1 Coríntios 10 - Kaxinawá Bíblia (BR)

Yushĩ dami betsa Jesus ikũwaĩbũ kẽwãtimakiaki, na hãtxarã

¹ Ẽ betsabu inũ ẽ puibuũ, judeubũ shenipabukiri haska Deusũ hatu wani mã hakimayamashanũbũ matu xinãmanũ nĩkakãwẽ. Egito anua kaĩbainaibũ Deusũ ẽ shenipabu iyukĩ txi kuĩ puei maya kai anu butukaini hatube kai Iãnewã Taxipa nuahairabiakẽ hawẽ kuxipawẽ hene pashkakĩ bai watã dasibi hatu pukemanikiaki.

² Hanua Deusũ hatu yunua kuĩ pueaiwẽ inũ, Iãnewã Taxipa pukeaibuwẽ ha dabewẽ taea dasibibu Moiséski hau txiti inũbũ Deusũ hatu naximabainikiaki.

³ Haska inũ, hanu piti hayamakẽ nai anua piti Deusũ hatu inãkubaina dasibibũ piriakubainibukiaki.

⁴ Ha inũ, ẽ shenipabũ ũpash manuhairaibũ habiatũri mixki anua ũpash tueshũ hatu amani hatube kakĩ dasibibu ũpash pepa amariakubainikiaki, ha Yushĩ kuxipa Cristo yura kayabi hayariama mixkiki damitã hatu amakinã.

⁵ Haska wakĩ Deusũ nai anua pitiwẽ inũ ũpashwẽ hatu duawabia hawẽ hãtxa nĩkabumawẽ taeshũ eskarabes pepabu danãmabia itxapabuki sinatakĩ hanu hiweabumanu hatu ima atãbaunaya Egito anua kaĩnibu huni ewabus debui keyukubainibukiaki.

⁶ Na haska dasibi Deusũ hatu akubiranirã, hau txakabuwẽ nũ kemuyamanũbũ Deusũ nuku yusĩkĩ haska hamapai txakabuwẽ ẽ shenipabu kemui hanu hiweabumanua debunibu nukũri shabakabi nũ hawẽ unãshanũbũ hatu akubainikiaki.

⁷ Hanushũ Moisés kenekĩ: “Ouro ina awa bake damiwabu ha dami uĩ tsaushũ pi inũ mabesh aki benibaũ beyuskĩ ha dami kẽwãnibuki”, hatuki keneniki. Haska judeubũ dami betsa washũ kẽwãnibu keskarã, matũri ana haska husiayamariakubaĩkãwẽ.

⁸ Haska inũ, Israelbu aĩbu hatũ aĩmabe txutanameaibũ Deusũ hatu kupiaya shaba bestitxaitiã 23.000 debunibukiaki. Hatu keskakĩ aĩbu nukũ aĩ kayabima ana metaskayamakubainãkãwẽ.

⁹ Ha inũ, hatiritũ Moisés ha akĩ Deus unãti wakĩ yuikĩ: “Haskakĩ mĩ nenu nuku iweima ikai?” iwanã, yuikĩ: “Piti hayamaki. Ũpash hayamaki. Ha inũ, piti nai anuarã, nismaki”, iwanã, Deus unãti waibũ dunu mirima Deusũ hatu pima debunibukiaki. Haskanibu keskakĩ nukũri Cristo unãti wayamanãkãwẽ, mesekirã.

¹⁰ Ha inũ, hatiritũ Moisés inũ Arão hune haki ha ikĩ yuaĩbuwẽ taeshũ nai tsuma Deusũ hatu tenãmanikiaki. Haskanibu keskakĩ Deusri shabakabi haki ha ikĩ yuãyamakubainãkãwẽ.

¹¹ Ẽ shenipabu txakabukubiranaibu Deusũ haskaibu hatu kupinikiri hau habiaskari nũ iyamashanũbũ bebũkiri haska ikaibukiri Deusũ hãtxa nuku keneshunibuki, nukuri bari hawẽ henei keyuaitiã hiwea nũ haskariayamashanũbunã.

¹² Hatu haska waniwẽ taeshũ tsuabũra: “Jesus txibãkĩ duawai ẽ txĩtuãmaki”, iki keãma mestẽtã hau uĩrakubainũbũwẽ, txakabu tibi huayarã.

¹³ Tsuabũra hawara txakabu ma huni mã meriama inũ txakabuhairatũ matu atxima ana matu atximakatsis ikai nukũ yura babũ nũ tenetirumarã, xinãkãwẽ. Haskawẽ taeshunã, mĩ yura babubiakẽ Deus putama haki txiti ikubaĩkãwẽ, nuku babu watã hau nuku bika tenemakĩ haska tsuã tenetiruma nũ haskatã binutirumaki. Matu haska tenemabiaya hawẽ baxikuama Deusũ hawẽri hawẽ kuxipa matu unãmakĩ matu hawẽ tashnimakĩ matu binumashanikiki, txakabu tenekĩ mã binuaiwẽ taeshunã.

Cristo kẽwãmisbũ yushĩ dami betsa husikĩ kẽwãtimakiaki, na hãtxarã

¹⁴ Ẽ betsabu inũ ẽ puibuũ, Deusũ haskawẽ matu mekekatsis ikaiwẽ taea yushĩ dami betsa txakabukẽ kẽwaĩ ana hari buyamakãwẽ, mã ma Cristo hayarã.

¹⁵ Na eska matukiri hãtxa yuikinã, mã huni unãnepatã matũmebi unãtinãtã mã xinãtirubu ẽ matu yuiaii.

