Santiago 5:3 - Manobo Western Bukidnon

³ Midtangis is menge selapì niw wey vulawan su wazè niw g̵emita he idtavang. Ne is tangis, iyan tuus te keleleg̵ed niw ne tenged dutun utew mepait is silut keniyu keuzemà te andew te kedlimasa te menusiyà; su midtipig̵an niw is dekelà he kewasa kayi te menge ketepusan he andew.

Santiago 5:3 Кръстосани препратки

Nengeulaula 2:17

‘Migkag̵i is Megbevayà te, “Keuzemà te ketepusan he timpu, sikiyu is tivuuk he menusiyà, ibpelumun ku keniyu is Wag̵as he Mulin-ulin. Ne zutun ebpeneuven is menge anak niw he maama wey is anak niw he vahi ne ibpesavut dan te menge etew is lalag ku. Duen menge menguhed he ebpuwasan ku is id-ehè dan wey zan maahà is kenà egkeahà te zuma. Ne zuen menge meg̵urang he edhimuwen ku he menge meneneg̵einep.

Ruma 2:5

Ne minsan pa zutun, mezesen pa utew is gehinawa nu ne kenè ka egkesuat he ed-iniyug te mezaat he ulaula; ne kada andew ed-iseg ebmeveg̵at is silut he idrasey kenikew keuzemà dutun te andew te kedsilut te Megbevayà. Ne zutun he timpu ibpeehè din kenitew is metazeng he kedhukum din.

2 Timoteo 2:17

Is menge etew he iring kayi is kebpenurù dan, ne iring te it-it is penurù dan su ebpekeeneb ne ebpekezezaat. Is kebpenurù ni Himinyu wey ni Pilitu, ne iring kayi.

2 Pedro 3:3

Idhuna ku keniyu ibpesavut he keuzemà te ketepusan he timpu duen ebpemenlepew he menge etew he iyan ebayàbayà kandan is menge mezaat he kebayè dan. Edsumpeliten kew zan he egkag̵i te,

Impezayag 17:16

Ne haazà is neehè nu he sepulù he sungey wey haazà is langgam, ne egkuntedehan dan haazà is bahi he ebpelelevag ne ed-eg̵awen dan is menge azen din ne edlevasan dan sikandin ne egkeenen dan is sapù din ne ebinsulan dan sikandin.

Impezayag 20:15

Is minsan hentei zutun he wazà ilista is ngazan din diyà te libru te untung, in-agbur zaan sikandin diyà te ranew he egkeregreg.

Impezayag 21:8

Iyan, sikan is egkehandek he edsundan kedì wey is menge kenà metinumanen, is menge etew he memahawag is ulaula, is menge memumunù, wey is menge meremerik is betasan, is menge keteuwan he etew, wey menge ed-azap te kenà tutuu he Megbevayà wey is langun he teruen he menge etew, iyan egketemanan dan is id-agbur sikandan diyà te ranew he nepenù te egkeregreg he esupri he iyan ikezuwa he kemetayen,” ke sikandin.