1 Coríntios 9 - Kaxinawá Bíblia (BR)

Paulo Jesusũ kuxipayatũ hatu yusĩkubainaya habũ devebiakẽ habuna hawara biama inikiaki, na hãtxarã

¹ Hamẽ enakiriri matu yuinũ nĩkakãwẽ. Damasco baiwẽ ẽ kai Jesus hanu eki nukutã ea uĩmaxĩshũ nukũ Shanẽ Ibũ hawẽ tsuma kuxipaya betsa ea wakĩ ea yununiwẽ taeshũ tsuã ea yunuamawẽ taea haska matu anu ẽ dayai kashũ nukũ Shanẽ Ibũ daya ẽ matu uĩmakĩ Deusũ kaka pepa matu yusĩkubaũkĩ mã Corinto anuabu Jesus ẽ matu ikũwãmaniwẽ taeshũ ẽ Jesusũ kuxipaya betsabu keska habias daya ẽ hayabiakẽ matũ mã ea danãtirubumaki.

² Mae betsa anuabũ ea unãti watã: “Harã, Jesusũ kuxipaya betsamaki”, akĩ ea danãbiaibũ matunã, ẽ matu yusĩa nukũ Shanẽ Ibu ikũwãtã mã haki dasiniwẽ taeshũ ẽ Jesusũ kuxipaya txanima mã unaiĩ.

³ “Haskakĩ Paulõ nukũ merabe bismamẽ?” iki ekiri hãtxaibu eska ẽ hatuki txanimis matu yuinũ nĩkakãwẽ.

⁴ Ea inũ Barnabẽ nũ matu yusĩkubaĩkĩ matu anua piti inũ nushuti nũ biturubia nũ matu ea aismaki. Hakia nũ Jesusũ kuxipayabuwẽ taea nukuri nũ haska ea itiruki.

⁵ Jesusũ kuxipaya betsabu inũ, nukũ Shanẽ Ibũ betsabu inũ, Pedrõ yusĩbaũkĩ hatũ aĩ iyumisbu keska wakĩ nukũri aĩbu nukubetã ikũwaĩbu nũ iyuriatiruki. Nũ hatu haska wabainaya Jesusũ nuku yununiwẽ taeshũ hatuna biriatirubuki.

⁶ Matu anu haska Jesusũ kuxipayabu betsa haskabainaibu piti inãkĩ tari inãkĩ hanu hiweyunũbũ dĩtu betsa inãkĩ mã hatu merabewabiamis ea inũ Barnabé haska wama nuku besti mã nuku merabewamatirumamẽ?

⁷ Hakia soldadobu detenamei bukĩ ibubis hatũ hamapai pakaisbumaki. Ha inũ, uva bai anu dayakĩ habũ ha uva bimi pimisbuki. Ha inũ, txashuwã mekekubaĩmisbũ hawẽ txutxu tsinitã amisbuki.

⁸ Haska wakĩ yura betsa betsapabu dayakĩ hatũ hamapai bimisbu besti xinãkĩ ẽ matu yuiamaki. Hakia hawara Deusũ nuku yusĩni matu yuinũ nĩkakãwẽ.

⁹ Moisés kenekĩ: “Mĩ hemaĩtĩ anushũ mĩ ina awã hawẽ taewẽ mĩ shekiwã pema pema akĩ mia shemeshunaya dispiwẽ kuneshyamakãwẽ, hau pinunã”, aniki. Na ina awakiri kenenirã, haska keska xinãti wakĩ

¹⁰ Deus nukuwẽri nuiti Moisés haska kenemaniki. Hakia mai pukĩshũ yunu banabu yunu ewatã kaniai tsekashũ betsa pimisbu keska wakĩ shekiwã shemenikatũ shekiwã shemetã hatiri bumisbu keskai Deus dayashuni nũ nuitapayamanũbũ merabewakĩ mã nuku pakanũbũ ina awakiri Deusũ Moisés nũ hawẽ dayakapabu nukukiri kenemaniki.

¹¹ Haskakẽ ana betsa matu yuinũ nĩkakãwẽ. Bai bana keska wakĩ Deusũ hãtxa Jesuskiri nũ matu yusĩkubainaya nuku manakukĩ hawara mã haya piti kasmai tari kasmai hiwe kasmai pei betsa mã nuku deveaki.

¹² Yauxiama yusĩnã betsabu mã pakamiski. Nukũ dukũ Jesus Cristokiri nũ matu yusĩaĩ mã ikũwaĩmawẽ taeshũ itxapa mã nuku devepakemiski. Na haskakiri nũ matu haska wa matũ yuikĩ: “Nuku yusĩmisshũ nukũ pei bikĩ nuku pakamakĩ taewaikiki”, iwanã, nukukiri mã xinãtxakayamanũbũ hawara mã nuku devea hawẽ nuiama Cristõ kakape besti mã txibanũbũ hawara mã nuku devea matu yukama nũ habiaska hiwekũkainaii.

¹³ Ha inũ, Templo anushũ ha habu dayanikabũ yura betsabũ inãkuĩ Deus inaĩbu ha nami menushũkĩ hamapai betsa betsapa wakĩ habianushũri hatiri kuakĩ hatiri bikĩ hatũ piti dasibi bishũ hawenabu hatu pimamisbu mã unaiĩ.

¹⁴ Haska habũ amis keska wakĩ tsuabũra Jesuskiri kakape yusĩkubaĩmisbũ habũ hatũ piti inũ tari inũ pei mã hatu inãkubaĩtirubu nukũ Shanẽ Ibũ habias hawẽ tsumabu hatu yununiki, hau betsaburi habiawẽri hiwekubaĩshanũbunã. Haska keska xinãkubaĩkãwẽ.