¹⁶ Nukũ betsabube itxatã hatubetã meribi uva bimi hene watã akĩ Cristo nuku mawashuni xinãmatirã, xinãkĩ nũ amiski, Deus kẽwãkinã. Ha inũ, misi tũke tũke ashũ nuku mawashũkĩ Cristo hawẽ yura nuku inãkuĩni ha misi hawẽ xinãmati nũ piriamiski.

¹⁷ Nũ Jesus ikũwaĩbu nũ yura betsa betsapabia dasibibũ ha misi nũ pimisbuwẽ taearã, Jesus nuku mawashuni xinaĩ nũ habias yurabuki.

¹⁸ Israelbukiri matu yuinũ nĩkairakãwẽ. Habũ hawẽ txakabuwẽ taeshũ kẽwãti piti Deus inãbu nami teshe Templo anu dayanikabũ bushũ pimisburã, habia dabetã Deus kẽwãkanikiki, na habũ inaĩbu inũ Templo anu dayamisbunã.

¹⁹ Hakia yushĩ dami betsa kẽwaĩnã, dami hawauma inũ hawẽ kẽwãti piti hawauma nũ unaiĩ, nukubunã. Hakia habũ xinãnẽ ha yushĩ dami kẽwaĩburã, unãma haska xinaĩburã, hayaki.

²⁰ Eskaki. Matu yuinũ nĩkakãwẽ. Deus ikũwãbumã yushĩ dami betsa hawẽ kẽwãti piti yushĩ txakabu inãkĩ Epa Deus inãbumaki. Haskawẽ taeshũ yushĩ txakabu kẽwaĩbubetã hawẽ kẽwãti piti piama hatubetã kẽwãriayamakãwẽ.

²¹ Ha inũ, Deus kẽwãkĩ Jesus nuku mawashuni xinãmati nushuti akatsis ikĩ yushĩ dami betsa hawẽ kẽwãti nushuti inaĩbu ayamakãwẽ. Jesusũ yura xinãmati misi pikatsis ikĩ yushĩ dami betsa hawẽ kẽwãti inaĩbu piyamariakãwẽ. Haska inũ, ma Deus kẽwãbiai ana husikaĩ yushĩ dami betsa kẽwãtimahairaki, txakabu irumai keskairã.

²² Ha inũ, yushĩ dami betsa kẽwãkĩ Deus daka mã sinatamanũ, iwanã, aki ikai? Matũ kuxipawenã, mã Deus binuamẽ? Haska yushĩ dami betsa kẽwãkĩ mã husiakeakeairã, ana haska tibi akĩ Deus sinatamayamakãwẽ.

Ikũwaĩ betsabuwẽ nuikĩ hatu merabewakubaĩtikiaki, na hãtxarã

²³ Tsuãra hamapai tibi atirurã, tsuã hatu nemamaki. Haskarã, txanimaki. Haskabia nuku merabewatirumaki. Haska xaraburã, ẽ heneaii. Dasibi tsuã nuku nemama nũ atirubia ikũwaĩbu dasibi merabewamarã, heneriatiki.

²⁴ Hamẽ hamapai pepa bikĩ ha dukũ matuna binũ ika ana hatu maemai naxui ikama hakia yura betsabu dukũtũ hau katuyunũbũ pes ikama manakubaĩkãwẽ.

^25-26 Haska inũ, betsarã, mai dasibi Deusunaki. Ha inũ, dasibi betsa betsapa mai anua damiwanirã, hawenariki. Haskakẽ nami inãmisbu hiwe anua nami bi yuka iki: “Narã, yushĩ dami betsa hawẽ kẽwãti namimẽ?” iwanã, tapĩkĩ tsua yukai meseama bitã pikubaĩkãwẽ.

²⁷ Hamẽ ikũwãbumã matu haibuwatã pimakatsi ikĩ matu iabu mã kakatsi ikai namikiri yuka ikama haska hatũ piti matu kaĩmashuna xinã txakama hatubetã mã pitirubuki.

²⁸ Hakia betsã mia bebũkiri yuikĩ: “Na namirã, yushĩ dami betsa hawẽ kẽwãti namiki”, matu waya hawẽ huĩti babu ana babu wakatsi ikama hawẽ nuikĩ ha nami piyamakãwẽ.

^29-30 Yushĩ dami betsa hawẽ kẽwãti tsuabũra mã nami piarã, matũmebi mã txakabumaki. Haskabiakĩ ikũwaĩ betsa huĩti babuwẽ nuikĩ ha nami hatu merabewakĩ mã pitiruma ẽ matu yuiaii. Haskarara Deusũ ea nemamakẽ ẽ pitiruki. Hakia yura betsa ẽ uĩmatxakaiwẽ taeshũ ena pemaki. Deus kẽwãtã hamapai tibi ẽ pibia pebiakẽ habu hatu mesewakatsi ikama dasibiwẽ Deus duawanũ, iwanã, ẽ ana haska tibi meamaki.

³¹ Hamapai pikĩ nushuti akĩ hamapai betsa betsapa akinã, Deus duawanũ, iwanã, akubaĩkãwẽ.

³² Haska hamapai tibi akĩ hawara danaĩbu hatũ berubi akĩ hatu uĩmatxakayamakãwẽ, judeubu kasmai judeubuma kasmai ikũwaĩ betsabu hiweaburã.

³³ Hamẽ ea ẽ xinãnẽ ikirã, dasibibu merabewanũ ika emebi haska ẽ xinaĩ benama dasibi hatu kẽwãmakĩ Jesus hatu ikũwãmanũ ika hawara danaĩbu henekĩ haska dasibibu hiweabu ẽ hatu merabewakubainaii.