1 Coríntios 12 - Kaxinawá Bíblia (BR)

Deusũ Yushĩ Pepatũ haska hatu yuimatirukiri Paulõ hatu yusĩnikiaki, na hãtxarã

¹ Ẽ betsabu inũ ẽ puibuũ, haska Deusũ Yushĩ Pepatũ matu tibiki hikitã hawẽ aka kuxipa tibi matu amamiskiri hau mã tapĩ pewanũbũ matu yuinũ nĩkakãwẽ.

² Jesus mã ikũwãriama yushĩ txakabũ ha dami betsa txakabu hiwea hayama inũ hãtxa hayamatũ hawa xinãma haskati dabanẽ matu iyua mã kẽwãkubainirã, haskarã, mã unaiĩ.

³ Hamẽ betsarã, Deusũ Yushĩ Pepa hayatũ hawẽ hãtxa yuishunikã Jesus yuputirumahairaki. Ha inũ, yura betsãri txanima yuikĩ: “Jesus Cristo ẽ Shanẽ Ibuki”, iwanã, yuitirumaki, Yushĩ Pepatũ kuxipawẽ merabewamawẽ taearã. Haskaki, xinaĩrakãwẽ.

Deusũ Yushĩ Pepatũ hawẽ kuxipawẽ Deusũ daya nuku amakeakemiskiaki, na hãtxarã

⁴ Hanua nũ ikũwaĩbu tibi nũ hawẽ kuxipanamei inũ nũ merabenamenũbũ Yushĩ Pepatũ hawẽ kuxipa betsa tibi nuku yunuakeakekĩ habias Yushinĩ nuku yunumiski.

⁵ Ha inũ, merabenãti betsa betsapa nuku akeakekinã, habias Shanẽ Ibu Jesus Cristõ nuku tibi nuku yunumiski.

⁶ Epa Deus nũ dayashunairã, haska nuku tibitũ hawẽ daya nũ ashuaĩ betsa betsapa nuku tibiwẽ kaĩmamiski. Haska wakĩ habias Epa Deusũ nuku amakĩ hawẽ kuxipawẽ nũ hawenabu nuku tibi yunuakeakemiski.

⁷ Deusũ nuku yunukĩ txanima shabakabi hawẽ Yushĩ Pepawẽ nuku tibi merabenãti xarawakĩ ikũwaĩbu dasibibu pashkatima wakĩ nuku yunuakeakemiski.

⁸ Yushĩ Pepawẽ yura bestibu tibi hawẽ kuxipa yunukĩ Deusũ xinãwẽ shabakabi hau hãtxanũbũ unãnepa kayabibu hatu wamiski. Habias Yushĩwẽ bestibu tibi shabakabi pe yusĩti xarawakĩ itxapa unãhairaibu yusĩnãbu hatu wariamiski.

⁹ Betsa habias Yushĩwẽ hawẽ kuxipa yunukĩ hawa dateama xinã betsa betsapama ikũhairawanikabu wakĩ betsa isĩ teneaibu hatu kaya wakĩ shushawanika wakinã,

¹⁰ betsa haska tsuã atiruma hawẽ kuxipa unãmati dami betsa betsapa wanikabu wakĩ betsa Deus anua hãtxa nĩkatã txaninikabu wakĩ betsa haratura yushĩ txanima txaniai inũ haratura yushĩ txani txakai unãtirubu hatu wakĩ betsa hãtxa tapĩriamawẽ hãtxatirubu wakĩ betsãri habũ hãtxa nĩkatã matũ hãtxawẽ hatu shabakabi maewashunika wakĩ Deusũ nuku tibi yunuakeakeriamiski,

¹¹ haska tibi nuku wakĩ Deusũ Yushĩ Pepatũ hawẽ kuxipawẽ Deusũ daya nuku amakĩ haska abuai keska yura tibi hawẽ kuxipa yunuakeakekinã.

Jesus ikũwaĩ dasibiburã, pabu tibi yura keskakiaki, na hãtxarã

¹² Nukũ yura bestitxaibia nukũ pabu tibi tsamiakeakearã, dasibirã, yura bestitxaiki. Haska keskai nũ Cristo ikũwaĩ betsa betsapabia nũ hawẽ yura bestitxai keskaki. Eskaki, matu yuinũ nĩkakãwẽ.

¹³ Habiaskari wakĩ nũ habũ ikũwaĩ tibi judeubu inũ judeubuma inũ, escravo dayaru inũ tsuã dayarumã nũ Jesus ikũwãyã nuku duawakĩ habias Yushĩ Pepa Deusũ ma nuku inãkeakekẽ ikũwaĩ betsabuki dasinũ nũ ikaya henewẽ nuku naximabu ha Yushinĩ nukũ yura bestitxai keska wamiski.

¹⁴ Haska keskarã, nukũ pabu pashka tibi hayamaki. Hakia pabu mirima nũ hayaki. Haska matu yuinũ nĩkakãwẽ.

¹⁵ Hanushũ nukũ taẽ mekẽ xinãkĩ yuikĩ: “Ẽ mekẽmawẽ taea ẽ hawẽ yuramaki”, iwanã, yuibiaya dasibi ha yuraki tsamiaki.

