1 Coríntios 11 - Kaxinawá Bíblia (BR)

¹ Haska Cristo hiweni eã ẽ mawai hiwemis keskai matũri ẽ hiwemis ea mawai hiwekĩ eari txibãkubaĩkãwẽ.

Aĩbuaibu itxati hiwe anua haskatikiaki, na hãtxarã

² Ẽ matu yusĩtani habi txibaĩ mã txĩtuãmawẽ taeshũ benimakĩ ẽ matu kẽwaiĩ.

³ Haskabia Deusũ hãtxa nĩkai itxatã Deus kẽwãkĩ haska aĩbuaibu hau ikubainũbũ matu yuinũ nĩkakãwẽ. Ha dukunã, Cristõ hunibu mekekĩ yunumiski. Hunibũri hawẽ aĩ mekekĩ yunuriamisbuki. Habiaskari wakĩ Deusũ Cristo mekekĩ yunuriamiski.

⁴ Hakia huni betsã hatũ maiti mabikiama sawea Deusbe hãtxai kasmai Deusũ hãtxa hatu yusĩkinã, Cristo duawama itxakawaikiki.

⁵ Hakia aĩbu betsãri hawẽ bushka mayabukuama Deusbe hãtxai kasmai Deusũ hãtxa hatu yusĩkinã, hawẽ bene duawama itxakawariaikiki, hawẽ bu mashtekei keyua mãkua nia keskakinã.

⁶ Haskawẽ taea mayabukukatsi ikamarã, hau mashtekei keyunũbũwẽ. Hamẽ mã dakei mashtekei keyukatsi ikamarã, batxi tuash ewapawẽ mayabukukubaĩkãwẽ.

⁷ Hamẽ hunirã, hawawẽ hawẽ bushka mayabukutirubumaki, Deusũ huni ha dukũ damiwakĩ hawẽ kuxipa unãti wati ha itsa Deusũ huni waniwẽ taearã. Hakia aĩburã, hunibu itsa Deusũ hatu waniki, hau hawẽ benẽ kuxipayakĩ duawanũbunã.

⁸ Ha dukũ huni damiwatã hanubi hawẽ pixi bitã aĩbu damiwaniki. Aĩbu anua hawẽ pixi bitã huni damiwama inikiaki.

⁹ Huni damiwakĩ aĩbũ hau benewanũ, iwanã, damiwama iniki. Hakia aĩbu damiwakinã, hunĩ bitã hau aĩwãshanũ, iwanã, damiwashuniki.

¹⁰ Haskawẽ taeshũ hunĩ hawẽ aĩ mekemiswẽ taeshũ aĩbũ Deus kẽwãkĩ hawẽ hãtxa shabakabi yuikĩ hatũ bushka hunekĩ tari tuashwẽ hau mayabukukubainũbũwẽ, hawẽ benẽ kuxipa unãmati wakĩ duawairã, haska wakĩ Deusũ nai tsumabũ hatũ Shanẽ Ibu duawamisbu hatu keska wakinã.

¹¹ Haskakẽ nũ Jesus ikũwaĩburã, hunibus aĩbuuma hiwetirubumaki. Aĩbusri huniuma hiwetirubumariki, ha dabe pashkatã hawawẽ haskatirubumawẽ taearã.

¹² Haskawẽ taeshũ xinãkãwẽ. Txanima hunĩ pixi bishũ Deusũ damiwakĩ aĩbu wanikiaki. Haska inũ, habias aĩbu anuari huni inũ aĩbu bake kaĩmisbuki. Haska dabes dukũ Deusũ hatu damiwaniwẽ taea yura dasibi hiwebaunabuki.

¹³ Hamẽ betsarã, aĩbu Deusbe hãtxairã, hawẽ bushka tari tuashwẽ mayabukuama itimẽ? Mayabukutã iti daka? Matũmebi xinãkãwẽ.

¹⁴ Haska inũ, aĩbu itsai hunĩ bu txaipa wairã, haska nukũ hiwea nuku wabiani ibubis betsai daketapai bu txaipayai nũ hawẽ daketirubuki.

¹⁵ Hamẽ aĩbuaiburã, hatũ bu txaipa wai hawẽruakĩ hatũ bu beneai meshteama hau bu txaipanũbũwẽ, mayabukui keskairã.

¹⁶ Na yusĩawẽ mã ha ikatsis ikairã, ha ikãwẽ. Hakia na haska ẽ matu yusĩaĩnã, habias keskari Jesus ikũwaĩbu itxamisbu tibi anushũri habiaskari xinãkĩ yusĩkanikiki.

Jesus nuku mawashuni hawẽ xinãmati piti pikĩ txakabuwanibukiaki, na hãtxarã

¹⁷ Na ẽ matu keneshũ bumaiwẽ matu ha akĩ txitenũ nĩkakãwẽ. Ikũwaĩbu betsabube itxatã pewama mã hatu itxakawaiwẽ taeshũ ẽ matu kẽwãmaki.

¹⁸ Ha dukũ matukiria hushũ ea yuiabu ẽ nĩkairã, mã ikũwaĩbu itxairã, mã shukui pashkakanikiaki. Haska txanima pashkatã mã pewairã, mã haskaiwẽ taeshũ eskarabes ẽ matukiri ikũwaiĩ.

