1 Coríntios 6 - Kaxinawá Bíblia (BR)

Ikũwaĩ dabe ha iki kayanameaibu ikũwãbumanu hatu pewakĩ iyutimakiaki, na hãtxarã

¹ Mĩ habetã ikũwaĩ betsã mia txakabuwaya haki sinatai mĩ kayanameai hau matu dabe pewanũ haskai ikũwaĩbu anu kama ikũwãbuma anu mã kamismẽ? Haskatimaki.

² Cristo ana huaya mã ikũwaĩbũ habetã yura dasibi mã unãti washanairã, mã unãmamẽ? Mã hatu haska washanaiwẽ taeshũ natiãri ikũwaĩ dabe sinatai hawara kayanameaibu hau merabewanũbũ ikũwãbuma anu hatu yunuama matũmebi ha dabe pewakĩ mã unãti watirumamẽ? Matũmebi unãkĩ mã pewatiruki.

³ Deusũ nai tsumabũ hawara txakabuwanibu nũ hatu unãti washanaiwẽ taeshũ Jesus ikũwaĩbu ha ikaibu txanima natiã nũ unãti wariatiruki, hatu daewakĩ pewakinã.

⁴ Haska ikũwãbumã xinãmis mã danãmiswẽ taeshũ mã ha ikaibu hau matu unãti wakĩ merabewanũ ana ikũwãbuma anu kai hatuki ana txiti iyamakubaĩkãwẽ.

^5-6 Ha inũ, Jesus ikũwaĩbu ha ikaibu hau ikũwãbumã unãti wanũbũ mã yunumisbuwẽ taeshũ ẽ matu dakewaii, haskatimabiakenã. Matuburã, matu anua unãnepa betsa mã hayamamẽ, haska matu pewatirã? Mã hayariki.

⁷ Ikũwaĩ betsã mia txakabuwaya ikũwãbuma anu mã pewanũ ika kakĩ matũmebi haskakaĩkĩ txakabuhairakĩ mã kanekubainaii. Mia txakabuwabiaya ana habebis manakunama tenekubaĩwẽ, hau ha besti inũnã. Ikũwaĩ betsã mĩ hawara yumetsubiaxĩkẽ ha xinãma ibubis beshtekekãwẽ, ana habebis yumetsuamarã. Mã haskairã, peki.

⁸ Hakia maturã, mã haskamaki. Matubetã Jesus ikũwaĩbu hanubi itxakawakĩ hatu beparãtã hatũ hamapai bi mã yumetsukũkainaii.

⁹ Tsuãra Deusũ hãtxa nĩkama txakabukubaĩmisbu nai anu Deusbe hiweama ishanairã, mã unaiĩ. Haskakẽ mã ikũwã kayabiriamakiri ibubis beparamei parananãyamakãwẽ, mã eska husia hiweawẽ taearã. Ha betsa betsapabu txutakĩ txutabaũmisbu inũ, yushĩ damiwakĩ ha itsa betsa wabu bitã kẽwãmisbu inũ, huni aĩyãbia aĩbu betsa hawẽ aĩma txutamisbu inũ, aĩbu beneyabia hawẽ benemabe txutanamemisbu inũ, huni aĩbu ikasi txutanamemisbu inũ, aĩbu dabe menamei txutanamei itsamisbu inũ, habu txakabui beshtekeisbumarã, Deusbe hiweama ishãkanikiki.

¹⁰ Ha inũ, yumetsumisbu inũ, hawara betsana uĩ kemuhairamisbu inũ, paẽmisbu inũ, yupukunamisbu inũ, yura betsa parãtã yumetsumisbu inũ, yauxi inãnanãkatsi isbuma haburi beshtekeabumari nai anu Deusbe hiweama ishãkanikiki.

¹¹ Maturã, betsabu ha ikaibu keska hiwebiakũkaĩkĩ Jesus Cristo mã ikũwaĩbu nukũ Shanẽ Ibu Jesus Cristõ kuxipa inũ Deusũ Yushĩ Pepatũ kuxipawẽ matu xinã betsa wamaya ikũwaĩ betsã matu naximabu matũ txakabu detsis dashkia keska wakĩ meribi habias besu keska wakĩ Deusũ Yushĩ Pepatũ matu pepawaniki.

Nukũ yurarã, Cristonakiaki, na hãtxarã

¹² Hawara Deusũ nema keyuama ini ẽ atirubia hawãra merabewakĩ ẽ huĩti ea kuxipa wama ẽ heneaii. Hawara Deusũ nemama ẽ atirubia hawãra ea beyawatã ea yabutirurã, ẽ heneriaii. Jesusũ ea yunua besti ẽ ashũkubaĩkatsis ikaii.

¹³ Hamẽ betsarã, piti pikĩ yaniwai nũ hiwenũ Deusũ piti nuku washuniki. Ha inũ, nukũ haturã, haki piti nanekĩ nũ yaniwa hiwenũ nukũ hatu nuku washuniki. Habiaskabiakẽ betsatianã, piti inũ nukũ hatu ha dabe yama washanikiki. Haska inũ, nukũ yurarã, eskaki. Nĩkakãwẽ. Nukũ yurawenã, hawẽ hamapai betsa betspabube txutanametima Deusũ nuku waniki. Hakia nukũ Shanẽ Ibu Jesusunaki, nukũ yurarã. Na nukũ yurawẽ nukũ Shanẽ Ibu nũ dayashũtiruki.

¹⁴ Ha inũ, nũ mawa nukũ yura txaputima bestima hakia haska nukũ Shanẽ Ibu mawa Deusũ bestẽwanishũ hawẽ kuxipawẽri nuku bestẽwãriashanikiki.

^15-16 Deusũ Moisés yuia kenekĩ: “Huni hawẽ aĩbe hiwearã, yura bestitxai keskatiki”, akĩ haska keneniwẽ taeshũ tsuabũra aĩbu betsa ati wai habe yura bestitxai keskakĩ hawena wamiski. Hakia nũ Cristõ enabubia nukũ yura habe neshebia henetã ana nukũ yura betsa ibu wamakĩ neshenũ ika atibe nesheirã, ana haskakubaĩyamakãwẽ.

¹⁷ Haskawẽ taea nukũ Shanẽ Ibube nukũ yushĩ nũ neshea hawẽ xinã nũ hayarã, habe pe hiwekubainãkãwẽ.

^18-20 Cristo nuku mawashunaya paka keska watã Deusũ nuku ibu wakĩ Jesusũ yura nuku waniki. Hawẽ Yushĩ Pepa nuku inã nukube dasia hiweawẽ taeshũ nukũ yurarã, ana nukunamaki. Haskakẽ nukũ yura meribi pe mekekĩ hawẽ Deus kẽwanãkãwẽ. Hamapai txakabu nũ amis Deusũ abuamabiakẽ hakia ibubis nukũmebi txakabu aki nũ txutanameairã, nukũ yura ibubis nũ txakabuwaii. Hanua aĩbu mĩ aĩma txutakĩ mĩ yura detsis keska wakĩ Deusũ Yushinĩ hiwe mã txakabuwaii, detsis keska wakinã. Haskakẽ tsuabũra aĩbu mĩ aĩma txutanũ, iwanã, ha xinã henetã ana hari mapuyamakubaĩkãwẽ.