1 Coríntios 5 - Kaxinawá Bíblia (BR)

Huni betsã hawẽ aniwa aĩwãkĩ ikũwaĩbu dasibi hatu txakabuwanikiaki, na hãtxarã

¹ Ikũwaĩ betsa matu anushũ txakabuhairawai hari matu anua kaka huai nũ nĩkairã: “Ikũwaĩ betsã hawẽ ibuã aĩ mebĩkĩ aĩwaĩmaki”, ikaibũ Habaa! Ikũwãbiai hawai mã haska hiweamẽ? Mã mesehairaii. Tsuabura ikũwãbumabiarã, haskai hiweabu nũ nĩkaismaki.

² Matu anua haskabiaya matũmebi mã hawẽ keaiĩ, ha huni ha akĩ huĩti nixmawamarã. Hawa yuiama mã habe hiwea itxakũkainairã, haska ha hunĩ matu wairã, nitxĩtiki. Nematã tashnimarikãwẽ.

³ Natiã hari ẽ yura ẽ matubemabia ẽ xinãwẽ ẽ matu anu keskashũ unãtã mã haskai hiwea ha huni hawẽ aniwabe hiwea ẽ matu yunuai nĩkakãwẽ.

⁴ Ẽ matu anu keskakẽ Jesus ikũwaĩ matubus itxatã nukũ Shanẽ Ibu Jesus Cristõ hawẽ kuxipa matu inãyã

⁵ hau Deusũ Yushĩ Pepatũ ana mekeyamanũ ha hunĩ txakabuwaima kupikĩ Satanás yunukĩ inãkãwẽ, Satanásã hawẽ yura hau hawara tenemanunã. Haska wanikẽ nukũ Shanẽ Ibu Jesus hukĩ hau hawẽ yushĩ mekei kanunã.

⁶ Mã eska keskaki. Matu yuinũ nĩkakãwẽ. Misi wamisbu mã unaiĩ. “Misi wakĩ hawẽ shasha wati eskarabes kapã shashai ewapamiski”. Haska keskai hawara txakabu ha hunĩ matu anushũ akĩ matu daũkĩ akawabia unãbiai pepai mã keaiĩ, haskatimabiakenã.

⁷ Hamẽ Deusũ nai tsuma debuwanikatũ judeubũ bakebu dũkebaini Egitonawabũ huni bake iuwabu tenãnitiã xinaĩ Páscoa nawakĩ shasha wati dasibi judeubũ putatã shasha watiuma misi washũ txashuwã bake detetã pi nawakubaĩmisbuki. Hamẽ nukurã, txanima nũ shasha wati bena keskaki. Haskawẽ taea Cristo txashuwã detenibu keskai nuku mawashũkĩ nukũ txakabu nũ heneshanũbũ nuku ishuniki. Mã ma xinã betsa warã, hamapai txakabu mã hayari henerikãwẽ. Haska washũ shasha wati misi shasha wamisbu keskawẽ matũ xinã txakabũ matu ana txakabuwatirumaki.

⁸ Hawara txakabu mã amis henetã ana itxakanikama duapakĩ hãtxa kayabi yuikĩ hawara Jesusũ nuku ashuni xinaĩ nawakubaĩkãwẽ.

⁹ Ha inũ, bari betsatiã kenewẽ matu yuikĩ: “Habu dakeisma txutanamebauni itimaskaibu hatube mapuyamakãwẽ”, akĩ ẽ matu yusĩma ana hariri matu yusĩnũ nĩkakãwẽ.

¹⁰ Matu kene bumakĩ ikũwãbuma txutanamebaũmisbukiri ẽ keneama inũ yura betsa hamapai hayanũ ika kemuaibu inũ yura betsa parãtã yumetsumisbu inũ dami yushĩ itsa bitã kẽwãmisbu hari ẽ matu keneshunama ikimaki, haska tibi manibaunabu tsuã mã dasibi daĩbaĩtirubumakenã. Ha ikũwãbuma keska mã ana hiweyamanũbũ haska ẽ matu keneshunimaki.

¹¹ Hakia hatiri mã eska hayabuwẽ taeshũ ẽ matu yui ikai nĩkakãwẽ. Tsuabura hãtxai: “Ẽ Jesus ikũwaĩ ẽ matũ betsaki”, ibiai haska hiweama txakabui txutanamebauni inũ, mabu tibiwẽ kemui inũ, yushĩ dami betsa bitã kẽwaĩbu inũ, yupukunaĩbu inũ paeĩ heneisbuma inũ, betsa parãtã yumetsumisbu ha haskai beparamemisburã, ana hatubetã piama daĩkubaĩkãwẽ, ana hatube mapuamarã.

^12-13 Haska ikũwãbuma ikaiburã, haska nukũ dayamaki, nũ hatu unãti wapananã. Deusũ besti ikũwãbuma hatu unãshũ kupishanikiki. Hakia nukũ dayarã, Jesus ikũwaĩbu nuku inũ matũ mã atiruki, unãti watã hatu kupikĩ pewakinã. Haskakẽ ha huni hawẽ ibuã aĩbe hiwea txakabukẽ matube itxai menã nemakĩ tashnimakĩ beshterikãwẽ.