Tito 2:2 - Manobo Western Bukidnon

² Is menge meg̵urang en he maama, ne iyan ipenurù nu kandan is: kinahanglan he metau sikandan he ed-eg̵en te menge suat te lawa zan; kinahanglan he zait sikandan he edtehuzen tenged te menge ulaula zan he meupiya; kinahanglan he metau zan he ed-isip te hustu. Meheg̵et is kedtuu zan te Megbevayà, ebmahalen dan diyà te g̵ehinawa zan is menge zuma zan, wey meinentusen sikandan.

Tito 2:2 Кръстосани препратки

Marcos 5:15

Ne hein nemekeuma zan, neehè dan kes midsuukan te edliblibuwen he menge mezaat he mulin-ulin. Neehè dan dutun he midsul-ub en te ugelingen ne hustu en is ked-isip-isip din ne tenged dutun utew zan en nengeinuinu.

Lucas 8:35

Ne is menge etew he nekezineg dutun te tudtul, ne nemenhendutun dan te ki Jesus su ed-ahaan dan. Ne neehè dan dutun kes neulian he ziyà mebpinuu te etuvangan ni Jesus he midsun-ud en te ugelingen, ne hustu en is ked-isip-isip din. Ne tenged dutun utew zan en nengeinuinu.

Nengeulaula 24:25

Ne zutun te kebpenurua ni Pablo te metazeng he ulaula, wey kebpurungi te ed-ul-ulahan wey is kebpeebuta te andew te kedsilut, nahandek si Felix ne ke sikandin te, “Ereg ki en dè pa. Ibpetawag ku sikew ke zuen ku timpu.”

Ruma 12:3

Ne tenged te imbeg̵ey kedì te Megbevayà is keg̵ehem te kedsengyawa te lalag din, egkeg̵iyen ku keniyu te langun he kinahanglan he kenè niw isipa he lavew kew te menge zuma niw, kekenà, kinahanglan he hustu is ked-isipa niw te ketau niw sumalà is kedtuu he imbeg̵ey te Megbevayà diyà te kada sevaha keniyu.

1 Kurintu 15:34

Likui niw is hustu he ked-isip ne engkezi niw is mezaat he ulaula. Netuenan ku he zuen duma niw ziyan he kemulu pa wazà mesayud ke hengkey is tutuu he tuluuwen mehitenged te Megbevayà. Igkeeled niw pezem heini.

1 Kurintu 9:25

Ne sikan is idlumbà, edhag̵ù sikandin su wey melumbad is lawa zin. Iyan id-ul-ulaha zin kayi su wey zin mezawat is suhul he melemu egkeawà is pulus din. Ne sikitew is tumutuu, edhag̵ù kiw zaan kayi te kedsundan tew te Nengazen su wey tew mezawat is suhul he kenà mulà egkeawà is pulus din te wazà pidtemanan.

2 Kurintu 5:13

Kunaan te zuma ke ebuneg̵en key, iyan, umba henduen key te ebuneg̵en su utew mezesen is kedtumana zey te ebpeveelan te Megbevayà. Iyan, ke ed-isipen niw he kenè key ebuneg̵en, netuenan niw he iyan ibpenigudu zey su wey kew mezeyzey.

Gelasya 5:23

kenè ki mevurut, wey egkeeg̵en ta is kebayà te lawa ta. Ne emun iyan heini menge ulaula ta, kenè ta egkesupak is menge sug̵ù kenita te Megbevayà.

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

1 Tiselunika 5:6

Umba kinahanglan he kenà iring te kedlipezeng is ulaula tew su iring kayi is ulaula te zuma he etew he wazà meketuu. Kinahanglan he ed-andam kiw ne ed-eg̵enen tew is menge mezaat he suat tew.

1 Tiselunika 5:8

Iyan, sikitew mulà is nesakup te maandew, kinahanglan he ed-eg̵enen tew is menge mezaat he suat tew. Idsun-ud tew is limbutung he iyan is kedtuu tew te Megbevayà wey is kebmahala tew zini te g̵ehinawa tew te menge zuma tew. Ne iring te kalù tew te sundaru is kedhemeni tew te kebperateng tew te kedlibriya te Megbevayà kenitew te silut.

1 Timoteo 1:10

menge egkevut te kenè dan esawa, menge maama he egkeerig̵an te iring dan he maama, menge menggeg̵ebpà, menge teruen, menge ebpen-ulug te kewsa wey is minsan hentei he ebpekesupak is ulaula zin te hustu he tuluuwen.

1 Timoteo 1:14

Ne kenà dutun dà taman su utew ad ingkeg̵ag̵ew te Megbevayà ne g̵untaan neketuu ad ki Jesu Kristu ne utew en sikandin mahal zini te g̵ehinawa ku.

