1 Coríntios 7 - Kaxinawá Bíblia (BR)

Huni inũ aĩbu biakanãtikiri Paulõ hatu yusĩnikiaki, na hãtxarã

¹ Ea kene bemakĩ hawara mã ea yukaima matu yuinũ nĩkakãwẽ. Hunĩ aĩbu bikatsi ikama inũ txutakatsi ikamarã, haska peki.

² Hamẽ dasibibu txutanamekatsi ikirã, huni tibi hau meribi aĩyanũbũwẽ. Habiaskariai aĩbu tibiri hau meribi beneyarianũbũwẽ. Hamẽ mã haskabumarã, atimapa hiwei mã txakabuskubaĩtirubuki.

³ Haskakatsi ikama aĩbube biakanãtanã hunĩ hawẽ hina yauxiama inũ aĩbũri hawẽ shebi yauxiamari hau txutanamekubainũbũwẽ.

⁴ Aĩbũ shebirã, hawenabia hawẽ benenaki. Hanua hunĩ hinarã, hawẽ aĩnenaki. Haskakẽ yauxirabeama hau habe txutanamekubainũbũwẽ.

⁵ Haskakẽ habu dabe hãtxanamei petã matũ mabu yauxiama mã txutanametirubuki. Hanua mã Deus kẽwaĩ Deusbe mã yubakatã mã habe hãtxayukatsis ikai ana menameyuama mã itiruki. Hanua keyutã ana mã txutanametirubuki. Hamẽ mã yubakai peama shaba itxapa kaya Satanásã matu parãkĩ kanemakĩ matu txakabu watiruki, betsawẽ kemumakinã.

⁶ Na haska matu yusĩkinã: “Aĩyãkãwẽ, benayakãwẽ”, iwanã, yunuama inũ ẽ matu nemamariki.

⁷ Earã, aĩuma hiwea ẽ aĩyãkatsi ikamaki. Tsuabura ea keska hiwetiruburã, haska peki. Hamẽ Deusũ huni tibi haskas nukũ aka nuku inãma betsa tibi nũ ha dayashunũ nuku inãmiski, yunukinã.

Hau haskai hiwenũbũ Paulõ hatu yusĩnikiaki, na hãtxarã

⁸ Tsuara aĩyãriama inũ, hawẽ bene ma mawaima inũ, hawẽ aĩ ma mawaimakẽ haska ana xinãma hiwekatsis ikaiburã, haska mã pe meairã, habiaska hiwekubaĩkãwẽ, ea ẽ hiwea keskairã.

⁹ Aĩyã inũ beneya pekẽ hau biakanãkubainũbũwẽ. Hamẽ tsuabura aĩbuwẽ kemukĩ mã xinã heneama txutakatsis ikairã, hau aĩbu bikubainũbũwẽ. Aĩburi hau beneyarianũbũwẽ.

¹⁰ Ẽ xinãnẽma nukũ Shanẽ Ibũ ea yusĩniwẽ ẽ matu yunuaii, enawẽmarã. Mã ma biakanani hiweabukiri matu yusĩnũ nĩkakãwẽ. Aĩbuaibuũ, matũ bene henebaĩyamakãwẽ.

¹¹ Hamẽ ikũwãrabebiai mã hawawẽra taea mã ma henenameyuarã, xinã betsa watã mã ana haki nukutiru inũ mã haki nukukatsi ikama ana beneyayamakãwẽ. Hunibuũ, matũ aĩ sinayukaĩkenã, ha xinãkĩ hene kayabiyamakubaĩkãwẽ.

¹² Haska tibi mã aĩyã inũ beneya mã hiweabu matu xinãkĩ haska nukũ Shanẽ Ibũ yunuama ibianikẽ haska matu tibikiri eã xinãkĩ ẽ matu yunuai ea nĩkakãwẽ. Jesus ikũwãriama betsa aĩyãbu inũ betsa beneyabukiri eska hiwekãwẽ. Mĩ aĩnẽ ikũwãmabia mibe hiweshũ mia merabewakatsi ikairã, nitxĩkĩ heneyamakãwẽ.

¹³ Ha inũ, mĩ benẽ ikũwãmabia mibe hiweshũ mia merabewakatsi ikairã, nitxĩkĩ heneyamariakãwẽ.

