1 Coríntios 16 - Kaxinawá Bíblia (BR)

Haska watã Jerusalém anua ikũwaĩbu Paulõ hatu merabewakatsi inikiaki, na hãtxarã

¹ Yunuti betsa matu yuinũ nĩkakãwẽ. Jesus ikũwaĩbu Jerusalém anuabu nuitapakanikiaki. Nũ hatu merabewanũbũ haska ikũwaĩbu Galácia anuabu ẽ hatu yunuyama keska wakĩ ẽ maturi yuiai nĩkakãwẽ.

² Matu anu ẽ kariama ea manama domingo tibi matũ dayawẽ mã pei biai itxapa mã biaitũ pei itxapa aruaya eskarabes mã biaitũ pei eskarabes arukĩ ea manakãwẽ. Mã ma itxawaxĩkẽ

³ hanua ẽ kai hikiaya pei mã itxawaxina Jerusalém anu mã bumakatsis ikĩ huni betsabu katutã ẽ kene hatu bumashanaiyabi ha merabewati pei mã itxawaxina hatu inaĩ butirubuki.

⁴ Hamẽ ẽ haska xinaĩnã, ea dikabi ẽ kayarã, habu ebe butirubuki.

⁵ Nenua kaĩkainirã, Macedônia mai pakea anu kakũkaini hanua atimas Corinto anu ẽ matu anu hikishanaii.

^6-7 Matu anu kabia ẽ hĩ hĩ ikaĩkatsi ikamaki. Hamẽ nukũ Shanẽ Ibũ ea nemama ushe dabe kasmai ui debuaya matube hiwekatsi iki hawaira ẽ kakatsi ikamaki. Hanushũ ea duawakĩ ea merabewakĩ harakirira ẽ kaya mã ea nitxĩkĩ pewatirubuki.

⁸ Ha Pentecostes habiatiãri ikũwaĩbu itxabuki Yushĩ Pepa hatuki butuni besiaibutiã ushe junho keyuaya nenu Éfeso anu ẽ habianu baxikushũ hatu uĩyuaii.

⁹ Éfeso anushũ Jesuskiri kakape yuii ẽ dayai itxapabũ ea nemai eki sinatabiaibũ Deusũ hãtxa betsabu ẽ yusĩkubainaya itxapabũri ea nĩkakanikiki.

¹⁰ Nukũ betsa Timóteo matu anu hatiara kaya nukũ Shanẽ Ibũ daya ẽ ashũmis keskari akaiwẽ taeshũ hikiai ishũ duawashãkãwẽ.

¹¹ Matubũ tsuãra danãma duawakĩ hamapai tibi bikatsis ikai merabewakĩ inãtã benimawakĩ unãnuma hau eanu hunũ nitxĩshãkãwẽ, nenushũ ikũwaĩ betsabubetã hatubetã ẽ manairã.

¹² Ea kene bemakĩ Apolokiri mã ea yukaima matu yuinũ nĩkakãwẽ. Ẽ yunubiakubaina natiã matu anu kayutirumakiaki. Hanu hatiara hawẽ xinãnẽ kashanikikirã.

Hatũ hãtxa hatu bumanibukiaki, na hãtxarã

¹³ Kuxipai hawaki teama Jesus txibaĩ txĩtuãma hamapai txakabu danaĩ mestẽnepakubaĩkãwẽ, niti ikamarã.

¹⁴ Hamapai tibi mã akairã, yura betsabuwẽ nuikĩ hatu duawakĩ ashũkubaĩkãwẽ.

¹⁵ Ẽ betsabu inũ ẽ puibuũ, Acaia mai pakea anushũ Estéfanas inũ habe hiweabũ habu dukũtũ Jesus ikũwãkĩ taewanibũ ikũwaĩbu dasibiwẽ nuikĩ hatu merabewakubaĩmisbu mã unaiĩ.

¹⁶ Habu keska nĩkakĩ ikũwaĩbu betsabũ nukũ Shanẽ Ibu Jesuskiri kakape dayamisbu hatu nĩkariakĩ dasibi hatu merabewakubaĩkãwẽ.

¹⁷ Mã txai hiwekẽ matumaki Estéfanas inũ, Fortunato inũ, Acaico ea anu bexĩshũ hawara mã ea ashũtiruma ea ashuaĩbuwẽ taea ẽ benimahairaii.

¹⁸ Habũ mã ea ashũtiru keska wakĩ ea anu bexĩshũ ẽ huĩti xinã txãkãwãkĩ ea benimawakanikiki. Ikũwaĩ betsabu haska keskabu duawariakubaĩshãkãwẽ.

Hawẽ kene Paulõ keyunikiaki, na hãtxarã

¹⁹ Ikũwaĩbu Ásia mai pakea anushũ matukiri pe xinãkĩ habũ hãtxa matu yunukanikiki. Ha inũ, Áqüila inũ Prisca inũ dasibibu hatũ hiwe anu itxamisbũ matukiri pe xinãriakĩ habũri hatũ hãtxa matu yunukanikiki.

²⁰ Nenushũ ikũwaĩ dasibibũ habũ hãtxa matu yunuriakanikiki. Ikũwaĩ betsaki nukutã hatube benimai yuka iki ikukunãkubaĩkãwẽ.

²¹ Kenekĩ keyukĩ ẽ tsumapã ana ea ashũama ẽ Paulõ emebi ẽ matu kene keyushunaii.

²² Tsuabũra nukũ Shanẽ Ibu abuamarã, hau Deusũ yupunũwẽ. Nukũ Shanẽ Ibu nũ manai hawaira hau ana menã hurinũwẽ.

²³ Nukũ Shanẽ Ibu Jesusũ hau hawẽ pepawẽ matu duawakubainũwẽ.

²⁴ Matubetã ẽ Jesus Cristo ikũwaĩwẽ taea matu xinaĩ ẽ matuwẽ nuikũkainaii. Hatiski, ẽ hãtxarã. Paulo