1 Timoteo 1:5

Ne kinahanglan he iyan ketezengan ke maan is idsug̵ù nu kandan heini su wey zan mahala is menge zuma zan diyà te g̵ehinawa zan. Ne kenà egkehimu he hustu is kebmahala ta te menge zuma ta emun wazè ki melumpiyuwi te Megbevayà duen te menge salè ta. Kinahanglan he iyan dà ed-ul-ulahan ta is netuenan ta he hustu ne kinahanglan daan he tutuu is kedtuu ta te tutuu he tuluuwen ne zutun human hustu is kebmahala ta te menge zuma ta.

1 Timoteo 3:11

Iring din ded daan is bahi he esawa te diyekunu su kinahanglan he telehuzen sikandin. Kenà menge vereituk, kekenà, egketengkaan is ked-isipa zin te langun wey egkengeserig̵an te minsan hengkey he meupiya he ulaula.

1 Timoteo 3:2

Iyan, is ed-uwit te menge tumutuu, kinahanglan he wazà igkesewayi kandin. Sevaha zà is esawa zin ne kenè din selselai. Kinahanglan he egketengkaan layun is ed-ul-ulahan din; metau sikandin he ed-isip te hustu wey telehuzen sikandin. Kinahanglan he meelima sikandin te menge meg̵eliyug din. Kinahanglan daan he metau he ebpenurù.

1 Timoteo 3:4

Kinahanglan he meupiya is ked-uwita zin te esawa zin wey menge anak din. Kinahanglan he menge mepeveyveyaan wey metinehuzan layun is menge anak din kandin.

1 Timoteo 3:8

Ne iring din ded daan is menge diyekunu, he ke và dà egkeg̵iya, menge edtavang te menge tumutuu; kinahanglan he meupiya is menge ulaula zan. Kinahanglan he telehuzen sikandan; metinumanen sikandan te menge lalag dan. Kenè dan lelenguten, ne kenè dan mebmanggad pinaag̵i te limbung.

1 Timoteo 5:1

Kenè nu bensag̵i is meg̵urang, kekenà, sembag̵i nu he iring te amey nu en. Sembag̵i nu zaan is menge menguhed he maama he iring te menge suled nu en.

Tito 1:13

Ne utew venar is migkag̵i zin. Tenged dutun kinahanglan he pekezeseni nu sikandan te edawey wey mehustu is kedtuu zan

Tito 1:8

Kinahanglan he meelima sikandin te menge meg̵eliyug din ne kinahanglan daan he iyan utew zin egkesuati is kedtevangi zin te menge etew. Metau sikandin he ed-isip te hustu. Metazeng sikandin he etew wey igkesuat te Megbevayà is menge ulaula zin. Metau zaan sikandin he ed-eg̵en te menge suat te lawa zin.

Tito 2:7

Sikew zaan, kinahanglan he layun meupiya is kenikew he ulaula su wey iyan ka meiringi te menge zuma nu. Ne emun ebpenurù ka, kinahanglan he hustu is tuyù nu wey sungkad te Lalag te Megbevayà is paag̵i nu te kebpenurù.

Pilimun 1:9

iyan, tenged te utew ka mahal zini te g̵ehinawa ku, edhangyù e zà kenikew. Siak, si Pablo, is meg̵urang wey g̵untaan pinirisu a zaan tenged te kedtuu ku ki Kristu,

1 Pedro 1:13

Ne g̵eina te iyan haazà, kinahanglan he ed-andam ki wey ki mekepurung mekeisip-isip su wey ta layun mepurungi is kedsunud ta te Nengazen. Kinahanglan he iyan dekelà diyà te g̵ehinawa ta is kebperateng ta te utew meupiya he ibeg̵ey te Megbevayà kenita keuzemà dutun te andew te kebpeg̵awag̵awa ni Jesu Kristu.

1 Pedro 4:7

Kenè en utew egkeug̵et is ketepusan te kelibutan. Ne tenged dutun, kinahanglan he hustu is ked-isip-isip niw. Kinahanglan daan he purungi niw is menge ulaula niw su wey mehustu is ked-ampù niw ziyà te Megbevayà.

1 Pedro 5:8

Med-andam kew, mebantey kew su is kuntada tew he si Setanas, edrig̵urig̵u en he iring te erimaung he edhinig̵er su ebpen-ahà te edewiyen din.

2 Pedro 1:6

Ne is kedsavut, edheg̵etan ta te edtengkaan he ed-ul-ulahan. Ne haazà daan, edheg̵etan ta te kebmeinentusen. Ne is kebmeinentusen, edheg̵etan ta te kebpevayàbayè ta te Megbevayà.