¹⁹ Matũmebi pashkai mã unãtinãkeakeairã, haskatimaki.

^20-21 Ikũwaĩbu itxashũ pibiakĩ yura betsabũ bebũkiri habũ piti beshũ pashkama hawaira keyuaibũ ha habu piti eskarabes haya buniaibũ hanua betsabu pãekĩ haska tibi wakĩ nukũ Shanẽ Ibu nuku mawashuni xinãmati piti pinũ, iwanã, mã haska xinãbetanã akamaki, haska watimabiakenã.

²² Matũ hiwe anu piti hayamakẽ ikaskĩ bebũkiri yaniwakatsi ikama ha piti bawabirã beshũ dabukũ hatu pashkashũkĩ inãkatsis ikama yauxikĩ hawaira keyukĩ ikũwaĩbu betsã piti eskarabes beabu hatu dakewakĩ Jesus ikũwaĩbu dabĩwãkĩ Jesus nuku mawashuni xinãmati piti pinũ ikaibu mã hatu dakewaibu matukiri yui benimakĩ ẽ matu kẽwãtirumaki.

Jesus nuku mawashuni hawẽ xinãmati pitikiri Paulõ hatu shabakabi yusĩnikiaki, na hãtxarã

²³ Jesus nuku mawashuni xinãmatikiri nukũ Shanẽ Ibũ ea yusĩni ẽ maturi yusĩtani unãbiakĩ mã akĩ pewamawẽ taea ẽ matu kẽwãmaki. Ana matu yuinũ nĩkakãwẽ. Habias mexutiãri Judasĩ Jesus hatu atximakatsi ikaya hatubetã pikĩ Jesusũ misi bitã tsumashũ

²⁴ Deus kẽwãtã misi namakis tũketã hawẽ kuxipayabu inãkĩ yuikĩ: “Narã, ẽ yuraki. Matuwẽ dabanẽ matu mawashũkĩ ẽ yura ẽ matu inãshanai keskaki. Pikãwẽ. Ea xinãbetanã habiaskari akubaĩshãkãwẽ”, iwanã,

²⁵ misi inũ txashuwã bake nami hatubetã pitã kẽtxa uva vinho mata tsumashũ Deus kẽwãtã hatu yuikĩ: “Yuba benawakĩ ẽ matu mawashuni kai xinãmati inãkĩ na uva vinho ẽ matu amairã, mawakĩ ẽ himi ẽ matu habashũshanai keskaki. Ikũwaĩbube itxashũ ea xinãbetanã habiaskari akubaĩshãkãwẽ”, hatu wanikiaki.

²⁶ Jesus ana huriamakẽ hawẽ xinãmati misi pikĩ inũ hawẽ xinãmati uva vinho akĩ nukũ Shanẽ Ibu nuku mawashuni mã hatu xinã benawamakubaĩshanaii, kaneamarã.

Ikũwaĩbu tibi haskatũ nukũ Shanẽ Ibũ yura inũ hawẽ himi atikiaki, na hãtxarã

²⁷ Haskakẽ tsuabũra Jesus nuku mawashuni xinãmati uva vinho inũ misi pikĩ haska nukũ Shanẽ Ibũ xinãmati nuku washuniki meseama hawẽ yura inũ hawẽ himi atxakai mã ibubis atimapakubaĩkanaii.

^28-29 Matũmebi ibubis matũ xinã pe unãtã hawa txakabu hayama mã pitiruki. Hamẽ txakabu pewariamatunã, mã piyutirumaki. Mã hawaraxina matũ xinã mã pewariamarã, haskakĩ eistã Jesusũ yura hawẽ haskakatsi mã piai? Mã xinãma haki meseama piaiwẽ taeshũ Deusũ matu kupishanikiki.

³⁰ Ikũwaĩbũ haska kanemisbuwẽ taea matũmebi betsa betsapa babui betsaburi isĩ betsa tenei betsaburi mã debukubaĩkanaii.

³¹ Nukũ xinã ibubis pewai nũ ma unãti wakẽ nukũ Shanẽ Ibũ nuku kupiama ishanikiki.

³² Hakia nukũ Shanẽ Ibũ nukũ yura kupikinã, nuku hawẽ tapĩmanũ, iwanã, nuku akikiki. Nuku kupibiatã ha Jesus ikũwãbumabe nuku tenã kayabiama ishanikiki.

^33-34 Haskakẽ ẽ betsabu inũ ẽ puibuũ, ikũwaĩbu betsabubetã pikĩ Jesus nuku mawashuni xinãmati mã pikatsis iki bunihairakĩ matũ hiwe anushũ bebũkiri pitã hatube itxakubaĩshãkãwẽ. Hanushũ hatubetã pi matũ betsabu manakĩ hawaira piyamakãwẽ. Mã haska wakĩ ana kaneamakẽ Deusũ matu kupiama ishanikiki. Ana betsakiri mã ea keneshunimarã, matũ mae anu kashũ haska mã ikai pewakĩ ẽ matu yusĩ kashanaii.