Tito 2:12 - Manobo Western Bukidnon

¹² Ne pinaag̵i zutun te g̵ag̵ew egkesavut ta he kinahanglan he meengkezi ta is menge ulaula he kenà igkesuat te Megbevayà wey is kedtumana ta te menge suat te lawa ta zini te kelibutan. Kinahanglan he ed-eg̵enen ta is menge kebayà ta he mezaat. Kinahanglan daan he metazeng wey igkesuat te Megbevayà is menge ulaula ta te zini ki pa ed-ubpà te kelibutan.

Tito 2:12 Кръстосани препратки

Mateo 12:32

Sikan is edsumpalit kedì te Kakey te Menusiyà, egkepesaylu pa; iyan, sikan is edsumpalit te Wag̵as he Mulin-ulin, kenè en egkepesaylu te wazè din pidtemanan.

Mateo 16:24

Ne zutun migkag̵i si Jesus diyà te menge sumusundan din te, “Ke zuen egkesuat he edsundan kedì, kinahanglan he iawè din diyà te isip din is kandin he egkesuatan he menge ulaula, ne tianga zin is krus din, he ke và dà egkeg̵iya, kinahanglan he edtumanen din is menge sug̵ù ku minsan ke iyan ibpatey zin. Ne human ebpekesunud kedì.

Mateo 28:20

Penurua niw sikandan he tumana zan sikan is langun he insug̵ù ku keniyu. Ne kenè niw lipati he layun a eduma keniyu taman te kenè pa egketapus heini is timpu.”

Lucas 1:6

Si Zacarias wey haazà is esawa zin, metazeng sikandan he etew su wazà igkesawey zutun te kebpurungi zan te edtuman te langun he menge tulumanen wey menge sug̵ù te Megbevayà.

Lucas 1:75

Ne egkehimu he metinumanen wey metazeng is ked-ezapa tew kandin andew-andew te kemulu kiw pa zini te lumpad te kelibutan.”

Juan 14:30

Mevavè dà utew is menge lalag ku keniyu su meg̵aan en ebpekeuma si Setanas is egalen te menge etew zini te kelibutan he kuntada ku. Wazè din keg̵ehem kediey,

Juan 6:25

Ne hein nekezunggù dan neehè dan sikandin. Ne mid-insè dan te, “He Menunudlù,” ke sikandan, “keenu ka mekeuma zini?”

Nengeulaula 24:16

Ne edhemenan ku is menge meupiya he menge vaal su wey wazà igkesewayi kedì te minsan hentei he etew lavew en is Megbevayà.

Nengeulaula 24:25

Ne zutun te kebpenurua ni Pablo te metazeng he ulaula, wey kebpurungi te ed-ul-ulahan wey is kebpeebuta te andew te kedsilut, nahandek si Felix ne ke sikandin te, “Ereg ki en dè pa. Ibpetawag ku sikew ke zuen ku timpu.”

Ruma 12:2

Kenè niw iringi is menge ulaula te menge etew he kuntada te Megbevayà, kekenà, itug̵ut niw he helina kew te Megbevayà pinaag̵i te kebeg̵uwa zin te isip niw. Ne zutun egkesavut niw human is egkesuatan te Megbevayà, he ke và dà egkeg̵iya, egkesavut niw ke hengkey is menge ulaula he metazeng he egkesuatan he kenà egkesewayan te Megbevayà.

Ruma 6:12

Ne tenged kayi, menge suled, kenè te en idtug̵ut he iyan ebayàbayà te menge lawa ta he melemu ebpatey, is mezaat he kebayè dan. Su emun idtug̵ut ta heini, egkepezumdumahan ta is menge mezaat he suat te lawa ta.

Ruma 6:19

Umba insempitè ku is egkeulaula te uripen su wey melemu niw mesavut is ibpesavut ku. Su zengan iring te mibpeuripen kew te mezaat he kebayà ne ingkesuat niw he ed-ul-ulahan te lawa niw is menge meremerik wey mezaat he ulaula he layun ed-iseg he mezaat. Iyan, guntaan kinahanglan he himuwa niw is lawa niw he metazeng he sulug̵uen te Megbevayà wey niw metuman is egkesuatan din.

