Santiago 2:5 - Manobo Western Bukidnon

⁵ Pemineg̵a niw, menge minahal ku he suled, is ibpesavut ku keniyu. Duen mibpilì te Megbevayà he egkengeayuayu. Ne minsan deisek is ketig̵eyunan dan midhimu te Megbevayà he zekelà mulà is kedsarig dan kandin ne iyan sikandan edtuvazan din pinaag̵i te kedhadì din sumalà is penaad din diyà te langun he ebmahalen dan sikandin diyà te g̵ehinawa zan.

Santiago 2:5 Кръстосани препратки

Mateo 25:34

Ne zutun, siak is hadì, ekeg̵iyan ku is menge etew ziyà te zapit te egkekewanan ku te, ‘Sikiyu is midtuvazan te Amey ku he Megbevayà, kayi kew su iyan kew edhedian ku. Su is kedhadì ku keniyu, integ̵ana en dengan puun pa te kedlimbag̵a te kelibutan.

Mateo 5:3

Ne ke sikandin te, “Utew zeyzey is nengesayud he kenà sikandan ebpekeulaula te meupiya ke kenà sikandan edtevangan te Megbevayà su iyan sikandan egkehedian te Megbevayà.

Marcos 7:14

Ne impeuman ipeuvey ni Jesus is menge etew ziyà te kandin ne ke sikandin te, “Langun te sikiyu, pemineg̵a niw heini is menge lalag ku ne sevuta niw he

Lucas 12:21

Ne mid-uman megkag̵i si Jesus diyà te mezakel he menge etew, ke sikandin te, “Iring kayi te sepian he etew is minsan hentei he edtipig te zekelà he ketig̵eyunan, iyan, wazà diyà te kandin is minsan hengkey he igkesuat te Megbevayà.”

Lucas 12:32

Sikiyu is menge sumusundan ku, kenè kew mahandek. Minsan pa te zeisey kew zà, is Amey niw he Megbevayà, egkesuatan din he medhadì kew iring te edhadì daan sikandin.

Lucas 16:22

Ne wazà utew meug̵et dutun ne minatey haazà is ayuayu he si Lazaro ne mid-angey sikandin te menge velinsug̵uen te Megbevayà ne insavuk dan diyà te uvey ni Abraham te kepuun te menge Hudiyu. Ne zutun daan he timpu ne minatey zaan haazà is sepian he etew ne inleveng sikandin.

Lucas 16:25

Iyan, midtavak ni Abraham haazà is mid-umew te, ‘Apù, tentenuzi nu he hein uuyag ke pa, ne mid-em-eminan nu en is kedlipeylipey nu. Iyan, si Lazaro mulà, ne neem-eminan din en is kemeresayan. Ne g̵untaan, si Lazaro, edlipayen; ne sikew, edresayen.

Lucas 22:29

Mibeg̵ayan a te Amey ku he Megbevayà te ketenged te kedhadì keuzemà. Ne iring din ded daan ne ebeg̵ayan ku zaan sikiyu te ketenged te kedhadì.

Lucas 6:20

Ne mibpenlangulangu si Jesus diyà te menge sumusundan din ne migkag̵i sikandin te, “Utew kew zeyzey is menge ayuayu su iyan kew en edhedian te Megbevayà!

Juan 7:48

Sikami is menge egalen niw, duen be minsan sevaha kenami he neketuu kandin? Wazà! Duen be Perisiyu he neketuu kandin? Wazà daan!

Nengeulaula 7:2

Ne midtavak si Esteban te, “Sikiyu is menge ebmeg̵urangen wey menge suled ku, pemineg̵a niw is menge lalag ku keniyu. Dengan, kes kepuun tew he si Abraham, mibpaahà kandin is mekeg̵eg̵ehem he Megbevayà te kemulu pa ziyà si Abraham ed-ubpà te tanà he Misuputamya hein wazè pa sikandin medhalin diyà te inged he Haran.

