1 Coríntios 14 - Kaxinawá Bíblia (BR)

Hãtxa hatuna tapĩriamawẽ hãtxairã, eskatikiaki, na hãtxarã

¹ Ha dukũ yura betsabuwẽ duapai mã nuitiru tapĩkubaĩkĩ Deusũ Yushĩ Pepatũ kuxipawẽ hawara Deus mã dayashũkatsis ikai yukakubaĩkãwẽ. Hakia Deusũ Yushĩnĩ matu dayamai hau hawẽ hãtxa shabakabi Deus yuishũkĩ hawẽ yurabu yusĩkubaĩkĩ henetima yukakubaĩkãwẽ.

² Yushĩ Pepatũ hãtxa matu inã mã hawẽ hãtxairã, Deus mã yuiaii. Mã haskabiai hawẽ hãtxa matu anua tashniai hunea tsuã mã hawa nĩka pewatirubumaki.

³ Ha inũ, tsuãra Deusũ kakape Deus hatu yuishũkĩ habũ ha hãtxa nĩkaiwẽ yuiaya nĩkairã, hawẽ hatu ha akĩ kuxipawai inũ, hawarawẽ dateai punu nukabu hatu benimawatiru inũ daewakĩ hatu duawatiru yuiai nĩkamisbuki.

⁴ Deusũ hãtxa shabakabi yuishunikabũ ikũwaĩbu itxapa yusĩkĩ hawẽ hatu kuxipa watibiakẽ hãtxa tapĩriamawẽ hawẽ hãtxamawẽ hãtxai ibubis besti xinã txakãmisbuki, tsuã nĩkamabiakenã.

⁵ Tsuabura matũ hãtxamawẽ Deus yuishuni mã hãtxaya huni betsã matũ hãtxawẽ haska yuiai matu maewashũamarã, ha hãtxa tashniaiwẽ tsua merabewatirumaki. Hamẽ betsarã, matũ hãtxamawẽ Deusũ Yushĩ Pepatũ matu hãtxamai pekẽ matu dasibi mã haska hãtxai ẽ abuaii. Hakia Deusũ hãtxa shabakabi yuishũkĩ ikũwaĩbu itxapa mã kuxipa wa pehairaya Yushĩ Pepatũ kuxipawẽ ha dukũ Deusũ hãtxa yuishũti yukakubaĩkãwẽ.

⁶ Hanua ẽ betsabu inũ ẽ puibuũ, matu anu yusĩ kashũ hãtxa mã nĩkatirumawẽ matu yusĩkĩ hawa ẽ matu pe merabewatirumaki. Matu haska wama hawara Deusũ ea unãmai inũ hawara txanima ẽ unaĩ ẽ matu yuitiruma inũ, hawẽ hãtxa ẽ matuki txanitiruma inũ, hawara yusĩa betsawẽ ẽ matu merabewatiruma iniki.

⁷ Ha inũ, teperewe inũ harpa hawẽ mimawati tapiãmabia beyuskĩ mimawairã, hawa dũkemakĩ hawẽrua wai unãtirubumaki, hawẽ hui kaĩaĩnã.

⁸ Haska inũ, shanẽ ibũ habe sinatanamemis beaibũ hau hawaira hawẽ soldadobu benũbũ itxawakatsi huni betsa yunua hatu kenakĩ trombeta mawatxakaya haska nĩkabiai soldadobu hatu unãtimaskawa hawa nĩka pewatã betirubumaki.

⁹ Habiaska keskariai matubu matũ hãtxamawẽ shabakabi Jesuskiri mã txanibiaya hawa matu nĩkatirubumariki, hawa mã hatu yuiai dabanenã. Haskairã, hamẽ niwe besti tashnimai mã hãtxakanaii.

¹⁰ Mai hirabi anu hiwebaunabu hãtxa betsa betsapa tibi hayabuki. Haska inũ, nawa betsa betsapabũ hawena nĩkatirubiakẽ

¹¹ yura betsabũ ea hãtxawabiabu hatũ hãtxawẽ hawara yuiai ẽ nĩkamakẽ: “Nawaki”, ika eki dakeaibũ eari: “Nawaki”, iriai eari ẽ hatuki dakemiski.

¹² Haratura matũ aka pepawẽ Yushĩ Pepatũ matu merabewatirurã, ha hayakãwẽ, ikũwaĩ tibirã. Haskawẽ taeshũ Deus mã dayashũkatsis ikĩ ha dukũ ikũwaĩbu betsabu merabewaxarakatsi mã ikairã, hawẽ kuxipa yukakubaĩkãwẽ.

¹³ Haska inũ, hãtxa matũ hãtxamawẽ Yushĩnĩ matu hãtxamairã, itxati hiwe anushũ yusĩ hãtxakatsirã, bebũkiri Deusbe hãtxakubaĩkãwẽ, hau ibubis kasmai huni betsã matũ hãtxa maewashũtiru matu inãnunã.

