1 João 1 - Kaxinawá Bíblia (BR)

Hãtxa kayabi hawẽ hiwei ikibi iti hayakiaki, na hãtxarã

¹ Ẽ betsabu inũ ẽ puibuũ, ẽ matu kene bumai uĩrakãwẽ. Mai damiwariama Cristo hiweni natiã hiwea mã nĩkakubainairã, haskarã, nukũ dukũ hawẽ daya tateskĩ taewabainai nukubũ nũ nĩka taewabainiki. Hanushũ nukũ beruwẽ daiskĩ mekĩ hatũ nuku hiwekuĩmamis ha hãtxa hiwea haya nũ beiskubainiki.

² Ha hiwearã, hamebi hawa huneama ikũkainai nukũ uĩnishũ hakiri shabakabi txanikĩ hawẽ kaka matukiri hiwea ikibi ika haya nũ matu yuikubainaii. Hawẽ Epabe dasia nuku shabakabi uĩmakubainai nukubũ nũ uĩkubainiki.

³ Ha kakape nukubũ uĩkĩ nũ nĩkanirã, Epa Deus inũ hawẽ bake Jesus Cristobe nũ hatube dasia keskariai maturi mã nukube dasirianũbũ nũ matuki txanikũkainaii.

⁴ Nukubũ haskas nũ xinaĩ mã nukubetã ikũwaĩbukiri ibubis xinã txãkaĩ nũ benimatxakayamakubainũbũ na kaka pepa nũ matu keneshunaii.

Jesus Cristõ nukũ txakabu buanishũ Deus nuku daewashũkubainikiaki, na hãtxarã

⁵ Deus dasibi shaba keska pepahairaki, hawa parananãti txakabu hayamarã. Jesus Cristõ na kaka pepa haskakiri nuku yusĩaĩ nũ nĩkani hanushũ habiasri yusĩ nũ matuki txanikũkainaii.

⁶ Hakia tsuãra yuikĩ: “Ma ẽ Deuski dasiaki”, ibiakĩ txakabuwakubaini hiwea mã parananã bestiaii, txanima shabakabi hatu uĩmakĩ mawamamarã.

⁷ Hakia tsuãra Deusũ hãtxa ikũwãtã txibaĩ mã pepai hiweaburã, Deusũ shabaki mã ma pesea keskabuki. Haskawẽ taea nukubũ ikũwaĩbu nũ ma dasiabuki. Hanushũ txanima hawẽ bake Jesus Cristo nukuwẽ taea mawakĩ hawẽ himi habakĩ Deus nuku daewashũkĩ ma nukũ txakabu nuku bua keyushuniki.

⁸ Hamẽ tsuãra ikũwãbiakĩ hawẽ xinã kayabi unãma yuikĩ: “Eãnã, ẽ hawa txakabuwaismaki”, iki bemakis besti xinãkĩ nukũmebi ibubis nũ paranãtiruki, hãtxa kayabi hayamarã.

⁹ Hakia hau nukũ txakabu nuku buashunũ hawara mekĩ nũ hatu mexu waxinaki dateama Deus inũ tsuabura nũ txakabuwaxina hau nĩkanũbũ shabakabi nũ hatuki txaniaya Deus pepa nukuwẽ nuikĩ nukũ txakabu buatã ana xinãma nuku hakimawatiruki.

¹⁰ Hakia tsuãra yuikĩ: “Ẽ hawa txakabuwaismaki”, ikĩ Deus txani txakai dabanẽ yurabũ hawẽ hãtxa nĩka pewariama haska dasibibu nũ txakabu hayabuwẽ taea nũ haska yuitirubumaki.