Ruma 8:17

Ne g̵eina te anak ki zin, keuzemà egkezawat ta is langun he meupiya he impenaad din kenita, ne kenà duen dà taman, su is minsan hengkey he ibeg̵ey zin ki Kristu, ibeg̵ey zin daan kenita. Iyan, wey ki zà ebpekeambit te utew meupiya he kebpekesavuk ni Kristu ke ed-entusen ta is menge kemereg̵enan tenged te kedtuu ta, iring te si Jesu Kristu, nekeantus daan te kemereg̵enan.

1 Kurintu 2:9

Ne tenged kayi iyan ibpenurù dey is insurat dengan he Lalag te Megbevayà he edhenduen te, “Is utew meupiya wey egkein-inuwan he wazè pa maahà wey wazè pa mezineg te menusiyà wey wazè pa meisip te minsan hentei he etew, ne iyan heini mid-andam te Megbevayà he ibeg̵ey zin diyà te langun he menge etew he mahal sikandin diyà te g̵ehinawa zan.”

2 Kurintu 4:15

Ne umba ed-entusen dey is langun he mereg̵en su wey kew iyan mezeyzey, su emun egketukid en is mezakel he etew te g̵ag̵ew te Megbevayà, ne zutun ed-iseg he ebmezakel is ebpekepeselamat te Megbevayà ne egkevantug is Megbevayà.

2 Kurintu 6:10

Mezakel is menge seeng dey, iyan, layun key egkelipey. Henduen be te utew key egkeayuayu, iyan, pinaag̵i kenami, edsepian te wazà pidtemanan is mezakel he menge etew. Henduen be te wazè dey azen, iyan, naangken dey is langun he ibeg̵ey te Megbevayà.

2 Kurintu 8:9

Netuenan ta ke hengkey is kezekelà te g̵ag̵ew kenita te Nengazen tew he si Jesu Kristu. Su tenged te hizu zin kenita, minsan te utew sikandin sepian diyà te langit, midhimu zin he utew sikandin ayuayu pinaag̵i te kebpeetew zin wey kebpehimatey zin. Ne tenged kayi te kegkeayuayu zin egkehimu ki he utew sepian.

Ipisu 1:18

Id-ampù ku he iveg̵ey zin daan keniyu is kebpurung kedsavut su wey niw metueni ke hengkey is langun he meupiya he egkeperateng tew keuzemà tenged te midhimu kiw en he menge tumutuu zin, ne wey niw zaan metueni he utew mezakel zutun is menge meupiya he idtuvad din kenitew.

Ipisu 3:8

Siak, lavew kediey is minsan hentei he menge tumutuu te Megbevayà. Ne minsan pa te iyan heini, midtuvazan a te Megbevayà pinaag̵i te kedsug̵ua zin kediey te kebpenudtul ziyan te keniyu te kenà menge Hudiyu te Meupiya he Tudtulanen mehitenged te utew lavew he zekelà he kenà egketegkad he meupiya he igketuvad kenitew ni Kristu.

1 Tiselunika 2:12

Midsembag̵an dey sikiyu; iyan key midlangan te g̵ehinawa niw ne midhengyuan dey sikiyu he med-ulaula kew te sungkad te egkesuatan te Megbevayà. Iyan sikandin midhimu keniyu he tumutuu wey kew zin mehedii wey kew tulusa.

2 Tiselunika 1:5

Heini is kedsarig niw wey ked-antus niw, ne iyan tuus he metazeng is kukuman te Megbevayà su pinaag̵i te memerasey he egkeantus niw, ibpeehè din he zait kew he idragkes dutun te menge etew he edhedian din.

1 Timoteo 6:18

Keg̵iyi nu is menge sepian he tumutuu he hemeni zan ul-ulaha is meupiya su iyan heini hustu he ketig̵eyunan. Mebmetulanged dan wey mebmetinevangen.