¹⁶ Ha inũ, pabĩkĩ beru xinãkĩ yuikĩ: “Ẽ berumawẽ taea ẽ hawẽ yuramaki”, iwanã, yuibiaya dasibi ha yuraki tsamiriaki.

¹⁷ Yura dasibi beruskenã, hawawẽ nĩkatirubumẽ? Haska inũ, yura dasibi pabĩkiskenã, hawawẽ shetetirubumẽ? Yura pabu tibi hawẽ daya haya keska ikũwaĩ tibi hawẽ daya hayariki.

¹⁸ Hanushũ nuku tibi Deusũ katutã haska abuai keska wakĩ nũ ha dayashunũbũ haska daya nuku yunuakeakemiski, yura pabu tibi keska wakinã.

¹⁹ Nukũ pabu tibi nũ bestitxaiyarã, nũ yurauma ikeanaii.

²⁰ Hakia txanima nukũ pũyã inũ, nukũ kixi inũ, nukũ tae inũ, nukũ bushka inũ, dasibi betsa betsapa nũ hayarã, nũ yura bestitxai hayaki.

²¹ Ha inũ, berũ mekẽ yuikinã: “Ẽ mia hayakatsi ikamaki”, atirumaki. Ha inũ, bushkapãri tae yuikĩ: “Ẽ mia hayakatsi ikamaki”, atirumariki.

²² Haskarara dasibi ikũwaĩbu nũ merabenamemis yusĩkĩ nukũ yura kayabikiri yusĩkĩ ẽ matu nĩkamairã, ea nĩkakãwẽ. Hawara nukũ yura anu nebiakẽ nũ xinaĩsmarã, nukũ mẽtsis inũ, nukũ bexpi inũ, nukũ dekĩ inũ, nukũ bu inũ, nukũ dani ha tibi hayama nũ bika tenei hiwetirubuki.

²³ Haska inũ, dakekĩ hawara yura betsabu nũ uĩmakatsi ikama yauxikĩ ha hunenũ ika tari sawekĩ atximai nũ hawẽruamiski.

²⁴ Hakia hawakira nukũ yura dakeama hunekatsi ikama nũ hawa bepuismaki. Hamẽ hawakira nukũ yura dakeai inũ ibubis nũ dakemis Deusũ nuku atximakĩ hawẽrua nuku wamiski.

²⁵ Haska nukũ yura pashkaisma keskai ikũwaĩbu dasibi xinã betsa betsapa nũ hayama habiaskas nũ xinaĩbu habube duanamei ikũwaĩ betsabu uĩkĩ hatũ hamapai tibi hayabumawẽ hatuwẽ nuikĩ nũ merabenanũbũ Deusũ nuku katumakeakemiski.

²⁶ Haska inũ, nukũ pabu betsã hawara bika teneaya dasibi yura isĩ tenemiski. Haska keskariai ikũwaĩ betsa hawara txakabu teneaya dasibibũ habetã tenetirubuki. Ha inũ, nukũ pabu betsaki hawara hawẽrua nũ sawemaya nukũ yura hirabi hawẽruamiski. Haska keskariai ikũwaĩ betsa tsuãra kẽwãkĩ duawaibũ dasibi hawẽ nũ benimamiski.

²⁷ Hamẽ matu dasibi mã yura betsa tibibiakẽ Deusũ Yushĩ Pepatũ meribi tibi matu kuxipa waya daya betsa betsapa Deusũ matu yunuakeakearã, mã habias Cristõ yura keskabuki.

²⁸ Haska tibi nũ hayanũbũ Deusũ haska abukĩ hawẽ daya tibi nuku yunukĩ ha dukũ Jesusũ kuxipayabu wakĩ ha katxu Deusũ hãtxa kakape yuishunikabu wakĩ ha katxu yusĩkĩ tapĩmanikabu wakĩ hanua ikũwaĩ betsabu habũ tsuã atiruma dami wanikabu inũ, habũ isĩ teneaibu shushawanikabu inũ, habũ merabewanikabu inũ, shanẽ ibu keska wakĩ yununikabu wakĩ hanushũ hãtxa betsa tapĩriamawẽ hãtxatirubu wakĩ haska tibi nuku yunuakeakeniki.

²⁹ Nũ dasibi haskabia ikũwaĩbu tibi nũ dasibi Jesusũ tsuma kuxipayabuma mã nuku unaiĩ. Ha inũ, dasibiburi Deusũ hãtxa kakape yuishunikabumaki. Ha inũ, dasibibũri yusĩkĩ tapĩmatirubumariki. Ha inũ, haska tsuã atiruma dami wai dasibibũri atirubumaki.

³⁰ Ha inũ, dasibibũri isĩ teneaibu shushawatirubumaki. Ha inũ, dasibibũri hãtxa betsa tapĩriamawẽ hãtxatirubumaki. Ha inũ, dasibibũri hatũ hãtxa nukũ hãtxawẽ yura betsabu yuishũtirubumariki. Mã haska haya tibi mã unaiĩ.

³¹ Haska tibi mã hayawẽ taeshũ unãkĩ matunabu merabewakubaini pe hiwekĩ hawẽ Yushĩ Pepatũ kuxipawẽ hawara pepa Deusũ abuhairai hayakatsis ikĩ yukakubaĩkãwẽ. Mã haskai pepai hiwetirubiakẽ hatũ ha binua ẽ matu yuiai nĩkakãwẽ.