1 Coríntios 8 - Kaxinawá Bíblia (BR)

Dami kẽwãti betsa meribi watã nami inãmisbukiri Paulõ hatu yusĩnikiaki, na hãtxarã

¹ Ẽ betsabu inũ ẽ puibuũ, mã ea kene bemakĩ ha yuinaka deteshũ dami yushĩ nami inãtã pikĩ matu pimakatsis ikaibukiri mã ea yukaima matu yuinũ ea nĩkakãwẽ. Ha nami dami yushĩ kẽwãkĩ inãmisbu pirã, hawa txakabumaki. Txanima haskabiakẽ hakia ikũwaĩbu betsa babubu ha nami pikĩ mã hatu uĩma ana babutirubuki, pi mã keaĩwẽ taearã, haskakĩ tsua kuxipawakĩ mã hatu merabewatirumaki, mã nui hayamarã.

² Tsuãra haska tibi aki: “Ẽ unã keyuaii”, mã ibiairã, haskai unãnepati kayabi mã unã keyuriamaki.

³ Hamẽ tsuabũra Deus abukĩ duawakĩ hawẽ yunuti akaiburã, harã, Deusũ hatu unaĩkiki.

⁴ Yushĩ dami kẽwãti betsa kẽwãkĩ hawẽ kẽwãti nami inãnãnaĩbu bitã mã piaiburã, haskarã nũ unãriaii. Hawẽ kẽwãti yushĩ dami hiwea hayama inũ hawa kuxipa hayamahairaki. Hakia nukũ mekenika Deus bestitxai hiwea nũ unaiĩ.

⁵ Jesus ikũwãbumã yushĩ kuxipa betsa betsapa nai anua inũ mai anua hayakiaki, iwanã, habũ xinãkĩ kẽwãmisbuki. Kanekĩ deus itxapa inũ yushĩ shanẽ ibu itxapa xinãkĩ ikũwãmisbuki.

⁶ Hamẽ nukubũ ikũwãkinã, nukũ Epa Deus bestitũ dasibi bawani inũ nuku hatũ damiwani nũ hawẽ hiweaki. Ha inũ, Shanẽ Ibu bestitxai nũ hayaki, Jesus Cristorã. Hawẽ taeshũri Jesusũ hawẽ Epa Deusbetã dasibi damiwakĩ keyuniwẽ nũ hiweriaki, nukuburã.

Ikũwaĩ babubuwẽ nuikĩ merabewatikiri Paulõ hatu yusĩnikiaki, na hãtxarã

^7-8 Txanima haska tibi nukũ Epa Deusũ dami wani tsuã tapĩ keyuamaki. Haskawẽ taea Jesus mã ma ikũwãbiai betsabũ yushĩ dami betsa hawẽ kẽwãti namikiri piaibu nĩkakĩ shabakabi mã unãriabumaki. Yushĩ dami betsa kẽwãkĩ hawẽ kẽwãti piti pikĩ: “Nukũ yushĩ dami betsa nũ duawaii”, iwanã, apaunibu ana xinãkĩ hamapai nami nũ piaiwẽ taeshũ Deus nũ duawatirumaki, iwanã, pikĩ nukũmebi pepama inũ piama nũ pepamariki. Yushĩ dami betsa kẽwãkĩ mã ma beyawanirã, hatiritũ matubetã Jesus ikũwãkĩ yushĩ dami betsa hawẽ kẽwãti nami pikĩ haska hawẽ kuxipa yukapaunibu hakimama xinaĩ huĩti babukubaĩkanikiki.

⁹ Hamẽ yushĩ dami betsa hawẽ kẽwãti nami hawa hayama unãkĩ hawa dateama pikĩ ikũwaĩ betsabu huĩti shubu mã hatu uĩma matu uĩtã txĩtũkĩ kanetirubuki. Matu yusĩnũ nĩkakãwẽ.

¹⁰ Yushĩ dami betsa kẽwãti hiwe anushũ mã ikũwaĩbu kuxipabũ piaya ikũwaĩ betsa babubũ matu uĩkĩ haska yushĩ dami betsa kẽwãkĩ henebianishũ mã ana hawẽ kuxipakiri xinaĩ dabanẽ habũri hawẽ kuxipatikiri pinũ ishũ xinãtirubuki.

¹¹ Haskakẽ matunã, matũ xinãwẽ besti unãnepabiakĩ yushĩ dami betsa hawẽ kẽwãti nami pikĩ ikũwaĩ huĩti shubu haburi Jesus Cristo hatu mawashũbianikẽ mã hatu benutiruki.

¹² Haska wakĩ Cristonabu huĩti babubu hatũ xinã txakabuwamakĩ mã Cristo txakabuwariaii.

¹³ Haskakenã, eãnã, ha nami betsa pikĩ ẽ betsabu ẽ kanematiru xinãkinã, ana hatu kanemakatsi ikama ha nami ẽ ana metirumahairaki, hatu txakabuwakatsi ikamarã.