¹⁴ Haska inũ, mĩ benẽ ikũwãmabiakẽ mĩ ma habe biakananiwẽ taeshũ Deusũ mia danãma hakia mĩ ikũwaĩwẽ taeshũ mĩ benẽ ikũwãtirukẽ duawaikiki. Habiaskari wakĩ mĩ aĩnẽ ikũwãmabiakẽ Deusũ danãma hakia mĩ ikũwaĩwẽ taeshũ mĩ aĩnẽ ikũwãtirukẽ duawariaikiki. Huni inũ aĩbũ Jesus ikũwãbumã bake yumeriabumarã, meribi pepatirubumaki. Hakia hunĩ Jesus ikũwaĩ kasmai aĩbũ ikũwaĩ kasmai ha dabe bakeya hatũ bake yumeriamarã, Deus hatuwẽ nuiaya habũ bakẽ ikũwãtiruki, Deusũ duawaiwẽ taeshunã.

^15-16 Aĩbuaibuũ, mĩ benewẽ mĩ nuibiaya mia henekatsis ikairã, haska watã mĩ pashamatirurã, tsuã unãmaki. Hunibuũ, mĩ aĩnẽ mia henebaĩkatsis ikaya mĩ hawẽ nuikĩ haska watã mĩ pashamatirurã, tsuã unãmariki. Haskawẽ taeshũ hunĩ ikũwãyã hawẽ aĩnẽ habetã ikũwãkatsi ikama hamapai xaranũ ika kayarã, hunĩ hawa yuiamakẽ hau aĩbu kanũwẽ. Habiaskariai aĩbũ ikũwãyã hawẽ benẽri habetã ikũwãkatsi ikama hamapai xaranũ ika kayarã, aĩbũ hawa yuiamakẽ hau huni kanũwẽ. Ikũwãma ma haskakaĩkẽ Deusũ matu nemamabia ha mã ikũwaĩwẽ taeshũ matu unãnuma hiwemakatsis ikikiki.

¹⁷ Mae tibi anushũ ikũwaĩbu hanu itxamisbu tibi anu kakũkaũkĩ haska ẽ yusĩmis habiaskari matu yuinũ nĩkakãwẽ. Haska bebũkiri mã haska beyawẽ hiwea nukũ Shanẽ Ibũ matu hiwemashanũ, iwanã, Deusũ matu tibi katukĩ kenaniki, haska Deusũ hawẽ xinãnẽ haska matũ hiwea matu betsawamani hawa ana xinãma hau mã Jesus txibã bestikubainunã.

¹⁸ Ha inũ, judeubu kaĩtã Jesus ikũwãkĩ judeubũ beya hau danãyamakubainũbũwẽ. Judeubuma kaĩtã Jesus ikũwãkĩ judeubũ beya hau txibãriayamakubainũbũwẽ.

¹⁹ Judeubũ beya txibãkĩ nũ hina kubitxi meshtemis inũ judeubũ beya txibãmarã, nũ haskai hiwekĩ Deus benimawatirumaki. Hakia Deusũ hãtxa besti txibãkĩ nũ Deus benimawatirubuki.

²⁰ Haratura hiwea txibaĩ mĩ hawẽ hiwekatsis ikai anua Deusũ matu tibi katunirã, ha beyawẽ Deus hiweshũkubaĩkãwẽ.

²¹ Ha inũ, Deusũ matu katuriama hunĩ matu escravo dayaru wakẽ hawẽ bika teneyamawe. Hakia mĩ tsumapã mia ana bikatsi ikama kasmai ibubis peiwẽ mĩ paka mia nitxiãyã benimari kaĩshãwẽ.

²² Haska huni betsã escravo dayaru mã ibianikẽ nukũ Shanẽ Ibũ matu katushũ matũ txakabu buakĩ matu haibuwaiwẽ taea escravobia Jesus mã ikũwaĩwẽ taea mã yurã escravoma keskaki. Hakia mĩ tsuã escravo dayarumabia Jesusũ mia katutã yunuawẽ taea matũ xinãwẽ mã hawẽ escravo dayaruki, Cristonarã.

²³ Jesus Cristo matu mawashũkĩ matũ txakabu matu buashunaya Deusũ ibuwakĩ hawena matu wakĩ biniwẽ taeshũ ana huni betsã matu escravo wai keska wakĩ xinã betsa matu yusĩaĩburã, danãkãwẽ, mã Cristonawẽ taearã.

²⁴ Escravo inũ escravoma mã ebetã ikũwaĩbuũ, mã haskarara hiwea Deusũ matu katuni hawa haskatã mã betsatirumaki. Habiaskas ikubaĩkãwẽ, mã Deus txibaĩburã.

Hau haskai hiwenũbũ Paulõ hatu yusĩnikiaki, na hãtxarã

²⁵ Hamẽ betsarã, beneyariabumakiri mã ea yukaima haskakiri nukũ Shanẽ Ibũ ea yunuamabia ewẽ dabanã ikĩ ea duawa hawẽ kuxipawẽ yununikai ẽ txĩtuãmawẽ taeshũ matukiri haska ẽ xinaĩ matu yusĩnũ nĩkairakãwẽ.

