãkãmiski.

²¹ Eskawẽ taeshũ Deusũ matu katukĩ kenaniki. Mã hawa bika teneriamakẽ Cristo dukũ ha dukũtũ matu bika teneshuniki, ha txibãkĩ matũri mã bika teneriashanũbunã.

²² Xinãkãwẽ, Cristorã, matu eskashunikirã. Tsua betsa parãtaskama inũ hawara Deusũ nemani inũ yununi kanekĩ hawa txakabuwamahaira matu ishuniki.

²³ Hanushũ Cristo itxabiabu hatu bebis kemanamei hãtxama iniki. Isĩ tenemabiabu hawẽ hatu dateti hãtxa kuxipa tashnimama iniki. Hamẽ haskama Deusũ hatu unãti wakĩ txanima kaneismatũ hau mekekubainũ hawẽ hiwea hawẽ Epa Deus inãkubainiki.

²⁴ Cristo hamebi hawẽ yura cruzki dunua mawakinã, nukũ txakabu nuku bushuniki, nuku xinã betsa wamakĩ nũ ana txakabu husiyamashanũ nuku buashũkinã. Hanua hiwea bena nũ ma haya nũ ma pepai hiwekũkainaii. Cristo mawakĩ hau ana txakabũ matu tsumayamashanũ matu meshpamaniki, yura betsabu hatũ isĩ teneai shushawakinã.

²⁵ Ha dukũ na mai anu hiwearã, txashuwã ibuuma benuabu keska mã iki taenibuki. Hakia natiã Cristo ikũwãkĩ matũ hiwea txakabu henetã mã ma Cristo txibãyã hanua mekenika pepatũ ma matu mekeshũ uĩkiki.