Tito 2:10 - Manobo Western Bukidnon

¹⁰ ne kenè dan mebpenakew, kekenà, ipeehè dan he egkeserig̵an sikandan te egalen dan. Emun iyan haazà ulaula te menge sulug̵uen he tumutuu egkesavut te menge etew he utew tutuu is tuluuwen he ibpenurù ta mehitenged te Megbevayà he iyan menluluwas tew.

Tito 2:10 Кръстосани препратки

Mateo 24:45

Sikan is sulug̵uen he uluwanen wey metinumanen, iyan ibpevayàbayà te egalen din te menge zuma zin he sulug̵uen. Ne iyan ebpekaan te menge zuma zin he sulug̵uen dutun te uras te kegkaan.

Mateo 5:16

Ne iring din ded daan is menge ulaula niw he meupiya; kinahanglan he kenè niw ieles. Ipeehè niw te menge etew is menge ulaula niw he meupiya ne tenged kayi ebpekezalig dan te Amey tew he Megbevayà he ziyà te langit.

Lucas 1:47

Utew ku ingkelipey is Megbevayà he iyan menluluwas ku.

Lucas 1:80

Ne haazà is anak ni Zacarias, midtulin ne mid-iseg daan is ketau zin te ked-isip. Ne hein nekeiseg-iseg en is kezekelè din ne midhendiyà sikandin te tanà he kenè ed-ubpaan te etew ne zutun med-ubpà taman te neuma haazà is timpu te kebpenurù din te menge kezuzumahi zin he kevuwazan ni Israyil mehitenged te Lalag te Megbevayà.

Lucas 16:10

Benar is egkeg̵iyen ku keniyu he emun egkeserig̵an ka te zeisek he azen, egkeserig̵an ka zaan te zekelà he azen. Ne emun limbungan ka te minsan deisek dà, ne wey ke pe be kenà medlimbung duen te zekelè en he ebpeg̵ewezan kenikew.

Juan 12:6

Iyan ingkekeg̵iya zin dutun, kenà te hizu zin te menge egkengeayuayu, kekenà, tenged te tekawen sikandin. Iyan sikandin ibpetipig eni Jesus te selapì dan ne ebpenekawen din is duma zutun.

1 Kurintu 4:2

Ne is sinerig̵an, ne kinahanglan he metinumanen sikandin te menge sug̵ù te egalen din.

Ipisu 4:1

Ne tenged kayi te langun, siak is pirisu tenged te midtuman ku is menge sugù te Nengazen, edhengyuan ku sikiyu he g̵eina te midhimu kew te Megbevayà he menge tumutuu zin, ul-ulaha niw is ulaula he zait he ed-ul-ulahan te tumutuu.

Pilipus 1:27

Menge suled, ke minsan hengkey is egkehitavù kediey, utew kinahanglan he is menge ulaula niw, ne kenà ebpekesuwey te impenurù ni Kristu pinaag̵i te Meupiya he Tudtulanen. Su emun kenè kew edsuwey kayi, minsan ke kenà a ebpekelikù diyan, egketudtulan a he nesevaha is gehinawa niw wey tuyù niw te kedhag̵ù su wey metuuwi te mezakel he menge etew is Meupiya he Tudtulanen.

Pilipus 4:8

Ketepusan heini, menge suled, he menge lalag ku keniyu. Iyan niw itag̵ù diyà te isip niw is meupiya, is dait he igkezelig̵i, is tutuu he tuluuwen, is metazeng wey hustu wey mekempet he ulaula, wey is minsan hengkey he igkehimu te minsan hentei he egketahud.

1 Timoteo 1:1

Sikew, Timoteo he iring te tutuu he anak ku tenged te kedtuu nu ki Kristu, ebpesuratan ku sikew. Iyan a si Pablo he epustul ni Jesu Kristu, he ke và dà egkeg̵iya, sulug̵uen e zin. Nehimu a he epustul mehitenged te sug̵ù te Megbevayà he iyan midlibri kenitew te silut wey mehitenged te sug̵ù ni Jesu Kristu. Iyan sikandin egkeserig̵an ta. Berakat he ikeg̵ag̵ew ka wey kehizuwi ka te Amey tew he Megbevayà wey te Nengazen tew he si Jesu Kristu wey veg̵ayi ke zan te melinawen he kebpekesavuk.

1 Timoteo 5:17

Is menge ebmeg̵urangen he meupiya is ked-uwita zan te menge tumutuu, kinahanglan he isipa niw sikandan he zait he edtekepen is suhul kandan, lavew en sikandan is dekelà is baal zan te kedwali wey kebpenurù.

1 Timoteo 6:1

Is menge sulug̵uen he tumutuu, kinahanglan he isipa zan is menge egalen dan he zait he edtehuzen dan te minsan keenu he timpu. Su pinaag̵i kayi wazà ebpekezezaat te zengeg te Megbevayà wey wazà ebpekesudì te kebpenurù dey.

1 Timoteo 6:3

Ke zuen ebpenurù te selakew he tuluuwen ne kenè din edewaten is hustu he kebpenurù te Nengazen tew he si Kristu wey is tuluuwen mehitenged te kedtumana tew te egkesuatan te Megbevayà,

Tito 3:4

Ne is Megbevayà he Menluluwas tew, hein neuma is timpu te kebpaahaa zin kenita te gag̵ew zin wey ketulanged din,

1 Pedro 2:12

Kinahanglan he utew metazeng is menge ulaula niw su wey maahà te menge etew he kenà tumutuu. Su minsan ke egkeg̵iyen dan he mezaat is ulaula niw, egketuenan dan gihapun he meupiya is ed-ul-ulahan niw ne ebpekezalig dan te Megbevayà keuzemà te andew te kebulusi zin te menusiyà.

1 Pedro 3:16

Mebmetinehuzen kew is edtavak wey menayù is kegkag̵i niw. Kinahanglan he wazà salà he netag̵ù diyà te g̵ehinawa niw te menge sumusundan ni Kristu su emun wazà ulaula niw he mezaat egkeeled is edsudì keniyu tenged te egkeg̵iyen dan.

2 Juan 1:9

Ke zuen etew he ed-engkezan din is tutuu he tuluuwen he impenurù ni Kristu su iyan edhemenan din is tarù he tuluuwen he in-uman din dutun, wazà sikandin mebpekidsevaha te Megbevayà. Is minsan hentei mulà he edhemenan din is tutuu he tuluuwen, iyan sikandin mibpekidsevaha te Amey tew he Megbevayà wey is Anak din.