Santiago 4:4 - Manobo Western Bukidnon

⁴ Kenè kew metinumanen te pesarig niw ziyà te Megbevayà. Wazè niw ves metueni he emun iyan niw egkesuatan is mezaat he ed-ul-ulahan te menge kuntada te Megbevayà dini te kelibutan, ne menge kuntada kew zaan te Megbevayà. Is minsan hentei he iyan egkesuatan din is mezaat he ulaula zini te kelibutan, mibpekigkuntada sikandin te Megbevayà.

Santiago 4:4 Кръстосани препратки

Mateo 12:39

Ne midtavak si Jesus te, “Sikiyu is menge etew g̵untaan, utew mezaat is menge ulaula niw. Wazè en diyà te gehinawa niw is kebmahala te Megbevayà. Maan is ed-ehè kew te singyal? Iyan dà singyal he ibpaahà keniyu is iring duen te singyal he impeulaula zuen te tipehuna he ebpeneuven he si Jonas.

Mateo 16:4

Sikiyu is menge etew g̵untaan, utew kew mezaat; wazè en diyà te g̵ehinawa niw is kebmahala te Megbevayà! Maan is ed-ehè kew te singyal? Iyan dà singyal he ibpaahà keniyu is iring duen te singyal he neulaula zuen te tipehuna he si Jonas.” Ne zutun mid-ewaan din sikandan.

Mateo 6:24

Is uripen, kenà egkehimu he zezuwa is teg̵iuripen kandin. Su emun dezuwa is ebayàbayà kandin, edtehuzen din is sevaha ne egkepeukan din is sevaha. Ne emun kenà, ne egkeepesan din is sevaha, ne ebmahalen din is sevaha. Ne iring din ded daan emun iyan mahal ziyà te g̵ehinawa nu is ketig̵eyunan, su kenà egkehimu he mahal zaan diyà te g̵ehinawa nu is Megbevayà.

Lucas 19:27

Ne mid-uman megkag̵i haazà is hadì te, ‘Ne sikan is menge etew he kenè dan egkesuat he iyan a mekehadì kandan, ne uwita niw zini ne penhimetayi niw sikandan dini te etuvangan ku.’ ”

Juan 15:19

Emun duma kew te menge kuntada te Megbevayà ebmahalen kew zan, iyan, geina te kenè kew zan duma ne egkuntedahan kew zan su mibpilì ku sikiyu wey kew mekesuwey ziyà te kandan.

Juan 17:14

Sikan is lalag nu he ibpepenurù nu kediey, impenurù ku en kandan, ne migkuntada sikandan te menge etew zini te kelibutan he kuntada nu su wazè dan upakat kayi iring te wazà daan kedì he upakat te menge kuntada nu.

Juan 7:7

Kenè kew egkepeukan te menge etew he kuntada te Megbevayà, iyan, siak, egkepeukan e zan mulà su pinaag̵i te ibpenurù ku egketuenan he mezaat is menge ulaula zan.

Ruma 5:10

Su zutun te timpu zengan he kemulu ki kuntada te Megbevayà, tenged te kebpehimatey te Anak din, nehimu ki he emig̵u zin. Ne emun iyan haazà, guntaan te emig̵u ki zin en, wey ki pe be kenà mehimu he melibri keuzemà te silut tenged te nevanhew en sikandin.

Ruma 8:7

Emun ebeyveyaan is isip te etew te menge mezaat he kebayà te lawa zin, kuntada sikandin te Megbevayà su kenè din edtumanen is menge sug̵ù te Megbevayà. Ne kenà duen dà taman su kenà egkehimu he egketuman din.

1 Kurintu 1:20

Ne egkesavut ta kayi he wazè en pulus te ketau te menge uluwanen, ne wazà daan pulus te kedsavut te nemeketunghà wey te menge metau he egkag̵i zini te kelibutan. Su impesavut en te Megbevayà he is ketau he zini zà ebpuun te kelibutan, wazè en pulus diyà te kandin.

1 Kurintu 1:21

Utew metau is Megbevayà; midhimu zin he kenà egketuenan te menge etew ke hentei sikandin pinaag̵i te kandan dà he ketau su midhimu zin he egkelibri sikandan pinaag̵i zà te kedtuu zan te Meupiya he Tudtulanen he ibpenurù ta he kunaan dan ke tarù he wazè din pulus.

Gelasya 1:10

Kunaan niw vuwa ke iyan netag̵ù te g̵ehinawa ku is: egkesuat a he zelig̵a a te menge etew. Iyan, kenà iyan heini netag̵ù te g̵ehinawa ku, kekenà, iyan is kebpenunuata ku te Megbevayà. Kunaan niw vuwa zaan ke egkesuatan ku he ibmeupiya te g̵ehinawa te menge etew is menge ulaula ku, iyan, kenà daan iyan egkesuatan ku su emun iyan egkesuatan ku, kenà egkehimu he sulug̵uen a ni Kristu.

Santiago 1:27

Is etew he hustu is ked-azap din te Megbevayà, edlikayan din is menge mezaat he ulaula he iyan ed-ul-ulahan te menge etew zini te kelibutan he kuntada te Megbevayà. Meupiya mulà is ulaula zin. Ebpurungan din is menge edlised he menge ilu he vatà wey menge valu he vahi. Iyan heini egkesuatan te Amey tew he Megbevayà he paag̵i te ked-ezapa tew kandin.