Ruma 8:13

Su emun kenè niw iyan ed-iniyug̵an is menge suat te lawa niw, edsilutan kew te kemetayen he wazè din pidtemanan, iyan, ke pinaag̵i te kedtavang te Wag̵as he Mulin-ulin egkeiniyug̵an niw is menge mezaat he ulaula niw, ebeg̵ayan kew te untung he wazè din pidtemanan.

2 Kurintu 1:12

Duen, menge suled, idantal zey ne netuenan dey he tutuu heini, ne iyan is: layun meupiya is ulaula zey ziyà te minsan hentei he etew, lavew en diyan te keniyu. Su layun key edtuman te egkesuatan te Megbevayà ne utew hustu is tuyù dey. Wazè dey g̵emita is ketau zey te etew zà duen, kekenà, iyan igkehimuwa zey te langun is mekeg̵eg̵ehem he tavang te Megbevayà.

2 Kurintu 7:1

Ne g̵eina te iyan heini impenaad kenita te Megbevayà, ne edlumpiyuwen ta is menge ulaula ta su wey wazà minsan hengkey he meremerik he ulaula te lawa ta wey meremerik he isip ta. Ne ebpurungan ta is ulaula ta su wey meheg̵eti is kebmetazeng ta pinaag̵i te layun ta kedtehuza kandin.

Gelasya 1:4

Si Kristu, imbelavag din is untung din su wey mepalis is menge salè tew su wey kiw melibri, ne kenè tew meiringi is menge etew he ed-ulaula te mezaat te g̵untaan he timpu kayi te kelibutan. Umba mibeelan heini ni Kristu su edtumanen din is egkesuatan te Amey tew he Megbevayà.

Gelasya 5:24

Ne is minsan hentei he migaked en ni Jesu Kristu, ne iring te inransang din en te krus is mekesesalà he lawa zin, he ke và dà egkeg̵iya, mid-engkezan din en is menge mezaat he kebayè din wey egkesuatan din.

Ipisu 1:4

Dengan te wazè pa limbag̵a is kelibutan, mibpilì kiw en te Megbevayà. Iyan impilia zin kenitew su wey kiw mehimu he menge sakup din he wazà igkesewayi zuen.

Ipisu 2:2

Dutun he timpu mid-ikul niw is mezaat he ibayà he iyan ed-ikulen te menge etew he kuntada te Megbevayà. Midtuman kew te menge sug̵ù ni Setanas. Iyan sikandin ebayàbayà te menge zuen din gehem diyà te hewhewanan. Iyan daan sikandin ebayàbayà te langun he kenà ebpemineg te menge sug̵ù te Megbevayà.

Kulusas 1:22

Ne minsan pa te iyan haazà, midhimu kew g̵untaan te Megbevayà he menge emig̵u zin pinaag̵i te kebpatey ni Kristu. Umba mibpehimatey si Kristu su wey kew mehimu he menge etew he wazà mezaat he ulaula ne wazà igkesumbunga keniyu keuzemà emun ibpeetuvang kew zin diyà te Amey zin he Megbevayà.

1 Tiselunika 4:7

Su nehimu kiw te Megbevayà he menge tumutuu kandin su wey mehimu is menge ulaula tew he zait te etew he g̵aked din. Kenà iyan din egkesuatan he meremerik is menge ulaula tew.

1 Tiselunika 4:9

Ne wazè en kinahanglan he ibpenurù ku pa keniyu he mahala niw ziyà te g̵ehinawa niw is menge zuma niw he tumutuu su impenurù en heini keniyu te Megbevayà.

1 Timoteo 4:12

Minsan pa te menguhed ke pa, kinahanglan he mezait ka he edtehuzen te minsan hentei; kinahanglan he iyan ka ed-iringan te menge tumutuu ki Kristu, ne tenged kayi kinahanglan he tegteg̵ami nu is kegkag̵ikag̵i nu, is ulaula nu, is kebmahala nu te langun, is kedsarig nu te Megbevayà, wey is kedlikayi nu te meremerik he ulaula.

