1 João 2 - Kaxinawá Bíblia (BR)

¹ Ẽ bake keskabuũ, Deusũ hãtxa txibãkĩ mã ana txakabuwayamanũbũ ẽ matu keneshũ bumai nĩkakãwẽ. Mã haskabia tsuãra kanekĩ mã txakabu meayarã, nukũ hãtxashunika Jesus Cristo hawẽ Epa bebũ nia nũ hayaki, hatũ hawa kanenimatũ nuku merabewairã.

² Nuku besti ishuãma hakia mai hirabi anu hiwebaunabũ txakaburi buanũ ika Jesus Cristo mawakĩ hawẽ Epa nuku daewashuniki, txashuwã menukĩ inãkĩ daewapaunibu keskakinã.

Ikũwaĩbu yunua benawẽ hawẽ hiwetikiaki, na hãtxarã

³ Ha Deusũ yununi nũ habuã txibãkubainairã, nukubũ nũ ma unãti watã mestẽwanã, txanima nũ ma hanu haki dasiabuki.

⁴ Hakia tsuãra yuikĩ: “Deus ẽ ma unaiĩ”, ibiakĩ hawẽ yunua hãtxa txibãmarã, ha huni txani txakaikiki, Deusũ hãtxa txanima haki hayamawẽ taearã.

⁵ Hamẽ tsuara xinã betsatã Deusũ hãtxa txibãkĩ ashũkayabiairã, txanima kayabi hawẽ shabakabi Deusũ nui haya ha meranua tashnikiki. Hamẽ nukubu nũ haskariaiburã, nũ hakiri dasiabu nũ ma unãkanaii.

⁶ Ha inũ, tsuãra yuikĩ: “Ma Deuski dasia ẽ hiweaii”, ikirã, haska Jesus Cristo hiwekũkaini keskai hau iriakubainũbũwẽ.

⁷ Ẽ betsabu inũ ẽ puibuũ, ẽ matuwẽ nuikĩ ha dukũ Jesus Cristõ nuku yununi bena ẽ betsa wamaki. Habias nukũ betsabũ matu yusĩaĩbu mã nĩkakĩ taewanirã, harã, mã ma nĩkaniki. Xinaĩrakãwẽ, mã abunamekubainũbunã.

⁸ Habiaskabiakẽ na yunua bena keska wakĩ ana matu xinãmakĩ ẽ matu keneshunaii. Ha dukũ Deusũ nuku yunukĩ: “Minabube abunamekubaĩshãkãwẽ”, iwanã, nuku yununiki. Haskakẽ haska Cristo nukuwẽ nuikĩ nuku abumis unãkĩ yunua bena tashniai keska wakĩ ẽ ana matu xinãmaii. Matũ hiwea sheni mã henekubirani ma txanima shaba kayabiki mã pesea keskabuki. Na mã haskai hiwearã, Cristõ yununi kayabiki.

⁹ Tsuãra yuikĩ: “Cristo ikũwaĩ ma ẽ hawẽ shaba hayaki”, ibiai ikũwaĩ betsa danaĩ habe dakekenaĩnã, hawẽ hiwea sheni hene keyuriama mexu merã hiwea keskayuaki.

¹⁰ Hakia tsuãra hawẽ hãtxa txibaĩ ikũwaĩ betsabube abunamemisrã, ana hawawẽ taea txĩtuaĩ txakabũ kanemakĩ atxitirumaki.

¹¹ Hamẽ tsuara ikũwaĩbube abunameama hatube danãnanaĩ dakekenaĩnã, hawẽ hiwea pemawẽ taea mexu merã nia hani kai unãma keskaki. Ha mexu merã niarã, hawẽ hiwea shenĩ hawẽ xinã bepu keyua bekũ keska hiweaki.

¹² Ẽ bake keskabuũ, Jesus Cristõ hawẽ hiweawẽ nuku merabewanũ ika tashnitã nuku mawashuniwẽ taeshũ Epa Deusũ matũ txakabu buatã matu haibuwani xinãkĩ ẽ matu keneshunaii.

¹³ Epabu inũ ewabuũ, Deusũ mai damiwariama hawẽ bake habe hiwekũkaini mã ma ikũwãkĩ unaĩwẽ taeshũ ẽ matu kene bumaii. Berunãbu inũ txipaxbuũ, Deusũ hãtxa txibãhairakĩ huĩtinĩ mestẽwãtã mã yushĩ txakabu Satanás maemaiwẽ taeshũ ẽ matu kene bumaii.

¹⁴ Ẽ bake keskabuũ, mã ma Deus unãyanã, ẽ matu keneshunaii. Ha dikabi hawẽ bake habe hiwekũkaini mã ma ikũwãkĩ unaĩwẽ taeshũ ẽ matu kene bumaii. Berunãbu inũ txipaxbuũ, huĩtinĩ mestẽtã mã ma Deusũ hãtxa nĩkatã txĩtuãma txibãkĩ hawẽ Satanás mã ma maemawẽ taeshũ ẽ matu kene bumaii.

