1 João 5 - Kaxinawá Bíblia (BR)

Ha ikũwãtirã, nui kayabi hayakiaki, na hãtxarã

¹ Tsuabũra Jesus ikũwãkĩ yuikĩ: “Txanima Jesus Deusũ Messiaski”, akĩ yuiaiburã, Deusũ bakebuki. Ha inũ, tsuãra Epa Deus abuairã, Deusũ bake betsaburi aburiaikiki.

² Epa Deus abukĩ haska yununi nũ txibaĩburã, Deusũ bakebu nũ hatube abunameai nũ unaiĩ.

³ Deus nũ abuairã, hawẽ yunuti inũ hawẽ nemati nũ txibãkubainaii. Hawẽ yunuti txibaĩnã, shãkamama bikamaki.

⁴ Nũ tsuabura Deusũ ma hawẽ bakebu nuku wa tsuabũra hatũ hiwea txakabu txibãkĩ Deus danaĩbu nũ hatu maemaii. Nũ Jesus ikũwaĩwẽ taeshũ hawẽ kuxipayakĩ ha yurabũ txakabu akaibu nũ ma hatu binuaki.

⁵ Hanushũ: “Jesus Deusũ bakeki”, akĩ tsuãra ikũwãkĩ yuikinã, habu bestitũ Deus danaĩbu hatu binukanikiki.

⁶ Jesus Cristo tashnikiranã, eskakĩ dasibi hatu unãti wamakĩ kayatiwamaniki, ha dukũ henewẽ ikaibu anu hari naxirã, hanua dasibibũ berubiri cruzkia dunua hawẽ himi habakĩ hatu uĩmakinã. Henewẽ naxi bestiama hakia mawai hawẽ himi habakĩ hatu unãti wamaniki. Haskanirã, Deusũ Yushĩ Pepatunã, hamebi unaĩkiki. Haska unaĩ nukukia txanima txanimiski.

⁷ Ha Jesus haskani habu txaniairã, eskaki. Hawẽ unãmati dabe inũ besti txaniti hayaki,

⁸ Yushĩ Peparã, henewẽ naxinirã, mawai himi habanirã. Habu dabe inũ bestirã, hatũ xinãnã, habiaskas xinã kanemaki.

⁹ Hawara kaka yurabũ beshũ yuiaiburã: “Txanimaki”, ishũ nũ hatu nĩkamiski. Hamẽ Deusũ ibubis hawẽ bake kayabikiri nukuki txanikĩ ha kaka tashnimanirã, yurabũ kaka yuimisbu keskama ha binua mestenepahairaki.

¹⁰ Tsuãra Deusũ bake ikũwaĩnã, hamebi hawẽ huĩti merã ha kaka haya yuimakĩ shabakabi wamaikiki. Hakia tsuãra Deus ikũwãmatunã: “Deusrã, txaniki”, ikĩ hatu xinãmamiski, ha txanitxakakinã, Deus ibubis hawẽ bakekiri txanini ikũwãmarã.

¹¹ Ha inũ, Deus txani: “Hiwea ikibi ika ẽ matu inãshanaii”, inirã, ha hiwearã, hawẽ bake anu hayaki.

¹² Ha inũ, tsuãra Deusũ bakeki ma dasikĩ ikũwaĩburã, ha hiwea ikibi ika hayaki. Hamẽ tsuara Deusũ bakeki dasikĩ ikũwãmarã, ha hiwekuĩa hayabumaki.

Nui hãtxa hawẽ heneakiaki, na hãtxarã

¹³ Jesus Deusũ bake mã ikũwaĩbu na yusĩa ẽ matu keneshunaii, Deusbe mã hiwei ikibi ika mã ma haya mã unãnũbunã.

¹⁴ Haska Deusũ xinaĩ keska xinãkĩ hawara nũ yukai nuku nĩkamis dateama nũ unaiĩ.

¹⁵ Nũ habe hãtxakĩ yukai Deusũ ma nuku nĩkatã hawara nũ ma yuka nuku inãshanai nũ unaiĩ.

¹⁶ Ha inũ, txakabu dabe hayaki. Ha txakabu daberã, betsa Deusũ buakatsis ikikiki. Bestitxai buakatsi ikamarã, mawa kayabi anu katiruki, Jesus mawabiashuni danãkĩ txakabu wamisrã. Haskawẽ taeshũ ikũwaĩ betsã hawara txakabu Deusũ abuama ana akai uĩtã mã merabewakatsis ikairã, hau Deusũ kupiyamashanũ xinã pewamakĩ merabewakĩ matũ betsa Deus yukashũkãwẽ. Hamẽ betsãri haska Deusũ hawẽ txakabu buashũkatsi ikama uĩbiakĩ Deusbe hãtxashũyamakãwẽ, hawẽ hiwea ma kupiti hayakirã.

¹⁷ Hawara txakabu tibi danãkĩ Deusũ abuismaki. Abuismabia betsa betsapa hatũ hiwekuĩa benumakatsis ikama hatu buashũmiski.

¹⁸ Tsuãra ikũwãkĩ Deus hawẽ Epa wai ma haki dasiarã, ana txakabu mekubaĩtiruma nũ unaiĩ, Deusũ bake Jesusũ mekekubainayarã. Ha dikabi Satanásã yunukĩ ikũwaĩbu kanematirumaki.

¹⁹ Satanásã mai hirabi anu hiweabu hatu parã keyuikiki. Hamẽ nukurã, nũ Deusũ bakebu nũ unãriaii.

²⁰ Deusũ bake tashnitanã, hamẽ huama Deus hiwemanika kayabi nũ unãshanũbũ hawẽ unãnepa nuku inanũ ika huni nũ unaiĩ. Nũ ma ha txanima kayabiki dasia hiweaburã, harã, hawẽ bake Jesus Cristoki nũ ikaki, habias Deus mekenika kayabitũ hiwei ikibi ika nuku inãmisrã.

²¹ Ẽ bake keskabuũ, yushĩ dami kẽwãmisbu beyanu ha dapi ana buyamakubaĩkãwẽ. Hatiski, ẽ hãtxarã. João