1 Timoteo 6:17

Is menge tumutuu he mezakel is menge azen dan, keg̵iyi nu he kenè dan mebpelavew wey kenè dan medsarig te menge azen dan su kenè ta egketuenan ke keenu ki egkeewai te menge azen ta. Keg̵iyi nu he iyan dan serig̵i is Megbevayà su iyan sikandin metulanged. Is minsan hengkey he naazen ta, imbeg̵ey zin kenita wey mebmeupiya is kebpekesavuk ta.

1 Timoteo 6:9

Is menge etew he egkesuat he medsepian, melemu sikandan egkepenulayi wey egkeseleizi. Mezakel is menge suat dan he wazà pulus ne ebpekezezaat heini. Ebpekezezaat heini kandan wey egkehimu zaan he ibpatey zan heini.

2 Timoteo 3:12

Ne is langun he tumutuu ki Jesu Kristu he egkesuatan dan he pinaag̵i kandin metuman dan is egkesuatan te Megbevayà, edresayen sikandan te menge kuntada te Megbevayà.

2 Timoteo 4:10

su mid-ewaan a ni Dimas tenged te iyan egkenug̵unan din is untung din dini te kelibutan. Midhendiyà sikandin te Tiselunika. Ne si Krisinti, midhendiyà te Gelasya, ne si Tito zaan, midhendiyà te Delmasya.

Tito 3:3

Su sikita zaan is tumutuu, engey ki zengan wey mesinupaken ki te Megbevayà su wazè ta meturedu is tutuu he ibayà. Nengeuripen ki te menge mezaat he kebayà te lawa ta wey te menge kelipey he kenà meupiya. Neteg̵eb dengan is isip ta te kelelalung wey kesina. Nepeukan ki te menge etew ne nepeukan ta zaan sikandan.

Hibriyuhanen 8:11

Ne tenged kayi, dutun he timpu keuzemà kenè en kinahanglan te minsan hentei he ebpepenurù te zuma zin mehitenged kedì, ne kenè en daan kinahanglan dutun he zuen pa maan etew he edseysey ziyà te zuma zin ke hentei a is Megbevayà su zutun egketuenan te minsan hentei, lavew se kenà lavew, ke hentei a.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.

2 Pedro 2:9

Iyan, is menge etew mulà he ed-azap te Nengazen, metau sikandin he edtavang kandan wey kenè dan mekesalà ke ebpenulayen sikandan. Metau zaan sikandin he ebakus te menge nemematey he lalung su wey itag̵ad sikandan taman te andew te kedsiluti zin kandan.

2 Pedro 3:11

Ne g̵eina te zuen andew keuzemà he zutun egkehanew is langun te iring kayi, kinahanglan he ebpurungan tew is kedsunud tew te Megbevayà para wazà igkesewayi kenitew.

1 Juan 2:27

Iyan, sikiyu, wazà kinahanglan he zuen selakew pa he ebpenurù keniyu su mibpeulinan kew en ni Kristu te Wag̵as he Mulin-ulin. Pinaag̵i zutun egkesavut niw is langun he ibpesavut keniyu ni Kristu. Tutuu mulà ne kenà tarù haazà is ibpesavut din keniyu umba kinahanglan he hemeni niw is kebpekidsevaha niw kandin sumalà is impenurù en keniyu.

1 Juan 5:19

Netuenan tew he menge anak kiw te Megbevayà, iyan, is langun he menge kuntada te Megbevayà dini te kelibutan, ebeyveyaan sikandan ni Setanas.

Hudas 1:18

Ke sikandan te, “Keuzemà te ketepusan he menge andew ebpenlepew is menge etew he edsumpalit keniyu. Iyan edtumanen dan is menge kebayè dan he supak te Megbevayà.”

Impezayag 14:12

Ne tenged dutun, sikan is menge etew he neg̵aked te Megbevayà, sikan is ebpememineg te menge sug̵ù te Megbevayà wey edtuman te menge lalag ni Jesus, kinahanglan he med-antus sikandan.