2 Timoteo 4:18

Ne kenà dutun dà taman su edlibriyen e pa te Nengazen te minsan hengkey he ebpekekaid kedì ne edlig-enan e zin taman te ed-uwiten e zin dutun te g̵inhedian din diyà te langit. Berakat he zelig̵a sikandin te wazà pidtemanan.

2 Timoteo 4:8

Ne g̵untaan integ̵ana en kedì te Nengazen is suhul he iyan ibeg̵ey zin diyà te langun he memetazeng he etew. Ibeg̵ey zin heini keuzemà te andew te kedsusiya zin te nengeulaula te tivuuk he menusiyà. Iyan sikandin kes metazeng is kedsusi zin. Ne kenà iyan e zà midteg̵enahan din te suhul, kekenà, midteg̵enahan din daan is langun he utew egkeg̵alew ke ebpekelikù sikandin.

Hibriyuhanen 11:26

Neisip din he tuwas pa he meupiya is ked-entusa zin te kedlupig̵i kandin tenged te kedsarig din te mibpilì he hadì he ibpevulus te Megbevayà keuzemà, kenà is dekelà he ketig̵eyunan he egkekuwa zin diyà te Ihiptu. Su iyan hustu he edteg̵azan din is langun he meupiya he ibeg̵ey kandin te Megbevayà keuzemà.

Santiago 1:12

Utew zeyzey is etew he ebpurung ed-antus te penggezam kandin su emun egkeahà he hustu is kedtuu zin, ebeg̵ayan sikandin te untung he wazà pidtemanan he iyan impenaad te Megbevayà diyà te langun he ebmahalen dan sikandin diyà te g̵ehinawa zan.

Santiago 1:16

Menge minahal ku he suled, kenè niw tuuwi is kenà tutuu. Kenà ebpenuley is Megbevayà.

Santiago 1:19

Kenè niw lipati, menge minahal ku he suled, he is minsan hentei kenitew, kinahanglan he layun andam he ebpemineg te Lalag te Megbevayà ne kenè ta ipetuwas is kenita zà he lalag ne kenè ki zaan melemu he egkepauk.

Santiago 1:9

Kinahanglan he mebmelipayen is egkeayuayu he tumutuu emun ibpelavew sikandin te Megbevayà.

1 Pedro 1:4

Ne elin daan egkeperateng tew is utew meupiya he idtuvad din kenitew. Integ̵ana zin en heini ziyà te langit ne zutun kenà egkeredak, kenà egkezeetan, ne kenà daan egkehanew.

2 Pedro 1:11

ne zekelà is kelipey tew keuzemà su egkeg̵alew is Megbevayà kenitew zutun te kebpeseleza zin kenitew zutun te wazà pidtemanan he g̵inhedian te Nengazen tew he si Jesu Kristu he iyan Menluluwas tew.

Impezayag 2:9

Netuenan ku is kegkeantus niw te kemeresayan; netuenan ku he egkengeayuayu kew. Ne minsan pa zutun sepian kew utew pinaag̵i te kedtuu niw. Netuenan ku he kenà benar is id-ituk keniyu te menge etew he egkag̵i he menge Hudiyu zan, iyan, kenà sikandan tutuu he Hudiyu su mibpekid-upakat dan ki Setanas.

Impezayag 21:7

Ke zuen minsan hentei he ebpekezaag ki Setanas, ne edhimuwen ku sikandin he anak ku ne egkehimu a zaan he Megbevayè din.

Impezayag 3:18

Umba, edsembag̵an ku sikiyu he pemesaha niw zini te kediey is wag̵as he vulawan he migezaman diyà te hapuy, he ke và dà egkeg̵iya, hustu he kedtuu, ne tutuu en human he sepian kew. Ne pemasa kew zaan diyà te kediey te meputì he bisti wey maawà is kegkeeled niw tenged te kegkelevasi keniyu. Ne pemasa kew zaan te ibawì te kegkelakap niw su wey mehustu is ked-ehè niw.