Na mai anua mabuwẽ besti kemukĩ Deus benimawatirubumakiaki, na hãtxarã

¹⁵ Yurabu na mai anu hiweshũ haska abukĩ txakabu akaibu danaĩ ana hatube naxui itã ana abuyamakubaĩkãwẽ. Hamẽ betsabũ hatũ hiwea inũ hatũ beya txakabu mã abukubainairã, Epa Deus mã abuamaki, danãkinã.

¹⁶ Na mai anu yurabu hiweshũ akĩ tashnimaiburã, beya txakaburã, Deus anua huamaki. Haska huirã, yurabũ hatũ yura atimapawati bestiwẽ kemui inũ, hatũ beruwẽ besti mabu uĩkĩ haska abuai keska tashniai hawẽ besti kemui keĩ hiweabuki.

¹⁷ Hanua yurabũ haska xinãkĩ abiamisburã, hatũ kemu paerã, keyukũkainikiki. Hakia xinã betsa watã haska Deusũ abumis aki hiwekubainaiburã, habe hiwekuĩshãkanikiki, ikibi ikirã.

Cristoki sinatai tashnishanikiaki, na hãtxarã

¹⁸ Ẽ bake keskabuũ, ma bari hawẽ henei keyuikiki. Bari hawẽ heneaitiã huni shanẽ ibukĩ Jesus Cristo mebinũ ika haki sinatai haki beparamei hushanai mã nĩkanirã, na habiatiã itxapabu haki sinatai ha keska ma tashniaibu mã uĩaiĩ. Haskawẽ taeshũ ma bari hawẽ henei ma kemai mã unãtirubuki.

¹⁹ Habu tashnirã, nãtekea beama habia nuku anua iki taebaĩkanikiki. Nukube itxabiamisbu Jesus Cristo danaĩ ana nukube itxama haki sinatakanikiki. Hamẽ nukubetã ikũwaĩbunã, nuku pashkabainama itirubuki. Hakia nuku pashkabainaibu uĩkĩ ikũwã kayabiabuma mã shabakabi unãtirubuki.

²⁰ Jesus Cristo meribitũ hawenabu wakĩ ma matu pashkaniki, hawẽ Yushĩ Pepawenã. Haska dasibitũ mã ma hakiri hawẽ hãtxa txanima mã ma hayakẽ ana tsuã matu parãtirumaki.

²¹ Hanushũ mã hãtxa kayabi unãmawẽ taeama hakia hãtxa kayabi mã unaĩwẽ taeshũ ẽ matu keneshunaii. Cristo anua hãtxa txakabu tashniamaki. Hakia hãtxa kayabi besti hanua tashnikũkaĩmiski.

²² Hakia tsuabu ikanimẽkaĩ, Cristoki txani txakai parananaĩnã? Habu parananãkĩ hakiri hãtxakĩ yui: “Jesusrã, Deusũ Katua Messiasmaki”, ikaiburã, ha hunĩ hawẽ kuxipa mebinũ ika haki beparamekĩ hawẽ Epa inũ hawẽ bakeki sinatakĩ hatuki dakekenanamemaikiki.

²³ Haska inũ, tsuabura Deusũ bake danaĩ haki dakeirã, hawẽ Epa Deuskiri dakeriaikiki. Ha inũ, tsuabura dakeyamakaĩ hakiri hãtxai peii: “Ẽ Jesus ikũwaiĩ”, ikĩ hawẽ Epakiri shabakabi wariaikiki.

²⁴ Haskakẽ matunã, Deusũ hãtxa mã nĩka taewanirã, matũ huĩti merã ha kaka pepa mã mekea matuki ma dasia hanu hawẽ bake inũ hawẽ Epabe mã ma hatuki dasia hiwekũkaĩriashanaii.

²⁵ Haska Jesus Cristõ ma nuku yubabaini nũ ma haya hawẽ taea hiwei ikibi ika nũ ipashanaii.

²⁶ Ha habũ matu parãkatsis ikaibukiri ẽ matu keneshunaii.

²⁷ Hakia txanima Deusũ Yushĩ Pepa Jesus Cristõ matu inãkĩ ma matu meribi wani hatũ besti hawẽ yusĩa txanima hawa matu parãma yusĩkĩ matu merabewakubainaya ha parananãmisbũ hatũ hãtxawẽ matu yusĩtirubu hayamaki. Haskawẽ taea mã ma Jesus Cristoki dasiaburã, haska Deusũ Yushĩ Pepatũ besti matu yusĩaĩ betsa wakĩ heneyamakubaĩkãwẽ.

²⁸ Ẽ bake keskabuũ, natiã Jesus Cristoki dasitã heneyamakãwẽ, haki txiti ikirã, hanu ana nukuki nukui huaitiã damapai nũ haki datei daketirubumakirã, ha bebunuarã.

Deusũ bakebu haskaibu nũ unãtirukiaki, na hãtxarã

²⁹ Txanima Jesus Cristõnã, hawa kaneama ini mã unaiĩ. Haskawẽ taea tsuabũra hawara Deusũ abuai akubainaiburã, pepabu Deusũ bakebu mã unãtirubuki.