1 Coríntios 4 - Kaxinawá Bíblia (BR)

Jesusũ kuxipayabu dayanibu danaĩ eskai hiwenibukiaki, na hãtxarã

¹ Nukurã, nũ eska bestiki, nuku xinãkãwẽ. Cristõ daya ashuĩ nũ hawẽ merabewanika bestiki. Haskawẽ taeshũ nukũ xinã benawatã nuku yununiwẽ taeshũ Deusũ hawenabu matu wakatsis ikĩ hawẽ kakape yubakani hunekubirani ma shabakabi nuku matu yusĩmakubainikiki.

² Tsuara shanẽ ibu betsã hau hawẽ daya ashunũ yunuarã, hawẽ hãtxa nĩkatã txibãkĩ hau uĩmakubainũwẽ, kaneamarã.

³ Mã ea danã duakabiaiwẽ taea haska bestikiri ẽ xinãyã matũ besti mã ea atiruki, haska mã yura itxapabubetã ea unãti wakatsi ikairã. Emebirã, haskatã ẽ xinã emebi ẽ unãti watirumaki.

⁴ Haska mã ekiri xinãbiaya ẽ haska hiweshũ xinãmis ẽ txakabu amismẽkaĩ, ẽ pemismẽkaĩ, haska xarabũ ea bika tenemamaki. Eã ẽ xinãnã, Deusũ ẽ txakabu buatã ea pewani hatũ besti ea unãti washanikiki.

⁵ Hanu unãtiwati iriamabiakẽ matũmebi nuku tibi unãti wakĩ ha akĩ nuku txiteyamakubaĩkãwẽ. Hanu nukũ Shanẽ Ibu huaitiã mananãkãwẽ. Hatũ besti dasibi hune nũ amis shabakabi tashnimashanikiki, na haska huĩti merã nũ haya nuku bepẽshũ uĩmakinã. Hanushũ Deusũ nukũ daya unãkĩ betsa kẽhairawakĩ betsa beshmas kẽwãkĩ ikũwaĩbu tibi Deusũ kẽwãkeakeshanikiki, manakukinã.

⁶ Ẽ betsabu inũ ẽ puibuũ, Deusũ hãtxa hakimama yusĩnã betsa itxakawama hau betsari kẽwãyamanũbũ matu kene bumakĩ ẽ Paulo inũ Apolo haska nũ hiwemiskiri besti ẽ matu keneshunaii, hau nũ imis keskai nuku mawai mã hiwekubainũbunã. Haska Deusũ hãtxa kenenibu besti xinãkĩ matũmebi akama yusĩa betsawẽ ha kenenibu binumayamakãwẽ, tapĩkinã.

⁷ Matũmebi xinã txakakĩ: “Ikũwaĩbu betsabu nũ hatu binuaki”, ikĩ mã kaneaii. Mã tsua binuamawẽ taea haskayamakubaĩkãwẽ.

⁸ Haska inũ, matũ xinãkĩ: “Dasibi unaĩ hamapai Deusũ hawenabu inãmis haya nũ ma shanẽ ibubuki”, iwanã, ea Paulo inũ Apolo mã nuku ana xinãma haskayarã, txanima kayabi matũmebi mã shanẽ ibu mẽtsisipa kayabiayarã, ana nuitapama nũ daka matube shanẽ ibushãti.

⁹ Nukũ nũ xinãnã, nũ Jesusũ kuxipayabiaburã, Deusunã hawẽ henekĩ nuku nesha daka hanushũ nuku tenãkatsis ikinã, dasibibũ nuku uĩkĩ danaĩbuwẽ taea nũ atimapaki, Deusũ nai tsumabu inũ yurabũ berubirã.

¹⁰ Nukurã, mã haskara nukukiri xinaĩ? Cristowẽ taea nũ tatĩmakenã, hakia maturã, Cristowẽ taea mã unãnepakiaki. Hamẽ nukurã, nũ babuki. Hakia maturã, mã kuxipakiaki. Nukurã, nuku itxakawakanikiki, nukuki meseamarã. Hakia maturã, matu kẽwaĩ matuki mesemisbukiaki.

¹¹ Na habia eskatianã, hawa nũ pe hiweriamaki, eska teneirã. Nũ bunimiski. Nũ ũpash manumiski. Nũ tari txuka sawea nimiski. Ha inũ, yura betsabũ nuku itxakawamisbuki. Meribi hiwe hayama nũ hiwemiski.

¹² Haska tenebiai nukũ mekenẽ dayai nũ heneismaki, babuamarã. Nuku yupukĩ shuũ abiaibũ nukũ hatu kemakinã, pewẽ besti nũ hatukiri shuũ amiski. Nuku itxakawakĩ bika tenemabiaibũ nũ hawa yuiama tenemiski.

¹³ Hamapai txakabu nukukiri yuibiaibũ unãshubira hãtxa pewẽ nũ hatu kemamiski. Txaka inũ hawara txapuai yurabũ putamisbu keska wakĩ nuku danãmisbuki. Na habiatiã nuku heneabuma nũ nĩkakubainaii.

¹⁴ Na eska ẽ matu keneshũ bumairã, matu dakewanũ ishũ ẽ matu akamaki. Hakia matu yusĩ pewai mã ẽ bakebu kayabi matuwẽ nuikĩ abuai keska wakĩ ẽ matu akaii.

¹⁵ Natiã matũ yusĩnã 10.000tũ Cristokiri matu yusĩbiaya eã dukũ Jesus mekeakiri ẽ matu yusĩtaniwẽ taea ea dukũ ẽ matũ epa kayabi keskaki. Ea hakimayamakãwẽ.

¹⁶ Haskawẽ taea ẽ matu yunuai ẽ aka ea txibãkãwẽ.

¹⁷ Mã haska xinãnũ Timóteõ ebetã Cristo txibaĩ ẽ bake keska txĩtuĩsma hau matu merabewanũ matu anu ẽ nitxiaiĩ. Ha ẽ abumistũ nukũ Shanẽ Ibu ikũwãkĩ txibãkĩ hawẽ yunuti inũ hawẽ nemati ashũkubaĩkĩ ikũwaĩbu itxati tibi anushũ haska ẽ yusĩkubauni keska shabakabi Timóteõ matu yusĩ kaikiki. Nĩkairashãkãwẽ.

¹⁸ Matu anu ẽ kama dabanẽ xinaĩ matũmebi patapai shanẽ ibui mã hamẽ keaiĩ.

¹⁹ Hamẽ nukũ Shanẽ Ibũ ea yunua matu anu hikitã ibubis keaĩbu unãkĩ hatũ hãtxa danãkĩ hatũ kuxipa ẽ unãshanaii, haska mã hãtxa unaĩ ikimẽkainã.

²⁰ Hanua matu anua Deus shanẽ ibuairã, hãtxawẽ besti mã hatu uĩmatirumaki. Hakia matũ hiwea Deusũ ma betsa wakẽ hawẽ kuxipa mã ma haya uĩtirubuki.

²¹ Haskara ẽ matu wai kashanai, mã abuai? Kashũ hiyashũ daka ẽ matu kupi kashãti? Ẽ daki matu merabewakĩ duawai unãshubira hãtxai kashãti? Haskakẽ ewẽ dateama pe hiwekubaĩkãwẽ.