1 Coríntios 13 - Kaxinawá Bíblia (BR)

¹ Haska hawẽ pepai hiwekũkaĩtirã, eska xinãtiki. Hamapai yura betsabũ hãtxa tibiwẽ ẽ hãtxatiru inũ, Deusũ nai tsumabũ hãtxawẽ ẽ hãtxatirubia ẽ hawa nuikipama hãtxairã, hawara mane kuxakĩ taĩ taĩ amisbu keska inũ mane dabe tsumashũ tsakama tsakama abaĩkĩ huiyawamisbu mimawati keskaki, hawauma hamẽ hãtxawã bestirã.

² Haska inũ, ẽ Deusũ kakape shabakabi yuinikabia inũ, Deusũ xinã ẽ unãbiamis inũ, hamapai betsa betsapa hunea ẽ unãhairabiai inũ, Deus ikũhairawakĩ mati ẽ maewatirubia ẽ nuikipama ẽ hawamahairaki.

³ Haska inũ, hamapai ẽ haya inãtã hawẽ pei bitã ha nuitapai yumaĩbu pimai inũ, Jesus Cristo ikũwãkĩ ẽ hawẽ kakape yusĩkubaunaya huni betsã ea atxishũ ẽ nĩkai ea kuabiaburã, ẽ nuikipamakẽ Deusũ ea hawawẽ manakuama ishanikiki.

⁴ Nuikipa kayabi hayarã, eskaki. Nĩkairakãwẽ. Bika tenebiai pes ikama tenemisbuki. Ha inũ, duapanãmisbuki. Ha inũ, hawara huni betsa hayawẽ nui kemuismaki. Ha inũ, shanẽ ibubia: “Ea duawakãwẽ”, isbumaki. Ha inũ, hawara pepa amisbukiri tsua yui hatũmebi keĩsbumaki.

⁵ Haska inũ, metukĩ yura betsabu dakewama hãtxai pemisbuki. Ha inũ, hatũ xinãnẽs besti ikatsi isbumaki. Ha inũ, hawaira sinataisbumaki. Ha inũ, hawara hakiri txakabuwaimabu ana has xinaĩsbumaki.

⁶ Ha inũ, hawara wai txakabu akaibuwẽ benimaisbumaki. Txanima hawara pepa besti tashniaya uĩ hawẽ benimamisbuki.

⁷ Tsuabura nui hayarã, bika tenemabiabu ana hatube kemanameama tene keyumiski. Ha inũ, tsuabũra hatũ hãtxa ikũwãkatsi imisbuki, yui kaya keskakenã. Ha inũ, haratura pepa kaĩaĩ manakubaĩmisbuki. Ha inũ, hawara pepa tibi mei tenemisbuki.

⁸ Yurabũ Deusũ hãtxa shabakabi yuimisbu Deusũ hatu henemai inũ, yura betsaburi hãtxa tapĩriamawẽ hãtxai Deusũ hatu henemashanai inũ, hamapai xarabu unãkĩ keyubiakubaĩxinabu haska tibi Deusũ yamawashanikiki. Hakia Jesuswẽ taea nuikipabu betsawẽ nuikĩ merabewakĩ heneisbuma haska besti keyuama ishãkanikiki.

⁹ Natiã Deusũ hãtxa eskarabes tapĩtã nũ unaiĩ. Hakia Deus hãtxashũkĩ nũ yusĩbiai mawaira nũ kati akĩ keyuamaki. Harã, keyushanikiki.

¹⁰ Haskakẽ Jesus habi ma hukẽ dasibi hanushũ ana huneamakẽ hakiri tapĩkĩ nũ unãkĩ keyushanaii.

¹¹ Eskaki. Nĩkairakãwẽ. Bake mixtĩbũ pesheixta unãkĩ hawẽ hãtxawẽ yuikĩ hawẽ xinãnẽ xinãkĩ hawara bake mixtĩbũ unãmis eãri ẽ unãniki. Hakia huni ewatã bakeixtã xinã henetã huni ewã xinãnẽ ẽ xinãmiski.

¹² Haska inũ, ha mane txasha beisiti keskawẽ uĩkĩ nukũ yura pe beshmas nũ uĩmiski. Habiaskari Deusũ xinã pesheixta nũ unãmiskẽ Jesus ana huaya haska Deusũ ẽ huĩti unãmiswẽ eari Deusbe beisinãrabekĩ ẽ unã beshmas wamis ẽ unã keyushanaii.

¹³ Ha inũ, na xinã dabe inũ besti keyuismaki, ikũwaĩnã, yubakani dateama manatirã, nuikipa kayabirã. Na xinã dabe inũ besti hatũ binu keyuarã, nuikipa kayabiti bestiki.