²⁶ Ẽ xinãnã, natiã nũ hiweatianã, nũ bika teneaii. Haskawẽ taea haskarara mã bestibu hiwearã, habiaskayukãwẽ.

²⁷ Tsuara mã aĩyanã, matũ aĩ nitxĩyamakãwẽ. Tsuara mã aĩuma aĩbu benayamakãwẽ.

²⁸ Hamẽ mã aĩyãriama aĩyaĩnã, hawa txakabumaki. Aĩbu beneyariama beneyariairã, hawa txakabumariki. Haskabia mã hanu biakanaĩtiãnã, mã bika tenetiru ẽ matu nematirubia haska mã ikatsis ikai ibubis katukĩ xinãkãwẽ.

²⁹ Ẽ betsabu inũ ẽ puibuũ, ma bari keyui kemaya aĩyãkĩ matũ aĩkiri besti xinãma nukũ Shanẽ Iburi xinãkubaĩkãwẽ.

³⁰ Minabu mawakẽ huĩti nixma mã kashamisrã, harã keyumiski. Haska besti xinãma benima keyuismarã, nukũ Shanẽ Ibu anu bestiki, haska xinãkãwẽ. Hamẽ betsarã, beyusi mã xinã txãkãbiamisrã, ha dikabi keyumiski. Ha inũ, betsabu mã mabu itxapayabia ha xinãma Jesus dasibi mabu iburi hakimayamakubaĩkãwẽ.

³¹ Haskarara na mai anu dayakĩ mabu hayai inũ mabu hayama mã haskai hiwearã, ana haska tibiwẽ benimayamakubaĩkãwẽ. Hatiara nukũ Shanẽ Ibu Jesus huaitiã na haska nũ haya tibi dasibi yamawashanikiki. Haska xinãkãwẽ.

³² Haskawẽ taea mã ana bika tenei itimaskayamanũbũ ẽ matu yuiai nĩkakãwẽ. Tsuabura aĩumabũ hawẽ Shanẽ Ibu Jesus dayashũkĩ ha besti txibãkĩ benimawatiruki.

^33-34 Hamẽ aĩyãbũ hawẽ aĩ merabewakĩ hamapai tibi akĩ hawẽ Shanẽ Ibu inũ hawẽ aĩ dikabi benimawatiruki. Haska inũ, beneyabũ hawẽ bene merabewakĩ hamapai tibi akĩ hawẽ Shanẽ Ibu inũ hawẽ bene dikabi benimawatiruki, ha dabetũ haska wakinã. Hakia aĩbu ewa ana beneumatũ inũ txipax beneyariama hawẽ Shanẽ Ibu Jesus besti dayashuni hasnũ ika hawẽ yurawẽ inũ hawẽ huĩtiwẽ benimatirubuki.

³⁵ Nemakĩ matũ hiwea beshtekĩ ana bikawakĩ itimaska wakatsi ikama hau mã unãnuma hiwenũbũ matu merabewa bestikatsis ikĩ nukũ Shanẽ Ibu besti matu duawamanũ ishũ haska ẽ xinaĩ ẽ matu yuiaii.

³⁶ Tsuãra bebũkiri hatũ aĩbu bake ha huni bimakatsi yubaima ma ha dabetã Jesus ikũwaĩbu ma pekenã, abunamerabeirã, ma aĩyaĩ inũ beneyatirubuki, hawa txakabuwamarã.

³⁷ Hakia betsarã, tsuãra hatũ huni bakẽ aĩbu xinãkĩ bitirubia ibubis haska xinãmarã, hawẽ xinã mestẽwãtã Jesus besti dayashunũ ikairã, hau aĩyãyamanũwẽ. Haska xinaĩ, peki.

³⁸ Hanua ha hatu yubaimabube aĩyaĩ inũ beneyai biakanãtã merabenaĩnã, periki. Hakia aĩuma hiwea inũ beneuma hiwearã, pehairatiruki, ẽ hãtxa txibãinã.

³⁹ Hamẽ aĩbũ ikũwaĩ hawẽ bene hiwekẽ dapashkama habe hau hiwenũwẽ. Hawẽ bene mawaya ana beneuma keska hiwea beneyakatsis iki ikũwaĩ betsa benewatiruki.

⁴⁰ Hamẽ aĩbu hawẽ bene mawakẽ ana bene betsa bikatsi ikama ikũwã besti benimai hiwetiruki. Haska Deusũ Yushĩ Pepatũ ea xinãmaya haska xinãkĩ ẽ matu yusĩaiĩ.