1 João 3 - Kaxinawá Bíblia (BR)

¹ Xinãkãwẽ. Nukuburã, nukũ Epa Deusũ nuku abuhairakĩ nũ hawẽ bakebu nuku kenaikiki. Hakia tsuabũra Deus unãbumawẽ taeshũ nũ hawẽ bakebu nuku unãbumariki.

² Ẽ betsabu inũ ẽ puibuũ, ẽ matuwẽ nuiairã, nũ ma Deusũ bakebuki. Txipu haskarara nũ ishanai natiã nũ unãriabumaki. Hakia nukũ Shanẽ Ibu Jesus Cristo ana nukuki nukuaitiã hanu habe ha keskari ikĩ hanu haskarara nuku wai nũ uĩshanaii.

³ Na haska dasibi hakiri xinãkĩ nũ manaiburã, nukũ xinã txakabu haki petxi nũ pepa bestikatsis ikĩ nũ benakanaii, Jesus Cristo pepani keskanũ ikarã.

⁴ Tsuabũra txakabu meaiburã, habuã Deusũ hãtxa txibãma danãkĩ txakabu ewawakanikiki, haska yunuti tibi hayabiakẽ txakabuwakĩ ha txibãmarã.

⁵ Yurabũ txakabu buanũ ika Jesus Cristo na mai anu tashnitã Deusũ yunua kanei txakabuwama inirã, mã unaiĩ.

⁶ Tsuabura nũ ma haki dasiaburã, nũ ma mestẽwã ana hawa txakabuwakubainamaki. Hakia tsuabũra txakabuwakubainairã, habuã Jesus haibuwakĩ unãriabuma ikubaĩkanikiki.

⁷ Ẽ bake keskabuũ, hau tsuã matu parãyamanũ ẽ matu yuiai nĩkakãwẽ. Jesus Cristo pepa ikũkaini keskakĩ tsuãra txibãkĩ pepa akubainairã, ha hunirã, hawẽ xinã pepariki.

⁸ Hakia tsuãra txakabu akubainaiburã, Satanás txibãkĩ akanikiki. Bebũkiri Satanásã Deus nĩkama hatũ dukũtũ hakiri txakabuwanishũ hatũ hatu amakubainikiki. Haskawẽ taea Satanásã haska hatu amakubaĩmis yamawakĩ keyunũ ika Deusũ bake tashniniki.

⁹ Haratura nũ ma Deusũ bakeburã, nũ ana txakabu mekubaĩtirubumaki, hawẽ hiweti xinã pepa ma nuku merã naneawẽ taearã. Haskawẽ taea nũ Deusũ bakebu nukũmebi nukũ hiwea nũ mekekubaĩtirubuki, ana txakabuwamarã.

¹⁰ Deusũ bakebu inũ Satanásã bakebu mã unãti watirurã. Tsuãra pepa akubainama inũ ikũwaĩbube abunameamarã, Deusunabumaki.

Betsabuwẽ nuikĩ hatu uĩmatikiaki, na hãtxarã

¹¹ Jesus mã ikũwãkĩ taewaya matu yusĩkĩ: “Matubetã ikũwaĩbube nui hatube abunamekubaĩkãwẽ”, ika hãtxa mã nĩkanirã, habiaskari ana ẽ matu xinãmaii.

¹² Adãonẽ bake dabe inibukiri matu ana xinãmanũ nĩkakãwẽ. Caimnẽ Satanásã xinã txibãkĩ hawẽ betsa tenãnikiaki. Haskarawẽ taeshũ animẽ? Caimnẽ hawẽ hiwea pepamakẽ hawẽ betsã Deusũ yunua aki pepaya haki sinatakĩ tenãnikiaki. Caimnẽ hawẽ betsa Abel abuama ini keskariai nukuburã, haskayamakubainãkãwẽ.

¹³ Ẽ betsabu inũ ẽ puibuũ, habũ ikũwãbumã Deusũ hãtxa nĩkama matu danaĩ matuki dakekenaĩbunã, hatu uĩ datei e iyamashãkãwẽ.

¹⁴ Uatiã nũ abunameamarã, nũ mawa keska inibuki. Na haska unãkinã, natiã nukũ betsabube nũ abunameaiburã, nũ hiwea hayaki. Hakia habu abunameabumarã, ma mawanibu keska hiweyuabuki.

¹⁵ Tsuara ikũwaĩbu betsawẽ nuiama dakekenãmisrã, huni pubẽki. Ha huni haskaburã, hamebi hatũ hiwekuĩa hayatiruma mã unaiĩ.

¹⁶ Nũ nui kayabi haya nũ tapĩtirurã, haska Jesus Cristo nukuwẽ dabanã hawẽ hiwea nuku inãni nũ xinãtirubuki. Haskawẽ taea nukubũri nukũ betsabu nũ hatu abukayabiai nũ hatu uĩmatirubuki.

¹⁷ Hakia tsuara mabuhairayatũ ikũwaĩbu betsa nuitapai uĩbiai beru txãkãshũ hatu merabewama hawa inaĩsmarã, hawa Deusũ nui hayamaki.

¹⁸ Ẽ bake keskabuũ, txanima Deus abukĩ duawakinã, hãtxa bestiwẽ akama ikũwaĩ betsabuwẽ nui merabenãkĩ hatu uĩmakĩ ashũkubainãkãwẽ.

¹⁹ Hamapai tibi kanebiakubaini nukunabube nũ abunamemiswẽ taeshũ Deusũ nukũ txakabu nuku buashuni nũ unãtirubuki.

²⁰ Nũ txakabu wakubaĩmis nuku unã keyubiaya Deus nũ yuka nukũ txakabu nuku buashũtã ana xinãma unaĩ ana punu nukayamakubainãkãwẽ.

²¹ Ẽ betsabu inũ ẽ puibuũ, matuwẽ nuikĩ ẽ matu merabewairã, nukũ txakabu nũ ma pewa ana hawawẽ taea Deuski nũ datetirubumaki.

²² Haskawẽ taeshũ hawẽ hãtxa txibãkĩ haska abuai akĩ nũ benimawakubainai unã keyuaya hanushũ hawara bikatsis ikĩ Deus nũ yuka nuku ashũshanikiki.

²³ Hawẽ bake Jesus Cristo nũ ikũwãshanũbũ inũ nũ abunamekubainũbũ Deusũ hawẽ yunuti yununiki. Habias keskari hawẽ bakẽ nuku yunurianiki.

²⁴ Tsuãra Deusũ hãtxa nũ txibaĩburã, nũ haki dasia hiwea inũ hari nukuki dasiria hiweriaki. Ha inũ, hawẽ Yushĩ Pepa nuku yunua nũ biniwẽ taeshũ nukuki dasia hiwea nũ unãkanaii.