¹⁴ Ẽ hãtxawẽma hãtxa betsawẽ ẽ Deusbe hãtxakĩ kẽwãyã ẽ yushĩnĩ ha kẽwãbiaya ẽ xinã unãnepawẽ emebi ẽ hawa nĩkatirumaki.

¹⁵ Haskakenã, haskashãpa? Ẽ daka eskati. Deus kẽwãkĩ ẽ yushĩwẽ inũ ẽ xinãnẽri ẽ akaii. Haska inũ, Deus kẽwaĩ nawai ẽ yushĩwẽ inũ ẽ xinãnẽri ẽ iriaii.

¹⁶ Deus kẽwãkĩ matũ yushĩ bestiwẽ mã akayarã, yura betsabu matube itxashũ matũ hãtxa nĩkamawẽ taeshũ matubetã Deus kẽwãpaibia hawa yuitirubumaki.

¹⁷ Ha inũ, Deus kẽwaĩ hawẽruabiaibũ matube itxabũ matubetã Deus kẽwãtirubumaki.

¹⁸ Ha hãtxa ẽ hãtxama ẽ ha tapĩriamawẽ hãtxakĩ matu dasibi ẽ binuawẽ taeshũ ẽ Deus kẽwaiĩ,

¹⁹ iwanã, ikũwaĩ betsabube itxashũ itxapabu yusĩnũ, iwanã, 10.000 ha hãtxa ea nĩkabuma hãtxawẽ ẽ yusĩkatsi ikama hakia hãtxa shabakabi mekẽ bestiti dasibibũ nĩkatirubu ẽ yusĩkatsis ikaii.

²⁰ Ẽ betsabu inũ ẽ puibuũ, matubunã, haska bakeixtã hawa unãma xinãmis keska ana iyamakãwẽ. Hakia bake mixtĩbu parananaĩ txakabuwama imisbu keskai tsuabura mã ma ewarã, ana unaĩspama haskakiri xinaĩrakubaĩkãwẽ.

²¹ Israelbu Judéia anuabukiri Deusũ Isaías yuikĩ: “Hunibũ hatũ hãtxama Judéia anuabu ẽ hatu hãtxamaya nawã hãtxawẽ ekiri yuiaibu habũ hatũ hãtxa nĩkabiatã eari txibãma ishãkanikiki”, aka keneniki.

²² Haskakẽ Yushĩ Pepatũ hãtxamaya tsuara hãtxa betsawẽ hãtxairã, haska yurabũ atiruma amakĩ hatũ hãtxawẽ nĩkakĩ ikũwãriabuma hatũ xinã e itirubuki, haskawẽ xinaĩ hãtxai unãmarã. Hakia Deusũ hãtxa hatũ hãtxawẽ yusĩkinã, habũ ma ikũwaĩbu merabewatiruki. Ikũwãbumã ha hãtxa nĩkai eskarabes merabewariatiruki.

²³ Haskakẽ matu dasibi itxatã Yushĩ Pepatũ kuxipawẽ hãtxa betsa tibiwẽ dasibibu hãtxakĩ mã yuibaunaibũ yura betsa haska hãtxatiruma inũ ikũwãbuma hikishũ mã hãtxai nĩkakĩ unãmabia yuikĩ: “Jesus Cristo ikũwaĩbu hari haska hãtxatimawẽ hãtxakanikiki”, iwanã, matu yuikĩ danãtirubuki.

²⁴ Hakia Deusũ matu merabewaya matũ hãtxawẽ mã shabakabi hatu yusĩayã yurabu ikũwãbuma hikishũ nĩkakĩ hatũ xinã txakabu unãkĩ ikũwãnũ, iwanã, haska hiwemisbu unãtã matubetã ikũwãkatsis ikĩ xinã betsa watirubuki.

²⁵ Hatũ xinã txakabu hunea shabakabi wamakĩ Deusũ hatu unãmaya ana hawawẽ haskatima datei Deus kẽwãnũ ika dãti iki beutã yuikĩ: “Txanima Deus matuki dasia hiweaki”, ishãkanikiki.

Ikũwaĩ itxashũ haska tibi akĩ hawẽrua wakĩ pewatikiaki, na hãtxarã

²⁶ Ẽ betsabu inũ ẽ puibuũ, haska mã ikũwaĩbu itxatã hawara Deusũ matu amai merabenaĩ kuxipai mã eskakubainũbũ matu yuinũ nĩkakãwẽ. Deusũ matu tibi unãnepa waya huni betsã Deus kẽwãkatsi ikirã, nawakãwẽ. Ha inũ, huni betsãri yusĩkatsi ikinã, yusĩtirubuki. Betsari Deusũ hawara dama unãmashu txanikatsi ikirã, txanitiruki. Betsari hatũ hãtxamawẽ hãtxakatsis ikirã, hau hawẽ hãtxamawẽ hãtxanũwẽ. Betsã ha hãtxa yuiaya shabakabi hawẽ hãtxa maewashũkĩ yuishũkatsis ikairã, hau hatu maewashuni hãtxanũwẽ. Habu tibi hãtxakeakekĩ unãshubira ikũwaĩbu merabenaĩ mã kuxipanamekubaĩtirubuki.