¹⁵ Na haska tibi yunuti hayabiakẽ ha xinãkĩ ẽ matu hawa ea aismaki. Haska inũ, kene matu bumakĩ: “Matũ hawara ea inãkãwẽ”, ẽ matu wakĩ yukamaki. Haska ẽ matu yuiai keska wakĩ ekiri xinã txakakĩ: “Paulo pakakĩ taewanãkãwẽ”, iwanã, xinãyamashãkãwẽ. Mã ea pakaisma keska besti ikubaĩkãwẽ. Ẽ matu yusĩayã mã ea hawa inaĩsma benimahairai ẽ keaiĩ. Ẽ haskakũkainairã, ẽ abuhairariaii. Matu berabĩwãkatsi ikama ẽ hawaira mawakatsis ikaii. Eskaki, matu yuinũ nĩkakãwẽ.

¹⁶ Deusũ ea katukĩ Jesusũ kuxipaya ea wa hawẽ kakape yusĩbauni ẽ hawẽ kẽnũ ea yunuama iniki. Hakia ẽ xinãnẽ akirã, ẽ kẽtiruki. Hakia haskama hawẽ kuxipawẽ ea yunu yunu aka ẽ akubainaii, enamawẽ taeshunã. Ẽ yusĩamakẽ Deus eki sinatai ewẽ benimama ishanikiki.

¹⁷ Ẽ xinãnẽ Deusũ kakape yusĩbaunũ, iwanã, emebi ẽ akĩ taewaniwẽ taeshũ mã ea devekeanaii. Hakia ẽ haska ẽ xinã meribi ẽ akama Deusũ ea kenatã ea txai putani ha ẽ dayashũshanũ ea katukĩ nitxĩnikẽ haskakĩ matũ hamapai tibi biãtibiakẽ ẽ tsua matu yukaismaki.

¹⁸ Matũ mã ea haska waismakẽ tsuã ea pakama Deusũ daya ẽ akubainaya haska ẽ matu yusĩmis Jesusũ kuxipaya betsabu pakakĩ yusĩnã betsabu pakariakĩ mã ea pakaismakẽ hawẽ benimawatiwẽ Deusũ ea manakumiski, ea xinã txãkãwãkinã.

¹⁹ Ẽ tsuã escravo dayarumabia itxapabu Jesus hatu ikũwãmanũ ika dasibibũ escravo dayaru hikini keskakĩ yura tibi ẽ hatu dayashũkũkainaii.

²⁰ Hakia pepanũ, iwanã, Moisés yunuti inũ hawẽ nemati ẽ unãbiai ana hatũ ea tsumamabiakẽ judeubu Jesus ikũwãmanũ ika hatube dasitã haska Moisés yunuti inũ nemati txibãmisbu hatu yabuni henemanũ ika hatu keska ẽ hiweyumiski.

²¹ Deusũ yusĩa danãma Jesus Cristõ yusĩa heneama txibãkubaĩkĩ judeubuma habũ Moisés yusĩa txibãbuma Jesus ikũwãmanũ ika hatube hiwea hatũ beya keska txibaĩ ẽ hatube hiweriamiski.

^22-23 Ha inũ, Jesus ikũwãkatsis ibiai ikũwaĩ kayabi iriama babubu merabewai hatu kuxipa wakatsi iki hatube hiweshũ yusĩa bika yuiama hatu keskari eari babu keska ẽ hiwemiski. Jesus ikũwaĩbu itxapabu Deusũ hatu duawakĩ eari hau ea duawashanũ, iwanã, hawẽ kakape yusĩkubauni tsuabura yura betsa betsapa ikũwãmanũ ika haska hiweabu keska hatube hiwekũkaũkĩ ẽ yusĩtãmiski, kaneamarã. Haska tibi kakape ẽ hatu yusĩmiswẽ taea habias nũ txibãmiswẽ taeshũ hatubetã manakuti pepa ẽ binũbariaii.

²⁴ Hamẽ matuburã, beyusi itxapa kuxibaini hawairabainaibu bestitxaitũ hatu binutã maemamis mã unaiĩ. Ha bestitxaitũ hatu binukĩ keyutã hawara pe bimis keska wakĩ Jesus ikũwãtã duawakĩ nĩkahairai txĩtuãma ha besti txibãkubaĩkãwẽ, haska keskai matu tibi mã pe hiweawẽ taeshũ hau Deusũ matũ pepawẽ taeshũ matu manakushanunã.

²⁵ Beyuskĩ betsabu binutã ni pei maiti hawẽruabia txapushanai binũ ika hamebi hawẽ yura kuxipa wakĩ hamapai piti tibi txakabuwamis piama hatũ yura pe mekemisbu keska wakĩ Deusũ hawenabu manakuti hawa txapuisma matu inãkĩ matu hiwekuĩmashanaiwẽ taeshũ matũ xinã pe mekeriakubaĩkãwẽ.

²⁶ Eã ẽ xinãnã, kuxikaĩkĩ ẽ binukatsis ikai keskaki. Beyus betsai detenamekĩ betsa maemanũ, iwanã, tsuãra mekenẽ kaneama detenamemisbu keska wakĩ eã Jesus txibãkubaĩkĩ

²⁷ hamapai txakabu ẽ hayari henekĩ ẽ huĩti kuxipa keska wakĩ ẽ yura ẽ mekehairaii, betsabu Jesus Cristo ikũwãmatã ẽ manakuti pepa ẽ benuyamashanunã. Jesus Cristo besti txibaĩ mã pe hiweawẽ taeshũ maturi pepawẽ Deusũ matu manakushanikiki.