²⁷ Hakia Yushĩ Pepatũ kuxipawẽ matũ hãtxamawẽ mã hãtxakatsis ikaiburã, dabe kasmai dabe inũ bestitũ dukũ mã yuiakeakeaibu habiatiãri huni betsa Yushĩ Pepatũ kuxipa hayatũri hau hatu maewakĩ shabakabi yuishũkubainũbũwẽ.

²⁸ Hakia huni betsa Yushĩ kuxipa hãtxa maewashũtiru hayamakẽ hau tsuara Yushĩ Pepatũ kuxipa hãtxa betsawẽ hãtxai matu anu hayabia itxamisbu bebunua hau matu hãtxashũyamanũwẽ. Hakia hamebi Deus kẽwaĩ haniara tsuã nĩkama Deusbe hãtxatirubuki.

²⁹ Habiaskari tibiri Deus yuishunikabũ hawẽ hãtxa shabakabi yusĩaĩbu yusĩnika dabe kasmai dabe inũ bestitũ hatũ hawara yuitirubuki. Yusĩayã yusĩnika betsabũ nĩkakĩ hawẽ hãtxa hãtxa kayabimẽkaĩ? hau yukakĩ unãkubainũbũwẽ.

³⁰ Hanua tsuara huni betsa matube itxa tsauwanua Deusũ hawẽ hãtxa shabakabi tashnimakĩ yuimakatsi ikaya ha dukũtũ yusĩkĩ hau hawaira keyunũwẽ, hanua ha katxu betsãri hau anũwẽ.

³¹ Haska wakĩ matu tibitũ inũ dasibitũ hawara Deusũ matu yuimakatsis ikai hawẽ hãtxa hatu yusĩkĩ mã akaya haska tibi dasibibũ matu anua tapiĩ benimakubaĩtirubuki.

^32-33 Mã itxatã kẽwaĩbu Deus unãnuma hiweatũ matu itimaska wakĩ husimakatsi ikamawẽ taea mã Deusũ hãtxa shabakabi mã yuishũmisbũ matũ kuxipa meketã uĩra hawẽ dayakubaĩkãwẽ. Haskai nũ itxai beyamis tibi ikũwaĩbu itxatã

³⁴ huni yusĩnãbũ yusĩkĩ keyuaya hunibũ nĩkatã yuka ikeakeaibũ ha itxabu anua aĩbuaiburi yuka ikatsis ibiai hau hãtxayamanũbũwẽ. Hawẽ benẽ mekeawẽ taea aĩbuaibu hau pes tsaunũbũwẽ, Deusũ Moisés kenemakĩ habiaskari yununiwẽ taearã.

³⁵ Hawara yuka iti tenebai kashũ hawẽ hiwetãshũ besti hawẽ bene kasmai hawẽ epa inũ hawẽ hutxi hau yukakubainũbũwẽ.

³⁶ Deusũ kakape yusĩkĩ taewakĩ matu anu dukũ tashnimama inibu mã unaiĩ. Ha inũ, hunibũ yusĩkĩ matu anu besti yusĩama irianibuki.

³⁷ Haskakẽ tsuabũra xinãkĩ: “Deusũ Yushĩ Pepa haya hawẽ hãtxa ẽ shabakabi yuishũtiruki”, iwanã, ẽ kene uĩkĩ: “Nukũ Shanẽ Ibũ Paulo nuku yusĩmaniwẽ taea yusĩa pepaki”, iwanã, unãshãkanikiki.

³⁸ Hakia tsuãra ẽ yusĩa danãyã Jesusũ ha yusĩnãri danãriashanikiki.

³⁹ Haskakẽ ẽ betsabu inũ ẽ puibuũ, tsuara Deusũ Yushĩ Pepatũ kuxipawẽ hãtxa hawẽ hãtxama hãtxakatsis ikai hatu nesewakĩ nemayamakãwẽ. Hakia Deus yuishũkĩ hawẽ hãtxa shabakabi hatu yusĩkatsi ikinã, Deus yukakubaĩkãwẽ.

⁴⁰ Hanua itxatã Deus mã kẽwãkatsis ikairã, dasibi Deusũ Yushĩ Pepatũ kuxipawẽ hawẽrua wakĩ haska ẽ matu yusĩmis txibãkĩ akubaĩkãwẽ.